陪審員 Juror

以前o靚仔嗰時內心有少少恨被抽中。事實上，係無被人抽中過而要出席

早幾個禮拜前，家人 Whatsapp，話收到信件。心諗，仆街喇，司法機構有信嚟都唔慌係好嘢。正所謂即揭即中獎。信件內容如下：

You are hereby summoned to appear as a juror at the COURT OF FIRST INSTANCE to be holden at the High Court... 

信件 Dated 八月尾，十月頭傳召你出席。心諗，可唔可以扮收唔到呀大佬。唉，咁既然收到，都要小心處理o架。畢竟同司法機構的信件都不宜冷待。立馬就上網 search 一下點處理。再睇下封信，發現如果因客觀條件唔許可未能現身，必須書面通知法院常務官。咁我唯有死死氣咁 draft 封信，email 俾家人寄去法院。加上疫情期間，以免郵遞o既延誤，特著意家人以掛號方式寄出，以茲證明。而小弟的內容如下，務求簡潔清晰。

致香港高等法院
司法常務官：

        本人 XXX ，早前收到高等法院於 X 年 X 月 X 日發出之信函 (傳票編號)，通知本人已獲加入成為陪審員名單內。然而，本人 X 年 X 月 X 日後已離港到 XX 工作。故此希望能從陪審員名單中剔除，並附上 XX 以茲證明。

XXX

X 年 X 月 X 日

如果我喺香港，我係好樂意(其實亦無得你揀)去盡呢個公民責任，亦係司法獨立體現o既一個程序。奈何身在外地，未能現身，固向機構告知情況。

發噏瘋 - 我看陳同佳案

話說早排有個香梘人涉嫌喺寶島將佢當時o既女朋友變成非自然死亡，案件就當然轟動社會。而就香江驚慌而言，因為案件涉及境外司法管轄權，所以未就非自然死亡一事搜集足夠証據提出檢控，只能就洗黑錢一事作出檢控。

涉事人服刑及刑滿出獄，又再次引起社會熱議。

我無意在此作道德或良心批判應否去台自首。但就事件想提出兩三個思考點：
一、佢係'去'寶島自首，唔係'回'台自首。我覺得有必要搞清楚個 home base 係喺香梘，唔係寶島。此其一。
二、自願去寶島自首，個人覺得非常唔合符人性，好簡單，你明知一去就會被人關禁，而你係有選擇地唔離開香梘，我完全睇唔出有咩誘因要出國去寶島。我無讀心理學或者犯罪學，唔知涉事人心理狀況如何。我只知唔去係好正常，更何況係合法地有得揀。所以你話佢自願去寶島自首，我 唔 信 ！
三、合法性。成日都話法治社會，人地有權合法唔離開香梘o架大佬。你香梘未能提出檢控係你問題，你無輸打贏要o架喎。你可以話呢個係漏洞，係，但係係無辦法的。你無可能押佢去寶島o架喎，呢個係邏輯問題。如果你硬要以道德/良心o既批判要覺得涉事人一定要去寶島的話。其實同批鬥無咩分別。

呢個係我睇法，當然我知好多人會唔認同。我都歡迎討論一下。

貳零壹玖年送逃犯引渡條例修定之風波有感之種子

內地官方媒體以及通訊 filter 訊息及新聞，習以為常，但並不認同。
內地同胞惡意攻，失實評論，說三道四，盲目支持不義，我感可悲。

如要先要評論香港現況，我諗可以先了解一下香港呢個歷史遺留下來o既特殊地方，官人再各自思考思考。

簡單而言，本屬廣東新安縣的香港(Hong Kong)，
因南京條約，香港島(Hong Kong Island)被永久割讓給英國政府
因北京條約，九龍半島(Kowloon)，即界限街以南被永久割讓給英國政府
因拓展香港界址專條，新界(New Territories)及離島(Islands)租借給英國政府，即所界限街以北，深圳河以南以及附近近二百個島嶼都租借給英國政府九十九年。

