2012 Honda Accord 2.4L LX 換油記連精彩相片。

我都知成日都係得啲文字好鬼悶o架喇。呢次就加啲相喇。

由於我個人唔多鍾意 jack 起架車。所以就用個 ramp，包唔會札親自己。但又由於個 ramp 太斜/架車個 bumper 太低，要自制搭條木開上個 ramp 度先唔會刮底。。。

跟住就捐車底囉。原本有粒 nut 係 17mm，但我改裝咗加咗個 nipple 俾佢，方便我換油，佢叫 EZ-Valve，有興趣可以試下。

呢個就係我買佢o既原因，為可只要駁一條3/8" I.D.(即內直徑)o既膠管，你就會發現佢方便無比。。。

直落個舊筒度，唔駛滴到周圍喺呀師傅！
不過呢，換油隔都係避免唔到污糟。。。 

跟住就係入翻啲偈油入去，都係跟翻偈油蓋有寫 0W-20，我一般都買 Mobil1，實無走雞。成惠USD$23 5 qt.，油隔就用 M1-110/M1-110A。成惠好似 USD$8。我一般換油就順便換埋油隔，又唔係咩錢，無謂咁慳，油同油隔唔怕換得勤力啲。

另外我發現 transmission 底有滲油情況如下：

 再上網睇下，估計應該 transmission 出 intermediate axle 個油封滲漏，估計都應該自己換到，但似乎工程有啲大，所以等我再上網再入研究下先再算。

多謝收看。

Python - 學會了 data scraping

Data Scraping 意思指從網路上獲取數據，而我o既玩法差唔多係等如 WYSIWYG。

本來要用 browser 逐條 link click 入去先睇到，家陣原來啲 programming 好很方便，有齊晒 module 俾你 remote control 一個 browser 去瀏覽網站，繼而透過獲取返嚟o既 HTML 再做分析，只抽取有用的部分為己用。而當中有一個叫 Selenium o既 package，佢可以好有效咁抽取 HTML 中的某啲 element(s)，咁喺個 program 入邊做咩都得喇。

最過癮o既地方係，佢可以模擬返你瀏覽o既動作去 click，入 username 或者 password，針對動態改變o既內容網站就得心應手。如果只針對靜態網站，我估用 beautifulsoup 可能會仲快手啲。

我o既用途除咗想 scrap 吓 craigslist 之外，仲想 download 翻報紙啲文章留為己用。

真係比我整到個小 program 喎，好過癮。

轉台不似預期之陰魂不散

話說小弟兩個月前，即八月，由 Google Fi 轉台去 Walmart o既 FamilyMobile。以為大功告成，點知，佢原來八月轉台嗰時收咗我兩次錢。

第一次 charge 係由我 online 做 activation+transfer number 所引起的，但由於當時久久不能成功轉台，故我打去 CS 問佢搞咩兼再做一次轉台，咁佢就再 charge 多我一次月費，原來以為佢會自動取消第一次o既收費，或者順延一個月才 renew 個 prepiad plan，好顯然係我諗多咗喇。咁我咪又再一次打去 service hotline 去追討多 charge 的費用。由於我啲英文好水皮，第一時間就想同 CS 玩 chatbox 去搞 refund，可惜，逢係關於帳單，錢銀嘅都要你打去 CS hotline 度處理。好喇我硬住頭皮打去 CS。除咗我英文屎，仲有就係我肯定佢啲 CS 係印度人接聽，因為 FamilyMobile 啲 CS service 已經外判咗俾 Tracfone，出名地差。。。

好喇，第一次打去，佢話 check 唔到有 double charge 喎，叫我去 bank/credit card 度處理。。。唉，我 system 都睇到俾咗兩次錢，點會無 double charged 呢？但係佢死都唔同我處理，淨係識得叫我 contact bank…無功而還。

