HP N40L DSM Harddisk crash@HK

俾你睇到呢個畫面，真係心都灰埋。唉，佢家陣做咗 read-only。等我要搵人幫我買隻 HDD。放入去之後抄晒啲 file。先可以再 regenerate 個 HDD。

我應該買咩 HDD 好呢？

HP Gen8 Microserver NAS - 黑氣再臨

好喇，當你拎到條 power cable 同 2.5" HDD 返屋企，諗住興致勃勃咁玩一輪之後，最精采o既部分終於出現。燈燈燈凳~~~ 我 居 然 無 S A T A c a b l e！！！

我真係屌咗一聲，跟住咩都唔整，將所有o野放埋一邊就算。

對我嚟講，真係一種好深o既打擊，我玩咗電腦十幾年，真係唔會因為無 cable 或者唔會接受到因為無 cable 而無得玩。喺香梘嗰時，啲 cable，火牛多到可以派街坊。果然人離鄉賤，居然被一條 SATA cable 收咗我皮，我真係無話可說。唯有死死地氣咁走去 ebay 買翻條。$0.97 連運費，我極到懷疑佢係點運作... 郵費都蝕埋俾我，唔通佢係透過 ebay 買家資訊去收集個人資料？

真‧香港地

如果我同你講，我因為呢首歌而令自己有小小眼濕濕的感覺。會唔會覺得我有啲低能？

我，好自豪(我覺英文用 proud of 會比較貼切)我係香港人，呢個係自我身分/民族認同，唔需要啲國民教育，唔駛洗我腦，唔駛日日六點半播國民教育廣告而我都有o既認同感。

無論我係身處何地，我絕不害怕/害羞對別人講：I come from HK! I am from HK! 就好似啲西人會掛自己國家o既國旗一樣。係 proud of 自己國家或地方。人地點睇人地o既事，我就係我。就係要有自己o既立場。

我對前梁財爺對普通話教學極度不滿。我認為根本係本末倒置。我絕對讚成學普通話。但反對作為主流教學語言。你改變到唐詩係押普通話韻而唔押廣東話韻o既話，我就服！可唔可以俾啲真心建設香港的建議及方向。你老味，美國夠多唔同種族o既人，夠好多人唔係英文做母語啦，你會唔會要求人地用西班牙文、法文、德文、波蘭文、中文做主流教學語言呀？連搵個似樣啲o既理由都嫌費時。

人，真係要跳出圈外，睇嘢先會清楚。唔好 challenge 我點解要去海外工作。我就是我！啱聽好，唔啱聽好，我就係我，我知自己做緊咩。

期權開倉小紀綠 下月期權小操作之二 - 貳零壹柒年拾貳月

嘩，個巿有如江河缺堤般奔流。熔斷機制有幾廢我唔識評論，我只知道香梘金魚缸又再一次發揮作用，被人用嚟套現。。。我諗大戶好有可能會將資金搬翻嚟香梘金魚缸。你諗下，賭場同你講我呢期賠錢賠得多，啲籌碼無得 cash out 住，你仲玩唔玩？

見個巿跌到咁，再手痕做多張

11 Jan SP HKB55.0 即月@0.9 x2 收期權金 720

睇嚟之前做嗰張 SP HKB57.5 即月 坐多陣，可能真係要見好即收。

期權開倉小紀錄 下期權小操作 - 貳零壹柒年拾貳月

見個巿跌成咁，又係開倉o既時候。當然，正股輪緊錢就有動力去做下對沖。

7 Jan SP HKG57.5 即月@1.28 x2 收期權金 1,024
7 Jan SP HKG55.0 下月@1.00 x2 收期權金 800
7 Jan SP XBC3.20 下月@0.13 x5 收期權金 650

但當日原來已經跌得更深，啲 option 即買即蝕。唯有坐下等佢蒸發下啲時間值。
仲有，我都覺得下次唔好貪心，應該即月做遠啲，做 55 蚊，下月就做返近小小先叫做正路。