自此，香港o既發展就同中國內地分道揚鑣。

在此，我有三點想提出嚟，比大家思考下，亦都係好多時連香港人自己都唔清楚或者唔知道o既背景。
一、九龍城寨/九龍寨城。寨城o既出現，就係基於拓展香港界址專條中，涉及部分係租借，並非割讓，即擁有權仍然屬於當時o既清朝政府。所以清政就係當時o既邊界，亦即九龍寨城、啟德附近設立海關以及駐防，以示管轄及主權範圍。英國人又尊重合約精神，未敢直接管治九龍城一帶，故出現三不管的九龍寨城這特殊地方。此乃香港近代史的重要一環，有興趣者實應該多加研究以及查証。
二、南京條約，北京條約與及拓展香港界址專條三者都在中華民國國立故宮博物院。如果說是要回歸，那，應該是回歸去哪一個政權？
三、亦因九十九年大限，界限街以北、新界以為離島o既土地擁有權將接近九七大限，故商界，銀行，地產商同當時港英政府反映憂慮，故有所謂香港前途談判出現。而結果係不單將新界及離島交回中國，同時亦無條件的將已割讓的港島及九龍半島送交中國。原因係英國覺得無險可守，如中國硬出兵武力收復整個香港的話，英軍於港島與及九龍半島的死守最終都會失敗，加上日不落帝國風光不再，決定將最後一個英國殖民地結束。

點解當年香港從殖民地走出來但又無獨立呢？有前因的，英美同中國有 deal，令到香港同澳門喺聯國中剔除於殖民地之列，導致日後無獨立出現。

而香港回歸中國而非中華民國亦係英美同有分參與的 deal。

某程度上，香港就係名不正言不順的回歸中國。我不會不承認回歸這回事，畢竟這是改變不了的事實，亦係英美中國合謀出來的事實，我提出，只係想大家認清史實同背景。

至於香港回歸後的狀況，有目共睹，不贅。

我會認為香港人不滿中國內地，此乃種子。

有趣分享，我都係再次查找香港近代史先明白新界(N.T.)何解叫新界，其實就係源自拓展香港界址專條。新界原來係一個形容詞，並唔係一個地名或區域o既名，身為一個生於香港o既香港仔都係今日先明白，實在失禮。

港股倉近況 - 貮零壹玖年柒月叁拾壹日

好很耐都無寫過股票相關，因為我實在無咩時間處理，港倉無咩變，只係政府債券己陸逐被贖回圖現了。

哈，關於香港o既股票，我做咗啲有趣o既統計：

0002    63.88    4.7%
0003    9.25      3.2%+10%
0005    48.16    5.4%
0006    67.43    4.1%
0939    5.75      5.2%

個價係我o既成本價連手續費，2015 開始陸逐持有。個 percentage 係個 yield，匯豐我係以股代息，煤氣嗰 10% 係十送一紅股而成本係因為十送一而降低了，似乎我要放棄 0006 買入 0003。

發噏瘋 - 講普通話啲人聰明啲？

真實故事，非道聽途說。

話說小弟的一位姨甥升上芝加哥一間 L 字頭的私立大學，今學期選修了一科中文科。老美o既中文科好顯然會多數由一些以國內普通話拼音名字的人授課。根據姨甥所述，那授課的人出言道，懂中文，講廣東話但唔識講普通話是比較蠢的。

我聽到就即是無名火起，尤其我呢啲近年突然香港意識強烈o既中年人。

我即係同我老婆講，屌，咁撚巴閉，走嚟美國教書替死呀，返去建設祖國喇。

早兩日再去搵去佢個貴寶號，睇下佢有咩優質論文或文章發表，點知咩都搵唔到。連 ext. no. 都無個，實在有點令人奧惱。

我一般都唔鍾意主動挑起事端，正所謂，對人以寬，律己以嚴。我呢次我實在抵唔住頸。各方各地文化各有差異，有長有短，多點欣賞或理解差異o既因由，而唔係純粹把現像作出非黑即白分類。唔通你呢個授課人員仆街我就話成間大學啲人都係仆街咩？唔係吖嘛！講嘢都唔撚科學。