食完晚飯，心有不甘，再打去 CS 度問。咦，呢次呢個 CS 好好喎，佢都話見到同一個 number 同一金額 charge 咗兩次，佢都同意係收多咗錢，可以 refund。個心即時鬆一口氣，等佢個 system load 啲資料出嚟等到天荒地老。。。最後對埋個 credit card 最尾 4 個數字，就話 ok，等 3 至 5 business days 就會過數，咁我滿心歡喜咁等喇。

點知，等下一日，等下又一日，等咗成個幾禮拜都唔見到 refund 嘅？

如是者我又硬住頭皮咁又打多次去 CS hotline，又重覆一之成個 case 俾佢聽，呢2佢又一樣好順利喎，又係話見到同一 service number 同一金額 charge 咗兩次，同意 refund。又係同 credit card 尾 4 位 number，加一陣佢 load system 嘅時間，3就話 ok 啦，又係 3 到 5 business day 先會過數，呢次仲俾埋 transcation number 我添，我亦問佢有個 case number 等我有喵問題可以 reference 或者 follow，佢就話無開 case number，因為都做咗 refund, problem solved，所以無 case number。佢話有問題就再打去 hotline，有 record 喎。好啦，無奈地停多佢一次喇。

今日，我終於係 myfamilymobile.com 見到個 refund record，同時間，credit card 都終於出現咗個 $56.xx 嘅 credit。

睇嚟，我又可以準備搵 plan 轉了。

NAS 升級 - HP Microserver Gen 8 CPU upgrade

其實呢篇係補完，CPU upgrade 喺上年己經搞掂，不過都想呃個 post 做個紀錄。

話說上年十月臨回鄉探親時，去淘寶買粒舊 U，佢就係 Xeon E3-1220L。用得 Xeon，就梗係放入我部親愛的 microserver。部 microserver 原本係一粒 Celeron。網上好多人有教學講點 upgrade 個 CPU。

升級o既選擇要點係
- FCLGA1155
- 低 TPW
- 唔駛換 heatsink / 唔駛加風扇
- 勁過 Celeron

其實網上好多人都介紹 Xeon E3-1265L v2 。但係佢實在有少少貴，所以最終買咗粒 E3-1220L。少咗o既係internal display。反正底板都有 display chip，所以就由得佢。粒 E3-1220L 話晒都 Xeon 系列，processing power 點都一定勁過 Celeron。雖然 clock rate 慢咗 0.1GHz，但 TDP 由 35W 跌到得 20W，Max Temp. 由 91 DegC 跌到得 77.5 DegC。2 HT 變做 4HT。

總體成個 upgrade 過程無咩難度，鬆 screws，拉出底板，拆甩個 heatsink，取出 CPU，放上新 CPU，加散熱膏，上翻 heatsink，推翻個底板入機，開機，確認 CPU，搞掂。

其實我都係手痕多過實際需要。。。

經濟循環 (內附影片解說中文版同英文版) 更新

經濟循環呢個學名我估絕大部分人都聽過，但你又有無諗過點解經濟係會循環呢？明明向上行緊，點解會有一日又會向翻下，而且啲人仲話有上就一定有落！呢個疑問其實都一直存在係我心中好 x 耐，點解有上就會有落先？

有一日突然心血來潮定唔知喺邊度俾我搵到一段 video，講關於經濟循環呢個理論。就清楚解釋點解會有循環o既出現。原來一切都源自於借貸。

段 video 雖然係普通話，但無咩北方嗆，好易聽，加上有動畫輔助，應該好易睇得明。好建議所有人都睇一次，明白多啲經濟活動係點運作，同埋你會發現點解銀行係萬惡之源百業之母(正確啲嚟講係借貸先啱)。

美國銀行開戶親身經歷

首先，我要講o既係，我嚴重違反咗個人中指╭∩╮（￣▽￣）╭∩╮，呀唔係，係宗旨先啱。以前講過，被人 reject 過信用卡就永不錄用，但我的確係食咗言，我係悔疚過好一陣子！但面對一張聽講係全城都話好o既信用卡我居然脆底咗。不過呢樣唔係今次要講o既重點，下次先講翻信用卡。

