發噏瘋 - 我看陳同佳案

話說早排有個香梘人涉嫌喺寶島將佢當時o既女朋友變成非自然死亡，案件就當然轟動社會。而就香江驚慌而言，因為案件涉及境外司法管轄權，所以未就非自然死亡一事搜集足夠証據提出檢控，只能就洗黑錢一事作出檢控。

涉事人服刑及刑滿出獄，又再次引起社會熱議。

我無意在此作道德或良心批判應否去台自首。但就事件想提出兩三個思考點：
一、佢係'去'寶島自首，唔係'回'台自首。我覺得有必要搞清楚個 home base 係喺香梘，唔係寶島。此其一。
二、自願去寶島自首，個人覺得非常唔合符人性，好簡單，你明知一去就會被人關禁，而你係有選擇地唔離開香梘，我完全睇唔出有咩誘因要出國去寶島。我無讀心理學或者犯罪學，唔知涉事人心理狀況如何。我只知唔去係好正常，更何況係合法地有得揀。所以你話佢自願去寶島自首，我 唔 信 ！
三、合法性。成日都話法治社會，人地有權合法唔離開香梘o架大佬。你香梘未能提出檢控係你問題，你無輸打贏要o架喎。你可以話呢個係漏洞，係，但係係無辦法的。你無可能押佢去寶島o架喎，呢個係邏輯問題。如果你硬要以道德/良心o既批判要覺得涉事人一定要去寶島的話。其實同批鬥無咩分別。

呢個係我睇法，當然我知好多人會唔認同。我都歡迎討論一下。

貳零壹玖年送逃犯引渡條例修定之風波有感之種子

內地官方媒體以及通訊 filter 訊息及新聞，習以為常，但並不認同。
內地同胞惡意攻，失實評論，說三道四，盲目支持不義，我感可悲。

如要先要評論香港現況，我諗可以先了解一下香港呢個歷史遺留下來o既特殊地方，官人再各自思考思考。

簡單而言，本屬廣東新安縣的香港(Hong Kong)，
因南京條約，香港島(Hong Kong Island)被永久割讓給英國政府
因北京條約，九龍半島(Kowloon)，即界限街以南被永久割讓給英國政府
因拓展香港界址專條，新界(New Territories)及離島(Islands)租借給英國政府，即所界限街以北，深圳河以南以及附近近二百個島嶼都租借給英國政府九十九年。

自此，香港o既發展就同中國內地分道揚鑣。

在此，我有三點想提出嚟，比大家思考下，亦都係好多時連香港人自己都唔清楚或者唔知道o既背景。
一、九龍城寨/九龍寨城。寨城o既出現，就係基於拓展香港界址專條中，涉及部分係租借，並非割讓，即擁有權仍然屬於當時o既清朝政府。所以清政就係當時o既邊界，亦即九龍寨城、啟德附近設立海關以及駐防，以示管轄及主權範圍。英國人又尊重合約精神，未敢直接管治九龍城一帶，故出現三不管的九龍寨城這特殊地方。此乃香港近代史的重要一環，有興趣者實應該多加研究以及查証。
二、南京條約，北京條約與及拓展香港界址專條三者都在中華民國國立故宮博物院。如果說是要回歸，那，應該是回歸去哪一個政權？
三、亦因九十九年大限，界限街以北、新界以為離島o既土地擁有權將接近九七大限，故商界，銀行，地產商同當時港英政府反映憂慮，故有所謂香港前途談判出現。而結果係不單將新界及離島交回中國，同時亦無條件的將已割讓的港島及九龍半島送交中國。原因係英國覺得無險可守，如中國硬出兵武力收復整個香港的話，英軍於港島與及九龍半島的死守最終都會失敗，加上日不落帝國風光不再，決定將最後一個英國殖民地結束。

點解當年香港從殖民地走出來但又無獨立呢？有前因的，英美同中國有 deal，令到香港同澳門喺聯國中剔除於殖民地之列，導致日後無獨立出現。

而香港回歸中國而非中華民國亦係英美同有分參與的 deal。

某程度上，香港就係名不正言不順的回歸中國。我不會不承認回歸這回事，畢竟這是改變不了的事實，亦係英美中國合謀出來的事實，我提出，只係想大家認清史實同背景。

至於香港回歸後的狀況，有目共睹，不贅。

我會認為香港人不滿中國內地，此乃種子。

有趣分享，我都係再次查找香港近代史先明白新界(N.T.)何解叫新界，其實就係源自拓展香港界址專條。新界原來係一個形容詞，並唔係一個地名或區域o既名，身為一個生於香港o既香港仔都係今日先明白，實在失禮。