認識語言係認識一地方文化的重要元素，如果你硬要吹噓自己因為講普通而自覺比別人優勝或聰明的話，我會為你同要上你課的莘莘學子感到好可悲。

高錕教授

高錕教授，一位值得人專敬的學人以及科學家。

關於高錕教授的成就或佚事，相信近日有看報紙的人都會看到如繁星多而又美麗的報導。相信都無用小弟多說，亦不敢班門弄斧。

只係想在自己的地方，公開o既平台，發表一下自己的感受。

雖然我專稱高錕先生為高教授，但我不是他的學生，亦不是畢業於中大，但我覺得高教授作為一個學人，專稱一聲高教授實不為過，亦叫做表達我對高教授的教育成就專敬。

而跟高教授於生命中有著一刹那的交匯o既故事係咁o既：

話說小弟有幸曾經於香港一家晶片設計公司工作，於某一年的周年晚飯場合中遇見了高錕教授。當年，高教授為那家晶片設計公司的非執行董事之一，故有緣於周年晚飯遇見。

心想，嘩，名人呀，公司有呢位學人/科學家做公司董事，好犀利吖。當年只知高教授就係那位發明利用光纖作通訊用途的人，但都已經覺得佢勁到爆炸。唔知點解，突然間有個衝動想同呢位好犀利o既學人合照一張。

雖知道，我本人並不追星，亦對跟明星拍照威威呢鋪癮沒有興趣，甚致乎對所謂支持你的偶像去什麼演唱會吖買什麼什麼照片呀視為白痴行為。但唯獨高教授，我覺得好想好想跟高教授來一個合照。

就食到半路中途，見到高教授在阡陌席間出現，看似要離開晚宴。小弟立馬捉住個同事：喂，你係唔係有部相機喺身？幫我同高錕影張相吖。佢反應係呆一呆，覺得人地肯唔肯同你影呀？當刻我本著小弟很薄的面皮，鼓起勇氣，走上席間向高教授問道：高教授，我可唔可以同你一齊影張相呀？高教授很和善咁回答可以。咁我就叫同事快啲幫我影相。影完相之後，佢仲問我係公司做咩？係唔係讀中大？讀咩學科？咁我都一一回答。高教授雖然反應不算得快，但語氣和善，半點架子也沒有。跟住就同高教授握手言謝。面紅耳熱，個心仍然跳得好快。

此事乃小弟懂性至今，唯一一張與名人的一張合照。

後來返到公司發現，同事相機居然用了一個超低o既解像模式去同我拍照，佢o既解釋係：唓，公司用機，平時影 FA 嘢，求其唔駛咁靚o架嘛，無為意咪無轉番高像素囉。我即時差啲激到暈咗。如果我即係返睇過張相，我一定會再影過，張相像數低，白平衡又錯晒，真係 no good.

世事往往就係咁，總係有啲遺憾。

之後喺港台一個電視節目，先叫做比較多一點認識高錕教授，先知道原來佢o既成就係咁犀利，慢慢再知道原來高教受o既為人同情操都好好添。但好不幸，高教授患上了腦退化症，亦即謂老人痴呆。個心即時呆咗一呆，同埋個心酸咗一下。

因為高教授，我曾經想過去中大讀個 master，但最後都無成事。

高教授太太亦成立咗一個基金，一方面支持為研究腦退化症，一方面支援腦退化症病人及家屬，久不久就見到一架由貨車改裝為宣傳車經過中大或科學園附近，有大大個高教授o既肖像。每次見到個心都酸一酸，嘆天意弄人。