今次係想講講去銀行開個戶口，開一個 saving account。你就可能會問，唓，開個 saving 有咩特喇呀師傅。兄台且慢，此 saving 不同彼 saving。喺香港，你要開個 saving，雖然家陣都麻煩，左填右 check，但都好平常o既一件事，尤其你原來已係現有客戶，但美國好唔同。

喺美國，default 一般你話去銀行開 account 意思係開個 checking account，亦即香港o既 current account。無論你係用嚟做出糧戶口、開 check(cheque)、交費咩都好，一般都係用  checking account 搞掂。而 saving 一般係預你有入無出，個別銀行對 saving account 提款次數係有次數o既限制。以 魔跟大窿 銀行嚟計，一年限提六次咁大把，當然 saving 係有利息支付，但 checking 好多時都係無或者小到你唔會恨，仲好多時可能要你係咩 priority account 或者咩 premium account 先會有 checking account 利息。

今次我想去開 saving o既原因又係貪心囉，其實兩年前都食過呢款優惠一次，食完就取銷咗，兩年後佢又嚟優惠，咁我咪又食多次囉。原本係開戶 saving account，十日內存款萬五蚊美金，維持三個月， 就會有 $200 rebate，六個月內 account 要仲係 active，唔係佢會扣翻錢o架。但近來做個小更新，就係將金額從萬五提升到兩萬五蚊，rebate 就升到 $300，維持月數一樣。

見佢話  online 申請到，咪諗住 online apply 入 code 開戶啦，點知開嚟開去都去到最尾一個 step 搞唔掂。咁我咪又 online message CS 問發生咩事，諗住我都係現有客戶，開多個戶口應該簡單啲呱。佢話 confirm 唔到我o既 information，要落去 branch 開戶。心諗，你老味，都用緊你 service，又點 confirm 唔到我個人資料呀。

好喇，咁我星期六就去你 大窿銀行行個圈。個 banker 都好好態度，我表明來意，佢就好快同我坐底開戶。俾完 ID 同 credit card 做身分證明後(佢要兩個文件證明你個名，其中一個要有相，而 credit card 喺美國都可以用嚟證明你個名)，佢就同我開戶。誰不知，佢問下係唔係 citizen，我梗係唔係喇，佢就問我攞 green card，要 scan 做 record。佢話每逢開戶都要做一次，無辦法喎。如果佢講o既嘢係真，我就就明白點解我 online 開唔到。以小弟無根據o既估計，係由於我並非 citizen，每次開戶都會 check 你個 identity 一次；如果你係 citizen，check 過一次後就唔會再 check(我估)。顯然我又開戶唔成喇。

我上網睇翻，原來 花旗參銀行都有開戶優惠，普通戶口，唔駛 direct deposit，只要維持 $15K 喺戶口，就可以有 $400 rebate。反正都係 check 個人 information，睇嚟，呢個仲著數，反正都想喺唔同銀行開多個戶口，無必要將所有數字俾晒同一間銀行知道晒。仲有，之前學前輩講o既，按揭嗰間銀行同出糧間銀行最好分開，無必要俾佢知道你財務狀態。得閒就要做好準備。

美國火車泊車分享

唔知點解硬係唔鍾意用通勤二字。

話說小弟自從轉工之後，被迫愛上搭火車。而由住處去火車站當然要自己開十鬆分鐘車。而美國o既火車站就好好o既，有一個好大個 park lot 任你泊。雖然係任你泊，但，係要俾錢o既。正價為 USD$1.5 per day，泊到晚上十一點五十九分為止。