發噏瘋 - 尚在人間

很久不見了，差不多都五個月無 update。其實呢半年好多嘢可以 share，但弊在小弟好懶，連打個字都懶。所以就無更新。

港股期權呢幾個月做咗好少嘢，但勝在都叫做正數，其實應該堅持繼續做下。同埋呢，一通期權呢，唔好以為裸 short 期結要行駛嗰時夠錢就大安指意。原來佢係要收手繼費o架！真係親歷其境先深刻，下次就知要醒水，寧願平咗佢都無咁多駛費。

美股方便，

TLSA 跌完起翻又再跌翻，反正我無再持有，幾個一明朗因素：

• 身邊有人入去 Tesla 做咗一陣就走翻出嚟，睇嚟入邊工作環境都幾 tough。
• 上海有 Telsa 會自爆
• 運量未及早前吹大咗o既數量
• 身邊有好多 Model 3 準買家話等咗兩年都無佢想要嗰個 trim，焗買高配準嗰款。

NVDA 亦止蝕咗，cryptocurrency bubble 爆破。

完成兩項止蝕後，年頭 -18%。跟住喺 $17x加注 AAPL，尋日睇翻，成個 account 居然+2%。多謝 AMZN 呢隻好股。繼續持有 AAPL，AMZN，BRK.B，GOOG。

期間亦去咗昆山出trip，一去都去咗三個幾禮拜。

想考個電工牌。

Python 個小 project 叫做完成咗七成，當中又有嘢學到。

錢呀，好想搵多啲錢呀。

八字

話說小弟久唔久就睇下自己八字同強行研究一翻。

自己本身屬木就一早都知，以為水生木，戴眼鏡戴翻啲水屬性顏色就包無走雞喇。點知近來一查先發現自己原來最缺係火，所以戴紅色o既嘢補補啲火都不足為過。唔駛死捉住黑色眼鏡唔放。。。

同埋特此記地十天干同十二地支去提醒自己，成鬼日都背唔到。。。

十天干：甲乙丙丁戊己庚辛壬癸
十二地支：子丑寅卯辰巳午未申酉戌亥

讀音：壬(吟)癸(季)寅(人)卯(牡)巳(嗣)戌(蟀)亥(害)

甲	乙	丙	丁	戊	己	庚	辛	壬	癸
木	木	火	火	土	土	金	金	水	水
陽	陰	陽	陰	陽	陰	陽	陰	陽	陰

木生火	火生土	土生金	金生水	水生木
木克土	土克水	水克火	火克金	金克木

生我者為印(正印,偏印),我生者食傷(傷官,食神),剋我者官殺(正官,七殺),我剋者為財(正財,偏財),比和者比劫(劫財,比肩)

發噏瘋 - 流行曲

近年廣東話流行曲有每況越下o既情況，原因有啲似雞同雞蛋問題。

小弟其實一般都聽歌唔揀人聽，即係聽個音同旋律，覺得啱聽就會聽，未必有深究歌詞意思。不過好多時係聽舊歌比較多。但原來有啲朗朗上口o既歌，如果細心留意歌詞，即使係李克勤，亦有啲意識大膽或者過界o既歌。歌，有時候真係唔可以亂唱，真係要情願拘謹似君子。

發噏瘋 - 忽發奇想之 PPL

其實都唔係奇想嘅，只係花費嘅金額有啲多姐，又未致於遙不可及嘅。

其實係我突然海鮮痕想考私人飛機牌。你問我係唔係對飛行好大興趣呢？又未必係好大，但就係想試下，想做一啲常人唔多人做嘅事情，又想睇下考咗個 PPL 對我日後生活有無正面影響。