於上星期日早上的 Twitter 看到高教授離開人世的消息，實心情沉重，對高教授退休後選擇香港作為他渡過晚年到離世，為的只是想為香港作出多小貢獻，實令人感動。

願這位偉大的學人和發明家安息。

話樓巿 - 按揭

相信按揭呢家嘢好多人都唔會陌生，尤其你曾經買過樓。按揭o既意思係，當你想買一層樓(香港嚟講其實係指買一個單位o既意思)，而你又無足夠o既金錢 full pay 去買入呢個單位，咁你就需要銀行或者財務機構去借錢買入呢個物業。同時間，銀行亦唔會無端白事咁借錢俾你，而佢係會做幾件事去平衡借錢俾你呢個風險：

1. 首期，即係買入價o既兩成(視乎準業主買入單住o既價錢、財務狀況等等。。。)。目的係顯示買家係有充分意圖或者意願去買呢個單位，俗啲講就係想同你攬炒或者洗濕你個頭。假如貸款人唔駛俾首期就借到錢，即係無本(某程度上 credit record 都係你o既成本嚟o既)就借到錢，萬一有朝債仔搞唔掂，供唔到款，佢就同銀行講，我無錢還，你收咗層樓喇，銀行都真係吹佢唔漲。如果你有俾首期，而你又供唔掂層樓，銀行收翻你層物業，你除咗無咗層樓之外，你付出o既首期都會付諸流水，一去不復返。咁你估相對講，你俾咗首期係唔係會落力啲撲水供樓呢？
   
   你可能即刻會問，喂，銀行收翻層樓有抵押品喺手，怕咩喎。說話就唔係咁講，因為銀行目的只係想將錢借出然後有穩定而又預期到o既利息作為收入，而唔係想收翻你層樓。銀行其實好多時都好保守，佢唔想承擔風險，佢寧願穏定咁收小啲錢，唔係係收翻你層樓轉售套利。雖知道一買一賣涉及風險，同埋，銀行收翻你層樓其實仲有一大堆 procedures 要做，法律上喇、估值喇、跟住要搵賣家喇(即銀主盤)，再唔得就要拎去拍賣，但拍賣好多時個價都係低於巿價，一來買入o既人都怕麻煩，二來銀主盤好多時都要你 full pay，因為銀行都想盡快收翻啲錢，唔係唔想揸住個物業。咁 full pay 得，個價自然會有所折讓。銀行唔想經歷一次下一個準業主要去做按揭冗長o既步驟及時間，萬一下一個準業主大吉利是上唔到會，交易告吹，即係成個過程又要再嚟過，真係好煩o架。仲有喎，拍賣行又會收銀行拍賣費用，所以銀行要做銀主盤的話分分鐘係會蝕錢的(雖然呢個可能性好低，銀行點會做蝕本生意。)
2. 利息，即如果銀行如果認為借錢俾你個風險高啲，佢就會收你高啲息，用高啲利息回報去消除佢心中o既不安，或者叫做快啲收回佢o既成本。打個擘如，假設兩個相似o既單位，成交價相近，但點解你個 rate 同佢個 rate 唔同？因為銀行覺得你風險高啲，而個成本上升，咁佢咪要加你利息去 cover 個成本囉，無錯，風險都係成本之一。總之收多啲錢咪接受到高啲o既風險囉，正所謂高風險高回報嘛。
3. 抵押，即係銀行作為你o既債權人，喺你有咩依郁o既時候，佢可以變賣你層樓(即你個單位)去支付你欠佢o既錢。雖然你係名議上o既業主，但某程度上只係建基於銀行賦予你物業o既某部分使用權同掛名叫做業主。好多時，按揭合約寫明你係唔可以私自再去做二按(即再抵押樓宇去借錢)或者改變用途，例如由自主變出租。呢啲動作你係要得到銀行o既同意先可以咁做。仲有喎，你張屋契係喺你手定銀行手呢？睇到呢度，你覺你係業主定銀行先係真正o既業主呢？