講到俾錢，佢都有幾個方法俾你揀。Pay per park 同 prepaid

Pay per park 佢有兩種玩法。

一、就係即場喺 ticketing machine 俾錢或者俾卡。每個 park lot 都有個 parking number。落車時要記得 parking number，然後喺 ticketing machine 輸入號碼，再入錢/碌卡，跟住就會出張飛俾你，而你就要留住張飛做俾咗錢o既證明。萬一有條矒柄無神神抄咗你牌，都可以攞住想 receipt 做上訴證據。不過部 machine 就唔食 penny，最細都要入 quarter。。。即係清唔到啲碎銀。(其實去超巿啲自助 machine 咪可以清晒啲碎銀囉！)

二、就係用 app，家陣廿一世紀，用 app 俾錢好平常，用 app 俾 parking 亦屬方便，只要記得你泊車個 zone 係咩號碼，每個站都有個 zone number，除咗要入 zone number，當然要入翻你個 parking number 喇，再喺 app 度襟幾下，就俾到錢，你話方便唔方便呢，你直頭可以衝到上火車先慢慢襟。講完好處就講下不足之處，我估呢個 pay by app service 係外判的，政府要收足錢，而 service provider 又要舐油水o既原故，佢喺 $1.5 o既 parking fee 上仲要俾多 $0.32 o既所謂 convenient fee。三毫二子看來唔係好貴，但如果你將佢以百分比來衡量的話，嗰 convenient fee 就等如 parking fee on top 加 21.3%。咁你話合唔合理或者抵唔抵俾？我只會話我唔會用囉。我直拉去 ticketing machine 俾卡仲可以三陪積分添呀。

Prepaid 又係咩玩法呢？
City 為咗方便要每日坐火車o既人士，推出半年期o既 Pre-Paid Pass。為惠$1.25 per day，即係 $150 半年，以一個月泊廿日嚟計。可以去 City o既辦事處去辦理，佢地好君真，比如我尋日去辦理，佢係 pro-rated price 賣俾你。當你有一日唔需要o既時候，你退翻個 parking pass 俾 City，佢又會 pro-rated 退翻錢俾你。1.25/1.5 即係八三折，或者如果你一個月泊多過 16 日，當月之後o既泊車錢就當係賺咗。

仲有一樣嘢想分享，就係火車站o既 parking lot 原來都有分係 METRA o既 property 定係 City o既 property。喺泊車o既價錢上應該無咩分別。但係喺屬於 City o既 parking o既 Ticket Machine 就用唔到 Transit Benefit Fare Program 張 debit card，即係用唔到 pre-tax debit 卡個度扣錢。不過唔緊要，反正入o既錢唔唔夠 cover 一個月o既火車錢，即係火車月票已經打爆咗每月 pre-tax 額度。

下次有機會再分一下其他火車趣事。

四月中仍然嚴寒

嚴寒一字雖然有啲誇張，畢竟，才負兩叁度。但四月中仲落雪，兼且我要用十分鐘去鏟走車上嘅冰雪先開到車。。。那似乎有點痴線

既驚且喜

Sss...

我的小車 Mazda MX5

最終，我買咗部 Mazda MX5，其實，都係上年年中o既事。

當中過程，其實都值得分享，但由於我太懶同文筆太差，沒有將成個過程用文字紀錄下來。但我有留下聲音軌跡(似乎又係度有意無意咁自我/幫人宣傳)。但願我有日可以用文字再紀錄翻。

其實我一開頭係諗住買 SUV，甚至乎無諗過買呢部 MX5。我想買多架車來代步o既原因，係因為我同老婆只得一架車，我用咗嚟返工就扣留咗架車，老婆就無車用。如果老婆想用車，佢就要車我返工同接我放工。出入有所限制。當然，你可以話，超，你負擔到，就係對呢個狀況不滿而希望作出改變。比著如果搵朝唔得晚，你點都唔會諗去買多架車。

我o既想法係，因為有工返，又負擔得起，唔值得令自己同屋企人出入困難。因為我直頭覺得好似坐監咁。唔知點解，我好害怕呢種被困呢種感覺，亦不想見到呢個情況喺我身邊o既人出現。所以就想買多架車，但其實現實嚟睇，其中一架車其實真係擺多過揸。