唔知最終會唔會做呢。

發噏瘋 - 追劇

奇幻嘅故事總教人想一直追看落去，所以追劇一開始咗就一直想追到睇完為止，但如果追完套劇又會有失落感，做人真係好矛盾。

我幾時先得閒睇埋 west world season 2 呢。。。

發噏瘋 - 牛一

老撚套，我唔明公司點解要將人o既 private information 公佈出嚟？

你話係十月之星咪算喇，點解要公開 exactly 個日期先？有無問過我想唔想公開我私人資料？

發噏瘋 - 孤獨的 python 新手 - Metra alert message + Python + Telegram bot

以前睇過啲疑似成功人士o既分享。佢地話，要成為成功人士o既首要條件，係要克服孤獨感。而我理解為習慣孤獨感。

又有個小故事同大家分享。

話說小弟家陣要日日坐火車。oh, wait a minute, to be precise，係差不多日日搭火車先啱，因為有時我係會揸車返工，正所謂：有得揀，先至係老闆。但我選擇揸車而唔坐火車有三個可能性，一、有需要，可能要早走或者放工後要去別處，無車返唔到屋企；二、火車 delay，因為未上前已知道火車 delay 的話，我會選擇直接開車返工而費事同佢癲，呢度塞火車唔係人咁品。早兩日就因為突然 severe thunderstorm 吹冧咗棵樹，downed tree on track。咁我就坐咗喺架火車度三粒鍾。。。五點十分上車，八點半先返到屋企。痴線。。。三、心情唔好，係呀，心情唔就要開車去舒緩一下情緒。

由於火車會因種不同原因 delay，咁你係要周不時去火車公司個網頁去留意佢有咩資訊發佈，了解下發生咩事。其實你上咗火車之後，了解嚟都無咩叉用，就好似肉隨砧板上咁，無埋站你係落唔到車。你啲資訊好多時都話你聽 delay duration 係 unknown。同埋即使話過你聽 delay 10min.，過咗廿分鐘後佢可以出個 update 話要 delay 15min.。但明明過左廿分鐘，你先話會 delay 15min. 咁即係講嚟都多餘喇都唔準。同時又即係好似隧道啲廣播一樣，話你知隧道內交通暢通或者交通擠塞一樣：我開緊車，唔通我唔知道佢係擠塞定暢通咩？你話咗知擠塞對事情都無咩幫助o架啦，唔通你話咗我知會即刻暢通翻？唔會吖嘛！嗱，講翻正題，為咗係上火車前了解下火車有無已經 delay，你可以選擇去 metrarail.com 去睇下有無咩 alert message。但我成日都好討厭喺電話度睇網頁，加上佢個網又多 script，load 起上嚟好L慢，所以萌生起一個想法，我可唔可以寫個小 program 去淨係 capture 佢 alert message 啲訊息然後再 send 個 notification 俾自己呢？咁就開始咗我呢個 programming 小 project。

呢次我就係用 python。貪佢簡單易學多 api 同埋古天樂名曲—今期流行。整整下，就變由原本諗住每隔十五分鐘 check 一下，如果有新嘢就通知我，變成我要去 trigger 一下先去睇下有無更新。因為個做法好似會容易啲同埋實際啲，你諗下，好多時都係你去緊坐火車嗰時，即返工放工嗰下，同埋，坐緊嗰下想睇下有無 alert，其餘時間話之你停駛都唔關我事，無謂不斷 polling 即係垃圾訊息。所以方式就改變咗，跟手就再 twist 到利 telegram 去做呢個 solution。

玩咗三個禮拜，終於叫做搞掂用得。

做完之後就好似好失落唔知做咩好。分享俾人聽都好似無人想聽、聽得明或者覺得有興趣咁。就連寫 program 遇到困難想問下有咩 approach 去解決好都好似同樹洞講嘢咁，無人想/識/有經驗去答你。唉，感覺好孤單，好似呢個世界都無呢個需要，只係自己多多事幹，嫌三嫌四o既廢中(頹廢中年)咁。。。

今次都有啲得著。
一、就係需求主導，當你有嘢覺得唔方便，而你又有心想解決，就會有動力想去整啲嘢，就算唔識都會學到識。漫無目的無 mission 去學一樣但又無用的好飄渺，好難學得好。
二、不斷修正，起初諗o既 idea 其實同成品係有啲偏差，係成個 methodology 唔同咗，因為現成有啲簡單啲o既 solution 而同時間做到差唔多o既效果，何樂而不為？
三、認清需求，諗真啲你想要啲咩，無論你所以的資訊、次數。
四、平台，我今次用咗 telegram，係因為我有，加上網路上啲人又話好易整個 telegram o既 bot，所以就揀咗佢。但後來發現，原來 telegram 無我想像中流行，周圍問人十個先得一兩個有用 telegram，好彩唔係用嚟搵錢，唔係就中伏了。