期權開倉小紀錄 下月時期權小操作 - 貳零壹柒年拾壹月

此文是補回之作。
話說十一月之時，可能個巿o既波幅唔大，所以 short put short call HKB 都無咩肉食，咁唯有唔做即月做下月食多小小時間值。

9 Nov SC HKB65 下月@0.55 x2 收期權金 440

本想十二月都 keep 住做，點知係太無肉食，做都費時做。

海外接聽香港電話、漫遊

小弟身在海外工作，又唔想取消一直擁有多年的電話號碼，所以一直都保留住。家陣我係用緊中x動的 HKD$38 月費計劃，無隧道費，300 min. 有齊飛線同留言。仲取消埋個 data service，避免不慎咁用咗上網而自己唔知。我估差唔多係最簡易而又相對較平o既方法。我知道有啲人會話，轉去做儲值卡，跟手 keep 住增值去 keep 住個 number，但我怕自己大頭蝦，唔記得增值而導致儲卡失效而無咗個 number，所以唔搞到咁覆雜。

之後，我再將本來係 fixed line o既家居電話 number 轉埋做 ip phone，我就用緊一間叫 comnet o既公司，因為家陣香港固網都可以帶 number 轉台，我就係咁轉咗去 comnet，佢個 plan 唔貴，只係 HKD25 一個月，你就可以利用 SIP app 或者自買個 ip phone 或者 voice gateway 去 connect 翻去 comnet 個 sip server，以香港電話 number 去打出咁打入。

我就利用 mobile 個飛線，飛去個 comnet number 度，咁就唔駛額外用漫遊o既高昂收費去接同打香港o既 call。

不過，我接o既 call 達到百分之九十九都係廣告。即使我成日強調打我香港 number 依然搵到我，但基本上都係無親友打俾我。。。我都好懷疑自己 keep 個 number 係唔係有啲嘥錢。。。

仲有一樣嘢，就係忙音飛線。即係你見有人打電話嚟，唔想聽就襟收線嗰 button。但如果你係漫遊緊咁就要小心，因為如果你漫遊期間去做忙音飛線，佢係會當作漫遊通話，你之後就會收到小小震撼o既帳單。但係身在海外係仍然可以更改你的飛線設定，係唔駛錢的。所以我建議私人電話漫遊時，取消所有飛線設定或者轉做 unconditional forwarding，即係唔理三七廿一直飛某個 number，避免不必要的漫遊收費。

月平息 (flat rate) vs. 年利率 vs. 實際年利率 (APR)

相信很多香梘人都會收好多廣告電話。小弟亦唔例外。可能有人即刻會問，喂，你家陣身在海外工作，收咩廣告電話？如果接，你咪用緊漫游？為咗增加我 blog o既文章，我會開另一篇介我自己現時o既做法。

我唔可以話好鍾意接廣告電話，但呢個亦係一個好機會去感受下巿場氣氛、自己個 credit 如何？

話說小弟尋日收到渣兜打嚟，問我借唔借錢，本來都想收佢線，但見佢係銀行，又噏得出自個寶號，又咁有誠意叫我聽下，咪就聽下做到幾多厘。開價價廿叁萬，咩鬼嘢都唔駛，只要你話要就得喇。月平息 0.11%，佢話個實際年利率係 2.6x%，分 48 期，每月還 5044。其實又真係唔貴喎，你一般銀行做 P land 都做緊 6 到 7 厘。家陣呢個數只係比我當年按息貴半厘。用得其所又真係借得過呀，不過最衰就係未有諗到用途住。。。銀行就係咁，當通街都係錢就問你借唔借，又平又靚；當你需要錢嗰時就，又貴又借唔足。係咁 x 街o架喎。