Anyway，在公在私，我都決定咗買多部車。跟住就始揀車。因為想老婆都會揸，已經鎖定非手波車，即係要自動波車。又咁講，要喺呢個世代搵o架手波車，其實都唔容易，一般都係得翻啲所謂 performance car 先會係手波車。我個人好鬼貪新鮮，再買嘢絕大多數都會買啲自己未試過o既嘢。所以唔想又買翻四門o既 sedan，無新意，所以一諗就諗 SUV，CRV、TIGUAN、RAV4、X1、X3、Q2、Q3 或者係啲 hatchback，A3 呀，仲有留意 Audi TT。我對 Audi 係有小小情意結，因為第一印象，無得解，不過有時睇翻，其實 Audi 啲車款都唔係想中咁好睇。TT 係因為係上網睇到有啲幾千蚊有交易，心思思想試，但多數都係手波，所以最終放棄。利申：我係想試手波車的。

最後點解會係 MX5? 我都唔知，可能係網台啲人講過下跟住被催眠呱，我唔知。我之前搵 Mini Cooper 都無諗過 MX5，但呢架車的確合乎我o既要求：以前未試過。

其實我以前都有留意另一架 Honda S2000。留意佢係因為當年 Playstation GT2 隻 Game 架封面車。同埋，喺 2000 嗰個年代，咩鬼嘢用 2000 做招來o既嘢都會被人留意o架喇。

後尾再搜尋 MX5 o既資訊，先知道呢架係歷史以來，銷量最多o既雙門開蓬車系。老實講，我知有呢架車o既存在，但一直都無咩留意佢。偏偏，我就係買咗佢。

喺美國，佢有另一個名，叫 Miata。

喺 2017 年，佢其實已經係出到第四代 ND。歷年來，代號分別係 NA、NB、NC 同 ND。ND 我試過軟蓬版，都過癮，但有啲嘈同埋因為軟蓬，所以隔音唔好同埋在陽光下佢會變得好很熱。我其實係一個唔多鍾意同陽光玩遊戲o既人(唓，咁你又買開蓬車？)。

我買o個架係第三代o既 MX5，2011 出產，代號係 NC。 2.0L 引擎，158HP，6前速自動波，有手動撥片。雙門雙坐，FR車，即前置引擎後輪驅動，硬頂開蓬。事有湊巧，硬頂開蓬 NC 多數都係自動波車，好似唔多見手波版。呢架車，某程度上都合我要求，就係同我現有o既嘢唔同。你話呢架嘢好貴咩？新車最平就 28K 有交易。你佢好快咩？2.0L engine 158匹力，你話佢識飛你都唔信喇，你最多可以話佢比較輕，所以加速感覺來得比較快。你話呢架車好稀有嗎？其實周街都好易搵，見佢易過見 Tesla。上網人人都話佢係一架好車，駕駛感覺得令人回心微笑。講到佢咁誇張，所以就孤注一試。

15K 買入一架 2011，即 6 年車齡，不到 30K miles。如果 condition keep 得好o既，我覺得唔貴。後尾睇翻，其實前 bumper 個底佢有刮花，不過就應係泊車刮到車前啲膊位，應該無刮底o既。不過佢就用過唔 match 色o既油去補過色。

揀自動波，因為顧及家人都要開到。揀 hardtop，因為 Illinois 會落雪，而又預計會泊室外多，怕個軟蓬會頂唔浦會漏水。其實雙座係唔係好唔實用呢，以我呢個 case 又未必，你諗下，你有幾多時間o架車係多過兩個人坐？我未轉工前，長時間揸個幾鐘一程都係我自己一條友喺架車度，以五座車嚟嚟，咪即係長期吉咗四個位係度，咁又算唔算浪費？其實，去超巿買嘢一定夠晒位裝嘢。但如果你話要去機場接機送機(無論送人機定送自己機)，咁就一定唔現實o架喇，因為佢個 trunk 未必放到兩個 handcarry。