成個小 project 完成後，發個成個過程終都係自己搞掂，做完又係自己用，感覺好很宅。。。即刻有莫名o既孤獨感。為咗要成為成功人士，就等我慢慢習慣佢啦。(白痴，咁呢個世界上大把成功人士啦)

下次有機會介紹下用 python 加 telegram bot 去做到我想要O既 message alert。

廢噏完畢。

發噏瘋 - 講普通話啲人聰明啲？

真實故事，非道聽途說。

話說小弟的一位姨甥升上芝加哥一間 L 字頭的私立大學，今學期選修了一科中文科。老美o既中文科好顯然會多數由一些以國內普通話拼音名字的人授課。根據姨甥所述，那授課的人出言道，懂中文，講廣東話但唔識講普通話是比較蠢的。

我聽到就即是無名火起，尤其我呢啲近年突然香港意識強烈o既中年人。

我即係同我老婆講，屌，咁撚巴閉，走嚟美國教書替死呀，返去建設祖國喇。

早兩日再去搵去佢個貴寶號，睇下佢有咩優質論文或文章發表，點知咩都搵唔到。連 ext. no. 都無個，實在有點令人奧惱。

我一般都唔鍾意主動挑起事端，正所謂，對人以寬，律己以嚴。我呢次我實在抵唔住頸。各方各地文化各有差異，有長有短，多點欣賞或理解差異o既因由，而唔係純粹把現像作出非黑即白分類。唔通你呢個授課人員仆街我就話成間大學啲人都係仆街咩？唔係吖嘛！講嘢都唔撚科學。

認識語言係認識一地方文化的重要元素，如果你硬要吹噓自己因為講普通而自覺比別人優勝或聰明的話，我會為你同要上你課的莘莘學子感到好可悲。

高錕教授

高錕教授，一位值得人專敬的學人以及科學家。

關於高錕教授的成就或佚事，相信近日有看報紙的人都會看到如繁星多而又美麗的報導。相信都無用小弟多說，亦不敢班門弄斧。

只係想在自己的地方，公開o既平台，發表一下自己的感受。

雖然我專稱高錕先生為高教授，但我不是他的學生，亦不是畢業於中大，但我覺得高教授作為一個學人，專稱一聲高教授實不為過，亦叫做表達我對高教授的教育成就專敬。

而跟高教授於生命中有著一刹那的交匯o既故事係咁o既：

話說小弟有幸曾經於香港一家晶片設計公司工作，於某一年的周年晚飯場合中遇見了高錕教授。當年，高教授為那家晶片設計公司的非執行董事之一，故有緣於周年晚飯遇見。

心想，嘩，名人呀，公司有呢位學人/科學家做公司董事，好犀利吖。當年只知高教授就係那位發明利用光纖作通訊用途的人，但都已經覺得佢勁到爆炸。唔知點解，突然間有個衝動想同呢位好犀利o既學人合照一張。

雖知道，我本人並不追星，亦對跟明星拍照威威呢鋪癮沒有興趣，甚致乎對所謂支持你的偶像去什麼演唱會吖買什麼什麼照片呀視為白痴行為。但唯獨高教授，我覺得好想好想跟高教授來一個合照。

就食到半路中途，見到高教授在阡陌席間出現，看似要離開晚宴。小弟立馬捉住個同事：喂，你係唔係有部相機喺身？幫我同高錕影張相吖。佢反應係呆一呆，覺得人地肯唔肯同你影呀？當刻我本著小弟很薄的面皮，鼓起勇氣，走上席間向高教授問道：高教授，我可唔可以同你一齊影張相呀？高教授很和善咁回答可以。咁我就叫同事快啲幫我影相。影完相之後，佢仲問我係公司做咩？係唔係讀中大？讀咩學科？咁我都一一回答。高教授雖然反應不算得快，但語氣和善，半點架子也沒有。跟住就同高教授握手言謝。面紅耳熱，個心仍然跳得好快。

此事乃小弟懂性至今，唯一一張與名人的一張合照。

後來返到公司發現，同事相機居然用了一個超低o既解像模式去同我拍照，佢o既解釋係：唓，公司用機，平時影 FA 嘢，求其唔駛咁靚o架嘛，無為意咪無轉番高像素囉。我即時差啲激到暈咗。如果我即係返睇過張相，我一定會再影過，張相像數低，白平衡又錯晒，真係 no good.