好喇，講咗一大論，我其實想講啲咩呢？就係想講下我呢個無錢買樓o既人對家陣發展商十成按揭或者二按去做埋銀行八成或六成或五成之後剩餘貸款金額o既做法。我集中講下當中o既風險。如果你計掂數，供到，就以為無問題？咁你就要小心喇。好多時，發展商為吸引買家，好多時會自己做埋財仔，食埋你最後一浸水。當銀行都預視風險增高或者樓價又開始回落，好多時就會出現所謂估價不足o既情況而導致貸款人借唔夠錢去買入單位。

即係例如個單位發展商賣俾你係 $100，但銀行預期樓巿下行，加上評估風險後，覺得你如果供唔掂要收翻層樓變賣時，個價可能只係值 $60 而批出 $60 呢個貸款額度俾你。而你如果有 $40 喺手，咁成個成交都無問題，你都係籌到 $100 去買樓。

但如果你只有兩成首期喺手，即 $20，咁即係你問銀行借埋都係得 $20 + $60 即 $80。咁剩底嗰廿蚊點算，發展商就發揮佢貪婪o既本色，嗱，小兄弟，見你咁有誠意買樓又一見如故，不如咁，我蝕底啲，借多 $20 俾你買樓，一圓你買o既夢想，一年免息期，之後先計利息，利率係 P+1，咁你咪有夠時間去籌期剩底嗰 $20 囉或者慢慢還。準業主睇到係唔係感激流涕呢？

但其實，你無諗過一年後會點呢？

假設你計好晒數，夠俾晒一按同二按o既供款，都不外乎三個 scenearios:

升巿：你供到銀行嗰份又供到發展商二按嗰份，你叻仔，無事。分分鐘過咗罰息期之後你可以 re-mortgage，套多小小現去清咗嗰二按。
平巿：你供到銀行嗰份又供到發展商二按嗰份，你叻仔，無事。只係還嗰廿蚊o既利息有啲貴咁囉。
跌巿：你供到銀行嗰份又供到發展商二按嗰份，你以為你叻仔，會無事？只係還嗰廿蚊o既利息有啲貴？唔止，分分鐘銀行突然發神經，覺得你個物業無當初估值時咁值錢，即係資不抵債，咁佢有機會 call loan，意思係收回貸款。或者好小小就同你追收資不抵債o既差額。當然，銀行一般唔會無故 call loan(但無人敢寫包單)，佢係多數聞到味然後就同債仔 call loan。因為我喺頭段都講過，銀行收回物業再賣出涉及成本以及呆壞帳，非到必要都唔想咁做。但如果，如果佢知你個出糧戶口突然間無出糧而樓巿跌得好勁，咁你就要小心，即使你唔知點解無糧出而又籌到旗供樓咁叻仔，佢都一樣會有理由相信你失去(或者快將失去)供款能力而觸發 call loan 危機。所以我成日都話，盡可能就出糧戶口同做按揭用唔同銀行，無需要俾銀行十分清楚你o既財務狀況。

上邊講o既係計好數夠供一按同二按o情況，但如果諗住走精面，博佢升，喺二按供款前就賣出o既話，咁唯有祝君好運。

突然係唔係覺得租樓好過買樓呢？咁就要睇你買樓o既目的係咩喇，要諗清自己做緊咩嘢，能力去度邊度同埋風險係啲咩，最壞打算係會點。當然租樓都一樣有風險，就係加租同埋唔續租，又要搵租盤囉。

期權月中小更新 - 貳零壹捌年捌月

Contracts	T Date	B/S	Price	Close	N Close
合約	開倉日	買沽	開倉價	收巿價	夜巿價
HEH57.50H8 電能八月57.50認購	07/24	沽	0.880	0.610	0.610
XCC7.25I8 建銀九月7.25認購	07/24	沽	0.220	0.060	0.060