個人駕駛感，的確喺同普通四門房車唔同。

座姿比較底，上落車要時間適應，而又的確無普通四門上落咁自如。

軚感比重，對我嚟講無咩所謂。

架車個懸掛係比較硬，即係比較'櫈'。當路面起伏大o既路上，的確有啲彈跳甚至有擺左擺右o既感覺。

FR 車，易甩尾。

車身矮，前方視野易受阻，尤其路口等轉彎成日都被隔離車或者其他車隔擋視線。

仲有，一般房車可能有電子油門幫助，你縮油時，個轉數唔會話咋一就應聲下跌，但呢架車你一縮油個轉數相對會跌得好快。

轉彎好直接，感覺比普通私家車要早啲回軚，仲有，小小扭動架車都會有反應。

車細，油缸都細，變相成日去光臨油站。

同埋架車唔算慳油，我一般長途做到 22 mpg (10.7L/100km)，巿區就可能18 mpg(12.4L/100km)。

另外，唔知係唔係未換車胎關係，我試過喺雨天時，紅燈起步轉彎有甩尾情況。

雪地就更加駕駛不能，原因如下，一、車身底，積雪隨時高過車底。二、可能車身太輕，唔夠重令輪胎同地面有抓著力，在斜路遇上雪地時輪胎空轉打滑。三、雪地上,我就連開直線，時速低於 30mph，都一樣會左西右西(可能路面不平令車輪失控)，最終仲撞路膊。好彩只係刮花咗個軨，無撞到車身亦無撞到其他車。不幸中之大幸，隔離線啲車即時嚇到雞飛狗走。。。絕塵而去，後車就離我成三個車位。

車內無豪華設備，叫做都仲有個 glove box，第四代連個 glovebox 都無埋。

座位空間連我呢啲亞洲人身形都覺得窄，乘客席都未必能伸直雙腳。

座位可調校角度有限。

Car Audio 可放六隻 CD，一個 touch screen 都無。

Dashboard 仲係萬事得上一代的橙紅色背光燈。

以上種種形容，係唔係好似彈多過讚呢？對唔住，我個人包拗頸性格。用'型'呢個字可能有啲誇張，或者我會用有性格嚟形容呢架 MX5。老實講，我暫時未見過有同事同我撞車款(上一間同家陣呢間都無)。入油嗰時久唔久就會有人問我架車係唔係好快。每當唔曬同埋唔太凍o既時間我就會開下蓬吹一下。起初唔敢同人講話自己買咗架可以開會蓬o既車，係因為怕人地話我 showoff。但其實呢架係一架平車。。。So far 半年已過，我每坐上呢架小車都有回心微笑o既感覺，亦有小小唔捨得落車o既感覺。雖然呢架係一架平車，如果要講到 proud of 擁有呢架車又實在有啲誇張，但最起碼我覺得揸住呢架車一啲都唔失禮。

話說上年十月嗰時，天氣開始轉冷，架車開始唔多想撻著咁款，諗住遲啲先換電喇。點知有一日自己出去食 lunch 之後，架車無電完全撻唔著， 要同事嚟救車。之後就嗱嗱淋去 costco 買粒電，成惠美金七十幾蚊。下次睇嚟都要換車胎了，怕且要花上五六百蚊了。偈油之前都換過，我估下次可能想換一下 coolant。另外，break 個警告燈久唔久都著一下，上網人地話係有機會 break fluid 唔夠導致，check 過又未去到 min. line 所以等天氣無咁凍再去睇下咩料。

小小想法 - 朋友

我一直都有個想法，或者你可以話係發白日夢，就係我希望自己個朋友圈o既朋友大家 share 自己的財務狀況，目的，除了互相比較，就係互相學習，希望大家就係透過比較，激起大家都落後o既恐懼，同時大家可以努力向前，一齊提高生活質素。人，無可能識晒所有嘢，友情o既嘢，真係無計o既，你會願意分享，你付出咗o既，或者兜咗圈條路行遠咗o既，你都唔想你o的老死要浪費時間或重覆經歷。