世事往往就係咁，總係有啲遺憾。

之後喺港台一個電視節目，先叫做比較多一點認識高錕教授，先知道原來佢o既成就係咁犀利，慢慢再知道原來高教受o既為人同情操都好好添。但好不幸，高教授患上了腦退化症，亦即謂老人痴呆。個心即時呆咗一呆，同埋個心酸咗一下。

因為高教授，我曾經想過去中大讀個 master，但最後都無成事。

高教授太太亦成立咗一個基金，一方面支持為研究腦退化症，一方面支援腦退化症病人及家屬，久不久就見到一架由貨車改裝為宣傳車經過中大或科學園附近，有大大個高教授o既肖像。每次見到個心都酸一酸，嘆天意弄人。

於上星期日早上的 Twitter 看到高教授離開人世的消息，實心情沉重，對高教授退休後選擇香港作為他渡過晚年到離世，為的只是想為香港作出多小貢獻，實令人感動。

願這位偉大的學人和發明家安息。

發噏瘋 - 佛系找數

話說早排(係好很早一排)，應承咗網友交出節目錄音，但一拖再拖，實屬無地自容，直頭係 chat room 都唔敢多加發言，因為自知走數理虧。
好喇，星期六早上突然全屋無人，實為錄音大好時機，快快的錄有個音出個 session 當係 warn up 好找數好，咩都好，總之就，做咗件事，交住數先。

notes 打好，自以為自己會臨場發揮， elaborate 一下，令內容豐富啲完整啲，點知講嘢時會腦塞，被來電打亂，加上家人抵家，故草草了結。

睇嚟下一次都要 plan 好啲先。

發噏瘋 - 說明書

其實大家件新玩具返嚟，或者想做啲 DIY，有幾多人會第一時間睇說明書？其實說明書有晒一件產品o既介紹同使用說明。只要跟啱步驟，產品理應做到預期效果。

身為一個工程師，我梗係會睇說明書，仲要係好鍾意睇添。因為說明書o既嚴謹同細緻程度可以顯示到公司或者產品o既品質。

平身最怕遇到一啲頑固，唔識，但又唔跟說明/指引o既人。最終，產品或成果不如預期實屬正常，而事主多數都係賴件產品唔得。。。

想學習用 Python 分析/選股

話難好似唔難，話易又好似唔易，我o既目標係想要用一啲 technical analysis 的 tools，做 back test 去揀股。

一個人去學去試又無人問又好似搵唔到啲教學提示真係好痛苦，好孤獨。

發噏瘋 - 晶片

作為一個曾經喺半導體行業打過工o既的一個工程師嚟講，我對香港o既傳媒，包括網上文字或影像評論以及報章o既評論中，提到芯片一字，實在十分討厭。

廿年前，當內地資訊科技仲未好發達o既年代，喺香港，Chip 被翻譯為晶片，而 Chipset 為晶片組，或許是跟了台灣的譯法。

叫得晶片，就當然有其原因。雖知道所謂的 Chip 其實係指以 Wafer(晶圓，一塊圓形的超高純度的結晶矽片)做基礎，把電路以不同物料刻蝕(印)在晶圓上，而這個刻蝕的動作係多於一層，以唔同物料的接駁(相接觸或重疊)去模擬電阻、電容 Op Amp，甚至乎一大塊 PCBA 的電路都可以透這個方法縮小在一粒比米還要細的 Chip 上面。

點解叫做晶片？因為晶圓上唔係刻蝕咗一個電路，係刻蝕咗成千個相同的電路於同一晶圓上。至於可以有幾多粒？無一定答案，要視乎代工廠生產技術(或者叫做製程，包括晶圓大小以及最細電晶體的大小)，同埋你個 circuit 既複雜程度。簡單啲同形象化一啲，你就當喺一個圓餅睇下切到幾多個小正方形或小長方形o既餅仔出嚟。當晶圓刻蝕好之後，做好後工序(如需要的話，gold-bumping, back grinding)，就會將晶圓按 IC 的大小切做一粒粒，再按需要進行封裝或直接使用，固叫做晶片(被切做一片片)。

不知何時何日，香港o既媒體跟了內地的叫法：芯片。我當然知道咩係芯片喇，只係唔鍾意咁叫之嘛。早排中興單嘢，咩中美科技貿易戰，嗰嗰電台、網上啲時事評論(述)員都紛紛參了一把，好有'深'度咁解釋中國晶片行業如何不滯云云。最好笑的，連名詞都未攪清楚，更惶請佢會介紹到俾普羅大眾知道半導體行業其實有幾複雜同製造門檻有幾高。仲有就係呢個行業玩 fabless design 呢種模式都未必人人都明白：你設計唔等如你製造，佢製造唔等如佢擁有。

