美劇和英劇

我本身都唔鍾意睇電視，基本上，我香港都唔多開電視，除咗睇新聞、愛回家、港享受港生活，都無咩睇其他電視節目。 身在外地，呢期睇咗啲劇集：FOREVER 同 HUMANS。 FOREVER，講一個人係唔會死，每次生命受到重創就會重生於海中。當中好多對白都好有意思。當人類不斷追求長生不老，呢個劇俾到你另一個角度。 HUMANS，故事好老生常談，講機械人高到融入人類生活，同時有一小堆合成人有思想和感情，都幾好睇。

股巿小記

呢次真係俾阿爺玩到謝... $270 蚊接咗兩手 388，最終要 $24x 止蝕離場，最低插到去 $198，雖然家陣佢上番 $239，但佢個息口太低，同埋 PE 太高，暫時唔會買番，低過 $200 就會諗下。 早排巿況太差 939 我 $7.4 入貨，最後又係要止蝕離場。。。 好彩食咗 0.3 利息填翻小小損失 2828 就更慘不忍睹，又係要止蝕 2800 就繼續持有，因為大陸政策，買佢會升番。其實 2828 都應該會升番，但真係唔想再俾阿爺玩一鑊。 281 呢隻仲吹漲，0.39 入，佢一直跌到 0.36，止蝕後就升翻去 0.425。無話可說。 最後，確定阿爺政策，我就 $4.3 買入 3988，$67 買入 5。 最後悔係無決斷的低價買入 3888，浪費了 30% 的升幅。 特此記錄以警戒自己。

自己換偈油

話說小弟實在太得閒，咁啱o架車著燈提示要返廠換油同檢查。基於工程師的本性，一於睇下有咩要檢查先。

2012 Accord 2.4 LX，出 A12 code 睇翻 owner manual，有呢幾樣要 check：

Air filter
Cabin filter
Belt
Oil Change

咁即係要睇皮帶、冷氣 filter、engine 入氣 filter同埋要換偈油。家陣網上資訊咁X發達。睇下人地點做先。

打開車頭蓋，睇下條皮帶咩咩先，按下佢，好緊無咩虛位，再著車睇下有無怪聲，皮帶坐唔行或者歪斜，感覺一齊正常。 咁到冷氣 filter，原來係係乘客位前邊個儲物箱，原來好鬼易拆開，真係要拆過先知係點做。打開個儲物箱後，好易就拉到個冷氣 filter 出嚟。一睇，又唔係太污糟咋喎，係有啲樹葉呀樹枝呀咁，當然有小小黑色喇，咁我咪又用個吸塵機吸吸佢，又乾淨晒。跟手到 engine 入氣 filter，原來又係好簡單，電池對上個有舊嘢，以前成鬼日都唔知係咩家科，原來鬆開三個 clips，就可以揭開個蓋，原來就係放著一個引擎的吸氣 filter，當然我又拆佢出嚟又用吸塵機吸吸佢，又乾淨咗，我估可以頂多一次先換。

我估下次我係會自己買自己換，根本就無咩難度。 好喇，到戲肉，換~偈~油~ 

事前都睇咗好X多次人地點換。搜集好資料，知邊要買咩偈油同偈油隔，即係 engine oil 同埋 oil filter。我呢次就用咗 Mobil 1 0W-20 綠色 label 嗰款。Oil filter 就用咗 Bosch 的 distance plus。偈油 4.75L 喺 WalMart 就 $23.x。Filter 就 $10.x。後尾發現跟本唔係買咁貴 filter，因為如果預咗換油又換 filter，駛鬼理佢係唔係可以高里數 filter 咩，蠢咗添。我仲要買個 oil pan 去儲啲舊油，Jack Stand 去頂住部車。

好喇，要熱咗o架車啲偈油先流得快，熄車，打個偈油蓋，用跟車附送的 jack 去 jack 起o架車，用jack stand 頂住，千其唔好就咁用個 jack 去頂住o架車，札落嚟無命賠。然後 jack 埋另一邊，同樣又係用個 jack stand 頂住佢。好喇，預備好 oil pan，瞓落去一睇，咦！點解有個膠底冚o既，咁我就手快快拆埋佢，但到最後先發現原來唔駛拆佢都可以換到油。唉，低能咗添。好，然後就搵個 wrench 去扭開粒 engine oil 底盤粒螺絲。嘩，啲偈油 fa fa 聲咁'標'出嚟，個 oil pan set 好位都無用，佢痾得實在太遠，搞到一地都係。。。咁等佢一陣，流晒啲偈油出嚟，就要扭開個偈油隔，真係就咁用手都會扭到出嚟，但記得戴手套，因為拆個偈油隔係一定會整污糟隻手。又等佢流晒啲油出嚟，就可以攞個新油隔出嚟，然後用啲新偈油去封一封個 gasket 同個邊，就可以將個新 filter 扭番上去，又係用手都扭到，扭番緊佢就可以了。之後就扭番偈油底盤粒螺絲，記得佢係有個 ring 的，作用係防止你扭死力而損壞啲螺紋而導致漏油。我呢次就懶，無換個新的 ring，下次先算啦。好，上好晒之後，就可以 jack 番底o架車加偈油啦。

記得 check 下 owner manual 話要用幾多偈油，我架車換埋 oil filter 就係用 4L，咁自己倒偈油落去就要自己小心睇住，加到咁上下就好停，然後著車，等佢熱咗就熄車，睇油標 check 下到唔到兩個 mark o既中間，唔夠就再慢慢倒，咪心急，倒多咗要放翻出嚟就好麻煩。 好，過咗一陣再睇下底下有無漏偈油，嘩，無事，好乾淨，大功告成。咁就完成咗小弟第一次自己換油的小 project。

美國好多地都有廢油回收，等我真係搞掂好啲廢油再報告。 換油後，架車真係爽咗，轉數反應快咗。