朋友間，有的生活比較輕鬆，有的生活比較忙。我理想o既朋友係可以大家一齊都向前，有時間的就多啲做分析做資料搜集，幫助比較忙o既朋友，可以一齊分享到各朋友間o既經驗或成果。當然，最終朋友有無得益，都要睇佢自己有無身體力行去好好利用朋友的經驗同分析成果。起碼，自己有份盡力，對得起朋友。如果我真係有能力，貼埋錢俾朋友又有何不可(又係度發白日夢)？

當然，好多人都話。別人的經驗，即使你學著嚟做，都未必有相同或相近的成果。因為人地際遇同層次同自己相差太遠，學也學不來。所以點解我會話喺我o既朋友度咁做呢？因為，大家都係屋邨仔，大家一齊成長，大家都知道大家o既背景狀況同為人。我相信基於以上的條件，朋友間o既經驗應該可以有所得益。

可能有人會話，超。。。你啲朋友圈咁窄，衝唔破個層次，咪又係發唔大財。

我朋友圈o既想法並唔係話圍威喂咁，固步自封，而係喺朋友間無私咁資訊同經驗交流或分享。

另外，我亦希望，朋友間做到一個生態圈，就係工程、IT、會計、Marketing 都可以互相補足，一搵人幫手就即係有人幫到手。去到有錢一起搵。係唔係好理想(白日夢)呢？講到尾，可能就係信字。

你問我朋友多唔多？實在唔多，大部份朋友都曾是同窗。大概因為讀書時期未被世俗污染太利害才容易建立互信同友誼。當然，出嚟做嘢識到又做到朋友都有小小，但實在唔多。而我，稱上朋友就堅係朋友，喺會去到無私 share 嗰種。

鳩噏完畢。

二手車 Part 1

我成日都睇到啲合口味o既二手車，但... 又話咩 American dream， dream 你個頭，只要係 manual 都無得買，因為想老婆都可以一齊揸部車。 

其實呢篇嘢o既開頭早喺大半年前就已經開咗個頭，但又好似無咩嘢寫，所以就草稿咗同埋放埋一邊。點知，世事o既真係你估都估唔到。我喺美國正正式式買入我第一架我自己名義o既車。

先交代一下，其實小弟都唔算得上係咩車迷，只係有多小留意啲牌子同款式。至於深入到要記得架車個 engine 係咩型號咁，我就做唔到。不過，你問我鍾意咩品牌呢？咁我都有啲心水o既。作為一個土生土長o既香梘仔，梗係鍾意日系同歐系車，對韓國車無好感(雖然租車成日遇到同埋其實又唔係太差，韓國車仲不斷進步添)。美國車系就更加唔會考慮，因為香港接觸到o既美國車小之又小，加上耗油印象深入民心(其實美系車啲油耗表現都改善咗好多)。

 至於車牌就，讀大學三年級嗰時考，不過跟駕駛學院都肥咗一次先考到，使咗成萬幾蚊，真搵笨。當時係考1,2號牌，即輕型貨車同棍波。喺香港揸機會唔多，但都叫做有。唔係香港有揸過車，都唔可以喺美國一日咁快就攞到個車牌。喺香港都叫做揸過車同買過車o既。如果可以，喺美國攞咗車牌再返香港'及'翻個牌快靚正平好多囉。

Mazda 121
人生第一部我名義o既車，但其實只係掛我名買車同出保險，實則係我個朋友o既。原因係我年齡同牌齡夠，出保險平好多。所以幫朋友出，事後發覺如果有事其實會好麻煩。Touch wood 無事無幹。仲有個 funny point，就係嗰原車主係買新力啤抽蓋掩抽到o既 121 仲係終生保養，但要係每年都返原廠 check 一次。同埋呢o架嘢我試過喺紅隧口過咗收費亭之後死火，幾鬼淆底，好彩之後架車可以撻翻著。唔駛被拖車。