都係嗰句，希望香港做高科技產業實在太難，唔係無人，係無人肯燒錢做 R&D，加上週邊無相應該生產工廠，咁啲人做咩唔去大陸或台灣搞呢？

收放自如 - 咖啡

我要飲就飲，我要唔飲就唔飲！

家陣返工晨咁早，五點十分就要起身。唔夠瞓似乎係常態。

小弟其實平身最怕唔夠瞓，同我一齊住過 hall o既老死就知，我一唔夠瞓就燥到無朋友。加上，如果返工無咩嘢做的話，即使係睇 online course，都會好易恰著，所以就用咖啡提提神，慎防釣魚。

雖然我唔係咩咖啡師，更加唔會一索就知係邊樹嚟o既咖啡豆，但都有丁點的口味偏好。奈何，喺家陣間公司，就俾我遇到平身飲過最難飲o既咖啡。你可能會講，喂，啲咖啡唔新鮮，煲咗好差耐，唔好飲係正常o架喎。咁我咪動手 brew 一壼新鮮o架囉。挑，一樣咁難飲。又苦又澀，有色又無味，真係曠世奇啡！

咁我自帶私伙o既即沖咖啡囉，飛沙走奶，仲驚死蝕底咁，人地落兩茶匙，我落兩大湯匙，目的係想攝取多啲咖因以防眼瞓。起初無咩問題，點知二個星期後就開始頭痛，仲要係固定朝早八點幾鐘就開始痛，下午放工就無事，痛到有啲失平衡o既感覺，有時頂唔浦仲要食止痛藥頂一下。思前想後，如此定時的頭痛，肯 L 定係同公司有關！排除風水、電磁波等等啲似是而非o既原因後，估計係因為攝取咗太多咖啡因而引起頭痛。

所以，就即時停飲咖啡睇下有無幫助，順便測試一下有無咖啡上癮。

如是者，無飲兩星期，果然無再頭痛。同時間，亦唔覺得自己有上癮或者戒斷症狀。

其實我日日都仲有 keep 住飲綠茶，聽講綠茶o既咖啡因都唔小，唔知真定假。

Anyway，等此一記。

發噏瘋 - 無形

時間 記憶

當無形遇上無形 一切 都變得不留痕跡。

尖卡

Dream Car

如果你問我，我心目中o既 Dream Car 係咩，我諗呢個問題都幾難答。
第一，我個人有選擇困難症，成日都覺得 opportunity cost 好貴，攪到做唔到決定。
第二，我呢啲窮人，到家陣都未試過買新車，又無咩試過揸其他車，實在比較唔到，齋吹話一架車好定唔好，實在無咩意思。
第三，性格使然，太多人鍾意o既嘢或者太多人有o既嘢，我就會由鍾意變成唔鍾意。而好多時我鍾意o既嘢都會有啲(或者不小)o既缺點。

不過，都想分享下我自己鍾意啲咩車。

因為香港係右軚o既關係，美國品牌完全喺我心目中建立唔到形象。唔係話佢唔好(其實我都唔知佢係好定唔好)，當然佢有有好多代表作，例如 Corvette、Mustang、GT 等等。只係習慣上佢唔係我杯茶。韓國近年都有不少車，不過都唔會係我心水。

日本車呢，感覺都係實用性高一啲(即係平嘢啦)。你可以話，喂，你識唔識嘢架，家陣 GTR 同 NSX 二手隨時都過百萬港幣呀師傅。哪有錢，你老母。日本車，香港人點會熟呀！？對唔住，應該話我呢個又窮但又鍾意睇車o既香梘仔點會唔熟呀？要數大把車數得出喇。但要去到 Dream Car 嗰種層次，仲未到。

你話我崇洋都好，我心目中o既'尖卡'的確全部係歐洲車。但我心目中o既尖卡又唔會去到遙不可及o既地步，因為，太遙遠只會打擊自信，比如我唔會話我心目中o既 Dream Car 係 Bugatti 或者 Pagani 之類，連林保我都覺得有啲窄窄地。。。問題係，唔 practical，咩叫唔 practical？等如你唔會將自己個目標 set 做李嘉誠囉。。。你接唔接受到日日揸住佢周街走？無錯，嗰啲車係好撚夠霸氣，但變咗架車仲巴閉過我，功高蓋主，總之，係我 Carry 唔到架車喇，OK?