好喇，我估好多人都知道勁多網站有月平息轉實際年利率計算器。但我為咗 remind 我自己，所以特此一文以說明之，有緣人又可以一看無妨。

所謂月平息，意思即係每期o既每一期(即每月)個利息金額都一樣。俾如借入本金為 $120，月平息 5%，即係每月利息為 $120 x 5% = $6。如果以一年期計，每月還款額為 本金 $10 ( 120 除以 12 期 ) + 利息 $6 ( 120 x 5% ) = $16。

以 230,000 計，月平息 0.11%，全期為 48 個月，即係：

P = 230,000
I (monthly) = 230,000 x 0.11% = 253
Installment = 230,000/48 + 253 = 5044.67
Interest total = 253 x 48 = 12,144

年利率為 12,144/230,000/4 = 1.32%，但呢個只係讀書時學到o既 simple interest rate。原因係呢個計法係無 consider 到你每月還款中，除咗還利息，仲有還本金。意思即係你每一期欠銀行個本金總額係不斷變小。留意翻，雖然本金係越來越細，但因為月平息的關係，利息開支係由一開始就定額不變，故每月實際個息率係每月都變緊，應該話，越到後期，你個實際月息係越貴。我上網搵咗好耐都搵唔到點樣將個月平息用自己計算o既方法去做翻實際年利率。只可以利用 excel 去幫助一下。唉，啲數學知識一早還翻俾老師。

首先，係要利用 excel 中 rate() 呢個 function。

=rate(Nper,Pmt,Pv)
Nper = 總共期數 = 48
Pmt = 每期還款額 = -5044.67
Pv = 現值(即借入金額) = 230,000

由於係借貸，所以 Pmt 我會視為負數。

=rate(48,-5044.67,230,000) = 0.2120%

未完o架，呢個只係實際月息，有人就咁將 0.2120% x 12 = 2.544 就收隊。但咁唔係好正確，我暫時諗唔到點解釋，希望有人可以留個言指點下。我只知道條數應該要用複息計算，即 compound interest rate：

實際年利率 = (1 + r)^t - 1
r = 實際月息 = 0.2120%
t = 一年還息次數 = 12

= ( 1 + 0.2120% )^12 -1 = 2.5738%

即大概為 2.57%，亦 match 翻好多網站或者銀行網頁所謂o既計算機條數。

無論你有無借錢都好，你都好應該要識計數呢，唔係人地話咩俾你聽就受咗佢算數。你唔好同我講連條數係點計都唔知就孭條數翻嚟。

其實，香港銀行做按揭算係幾簡單合理，單利率每月還款，都好合理同公平。怪不得以前啲人咁易透過買樓去做到財務自由。因為佢可以用最平o既利息去做到好大摃扞。當然喇，都要食正個樓巿升浪，唔係都一樣係蝕錢o既。但相對借錢炒股票，你覺得邊樣借得大啲？邊樣借得平啲？至於樓定股好搵o的？我真係俾唔到答案你囉。。。

德國網購之後續及 HP Gen8 Microserver NAS - 一波幾折

好喇，見到個 tracking number 話 out for delivery，滿心歡喜以為到咗家姐屋企。然後懷著興奮愉快o既心情回家去。

點知一開門，咦，我啲寶貝呢？

再細問才知道原來早排落大雪，郵差只係貼張紙仔喺門口就走咗去，要你自己去拎。唉，當日係 31/12 的下午六點，明天係 new year。即係要等到星期六先有得拎。

等到星期六，去到郵局，千辛萬苦都等到喇，個箱勁大個，大到我覺得可以裝 3 到 4 個成年人入去無問題。唯有即場拆箱將寶貝放入車尾箱。

話說之前因為有 USD$50 蚊coupon，買咗兩個熊貓銀幣，我其實仲有買咗一條 floopy 轉 SATA 電源預備玩部 NAS。

到星期日終於有時間可以拆箱，先發現自己無帶條 floopy 轉SATA 電源線返家姐度。又無 micro SD 係身，即係又無得裝個 OS，只可以著下部機，試下個 iLO4 個 advance serial number work 唔 work (價值人民5 蚊，淘寶買)。玩咗一陣又熄機。