Subaru B4
問朋友借的一架車，開過一兩次，人生第一次揸 Turbo 車，呢架嘢，開 Turbo 嗰吓真係好鬼癲狂

Audi A4
前同事以極平價錢相讓，2.4L，好力，舒適，可以同的士鬥快，閘佢唔俾的士佬 cut 埋嚟。好實淨，隔音好。但維修貴，連買粒電都貴過日本車兩三佰。因為 2.4L engine，偈油又用多過人。呢架嘢係我人生真正o既第一架車，雖然只係玩咗幾個月，但感覺十分良好，有很好o既回憶，亦因此對 Audi 車極有好感。

Mazda 3
近年回港專用車，多得朋友無償借出，出入十分方便

以下中文譯名以香港慣用品牌譯名，唔好問我咩係雷克薩斯之類o既名。
日系呢最主要有:

Toyota, 豐田
印象：係啲車係永遠開唔爛o既品牌，耐用、實用、但唔會俾人一種嘩一聲o既感覺。
維修：相對歐洲車平 零件:又平又易搵又多 3rd parties，真係度門爛咗o既話，你要配翻舊咗o既顏色左邊度門都分分鐘配得翻，油都唔駛噴。
性能：普通
外型：普通
耐用：高
價錢：性價比高，易負担

Corolla、Yaris、Spacio、Echo、Echo Verso 之類
以前細過嗰時都有諗過。但係去到老美之後，車平兼且收入上升，唔駛刻意太慳去買部細車。所以都會諗 Camry level 以上o既車。

Camry/Avalon
實用，夠晒空間感，但無咩驚喜，Avalon 就再高級啲，試過喺台灣租過 Avalon，都算一部唔錯o既車。

RAV4
就十年如一，無咩變，但都叫做 SUV 同好似有四驅 option。特徵係佢個 Spare 呔係掛係車尾。人地 Honda CRV 都取消咗 lu。

Estima、Previa
以前細個喺香港就好鬼鍾意佢，貪佢抵食夾大件。

Alphard/Vellfire
就係老細車，或者家陣叫 Vellfire。

Prius/Prius C
我唔係唔鍾意 Hybrid 車，而係佢個款太前衛，我唔夠 in 囉好唔好？我唔識欣賞喇。不過有人送俾我都會毫不考慮會要o既。

4runner、FJ Cruiser
美國地大車自然都大，喺呢邊都幾鍾意呢啲款

Sienna、Highlander
就普通啲囉，七人/八人車咁囉

Land Cruiser

呢款越野車都算叫做型仔o既(曾經)。

Celica
聽講呢部都有好多人鍾意，but not my cup of tea

MR2一代、二代、三代
一代經典，細個無錢買唔到，大個之後佢就停咗產囉。我超鍾意，尤其一代同三代。我個人認為第二代就比較醜但個入風口位其實都幾特別。 MR 車，即所謂中置引擎，後輪驅動。有緣o既話都真係想試一下。認識佢都係因為古惑仔套戲。

Supera
係九十年代仲興玩街跑嗰時o既名車。都幾型，不過家陣好難見到囉。

86
我對拓海架舊 86 無興趣，但新嗰部就唔同講法，聽講係一架 fun car，但用 Subaru engine。又無咩壞o既。Subaru 水平對向 engine 可變得低重心，聞說架車好 balance 咁喎，FR 車，前置引擎，後輪驅動。仲有，美國本身叫呢架嘢做 Scion FR-S 用 Toyota 副線去 sell 呢架車，後尾豐田取消副線品牌，直接掛翻自己咩嚟做就叫 Toyota 86，另外，Subaru 都有出同一款o既車，叫 Subaru BRZ

LEGO 40223 Snowglobe Limited Edition

呢個係另一款o既 Mini set，係 2016 年 Christmas o既限量版，其實買滿唔知幾錢就有得送。見佢呢次幾耐，就拆開佢同大家分享下，的確係幾靚。