其實我o既 Dream Car 都係啲可觸及o既品牌o既。

Mercedes G-Class、Porsche 911 類 同埋 Lotus

G-Class 呢款車真係近幾年人大咗先開始鍾意。點解鍾意佢？一個字，型。咁多年嚟佢個款基本上無變過。呢款車最原本設計係軍用訂單，點知客人最終撻訂，攞出嚟賣巿場又受落喎。所以一直存活至今。佢未必係最好越野性能o既四驅車，但 G-Class 真係好撚型。

Porsche 911 類
我唔鍾意 Boxer、Cayenne、Cayman、Macan，因為太過成舊翻梘同埋太肉酸喇，我要有尾有成個保時捷線條的，所以 911 類係我o既 Dream car。呢個品牌，我真係喜歡咗好耐，點解話喜歡呢？因為我覺得呢個字比較含蓄，代表住我咁多年我對呢個品牌o既感覺。可能好多人覺得林保、法拉利等等大把車勁過佢。但我偏偏就係鍾意佢，唔係要係最大馬力、唔係要最快時速、唔係要最快加速，就係單純喜歡，就係咁簡單。記得細個第一次上網無幾耐，就係去 Porsche 個網頁 download wallpaper，嗰時覺得幾型，頂你，保時捷吖！雖然家陣無再出風冷新車，但我真係好想親身去試揸一下。

Lotus
其實呢，我對呢個品牌o既車款認識唔係好深，甚至乎佢連副引擎都係買豐田的。但，又係嗰句，我就係鍾意。聽講佢啲車係無冷氣又無風油軚。但我就係鍾意佢一個字，型。不過，聽講 Lotus 已經賣過幾次盤，由馬拉變成大陸老闆，睇嚟到我有能力嗰時佢可已經變得遙不可及了。。。

求

人就係好奇怪，無，就想要。

到你有嗰時，你又覺得唔係嗰會事或者不外如是。

求而不得的東西就像是最想要、最完美，根本係自我o既迷失。

真。香港地

我一般真係唔會貼歌詞，因為我覺得真係有啲小學雞。不過呢首歌我堅有感覺。

原曲：《香港地》，陳冠希
主唱：真‧ 河國榮 (feat. MC 仁)

同熱愛這片土地 大家刻骨銘記
愁或喜 生與死 也是香港地

對於呢個地方 我同你同一個同感
同一個諗法 我同你同一種人
雖然你有你忙 我有我忙 佢有佢忙
各有各行業 但係聽過同一首王傑

廣東道旁北京旁 啲喼塞爆同一個海港
大把小店接埋就係 我地呢一個香港

右邊有好多金行 左邊有好多藥房
面目全變 仲係唔係我哋嗰一個香港

經過幾多風暴啲樓價仍然屹立不倒
慈雲山下馬鞍山下依舊死做爛做
新機場唔再新 但係話想整多條跑道
舊車廂唔再用 但係新車廂有故障訊號

新路總 新報紙 新 TV 新主持
邊個話事我唔懂事 基本上唔再係白紙黑字
經過幾多清洗 真港仔仍然係真港仔
經過幾多瘋狼真港人仍然係真港人

＊同熱愛這片土地 大家刻骨銘記
愁或喜 生與死 也是香港地
同熱愛這片土地 大家一句到尾
由自己 生與死 也在香港地＊

(MC 仁)係得呢個地方出世 就預咗喺呢個地方道死
有人會痾到黃金遍地 搞到有陣黃金味
有人會睇到唔一樣 樣樣嘢怪塊土地
有人會屈人宿娼嫖妓 有人會選擇離地
有人會認為呢個係六八同九嘅問題
呢度嘅官員一齊吹水 點會居安思危
7 百萬隻螞蟻 唔容易走晒出嚟
向住同一個電視睇 一定會鍾意梁烈唯

係真香港人 當然會識英雄輝
係真香港人 可以睇埋同一篇潮文
你一崇拜馬雲 就表示你係第二種人
I rap the police I rap the government

跌得起輸得起 搵首歌笑下自己
真港人至叻 唔使靠人個個靠自己
唔怕攬住飛唔起 使乜要同人地比
要有定企 首先要企硬自己

Repeat＊