話都無咁快就行咗 2/3 個月，隻 0006.HK 呢期好似食咗 spring 藥咁，本來早排仲做緊 65 蚊，突然呢期啲人情緒恐慌，全世界一致吹奏咩公用股穩陣呀，咩收息好抵呀，又話咩抗跌力強呀。你老味，唔好搞到我呀唔該，早排以為派息除淨大把 buffer 會掂過碌蔗。點知佢前日居然升到 $57.7。咦，咁咪即係穿咗？係，的確係穿咗，個心當堂劣一劣。即係如果對家係條傻佬，係都要行駛o既話，咁我就俾佢 call 走我啲電能實業。本我身諗住佢派息會多啲 buffer 俾我捱下價，點知隻嘢要升一兩蚊係咁容易o架噃。。。

正面啲咁睇，如果佢真係 call 貨，咁我又即係知道而我又用番 57.7 買番，唔計手續費，我都偷咗佢雞 0.88-(57.7-57.5) = 0.68 每股。

但我有一樣嘢搞唔清，就係究竟幾時截數？我知幾時除淨，亦知幾時截止過戶，但係截止過戶係以 T+2 計定係我被人 call 走嗰一刻計呢？等我得閒搵翻啲 rule 嚟睇睇先。因為怕最差 scenario 係，被人 call 走，又以 57.7 買番貨，但係原來係 entitle 收派息，即係收唔到 0.77 股息每股但又要被除淨，變相倒蝕 0.68-0.77 = -0.09 每股，咁就偷雞唔到蝕渣米了。

發噏瘋 - 晶片

作為一個曾經喺半導體行業打過工o既的一個工程師嚟講，我對香港o既傳媒，包括網上文字或影像評論以及報章o既評論中，提到芯片一字，實在十分討厭。

廿年前，當內地資訊科技仲未好發達o既年代，喺香港，Chip 被翻譯為晶片，而 Chipset 為晶片組，或許是跟了台灣的譯法。

叫得晶片，就當然有其原因。雖知道所謂的 Chip 其實係指以 Wafer(晶圓，一塊圓形的超高純度的結晶矽片)做基礎，把電路以不同物料刻蝕(印)在晶圓上，而這個刻蝕的動作係多於一層，以唔同物料的接駁(相接觸或重疊)去模擬電阻、電容 Op Amp，甚至乎一大塊 PCBA 的電路都可以透這個方法縮小在一粒比米還要細的 Chip 上面。

點解叫做晶片？因為晶圓上唔係刻蝕咗一個電路，係刻蝕咗成千個相同的電路於同一晶圓上。至於可以有幾多粒？無一定答案，要視乎代工廠生產技術(或者叫做製程，包括晶圓大小以及最細電晶體的大小)，同埋你個 circuit 既複雜程度。簡單啲同形象化一啲，你就當喺一個圓餅睇下切到幾多個小正方形或小長方形o既餅仔出嚟。當晶圓刻蝕好之後，做好後工序(如需要的話，gold-bumping, back grinding)，就會將晶圓按 IC 的大小切做一粒粒，再按需要進行封裝或直接使用，固叫做晶片(被切做一片片)。

不知何時何日，香港o既媒體跟了內地的叫法：芯片。我當然知道咩係芯片喇，只係唔鍾意咁叫之嘛。早排中興單嘢，咩中美科技貿易戰，嗰嗰電台、網上啲時事評論(述)員都紛紛參了一把，好有'深'度咁解釋中國晶片行業如何不滯云云。最好笑的，連名詞都未攪清楚，更惶請佢會介紹到俾普羅大眾知道半導體行業其實有幾複雜同製造門檻有幾高。仲有就係呢個行業玩 fabless design 呢種模式都未必人人都明白：你設計唔等如你製造，佢製造唔等如佢擁有。

都係嗰句，希望香港做高科技產業實在太難，唔係無人，係無人肯燒錢做 R&D，加上週邊無相應該生產工廠，咁啲人做咩唔去大陸或台灣搞呢？

期權有感 - 0006.HK 電能實業 - 貳零壹捌年柒月

忽然驚一驚，唔係驚蝕， 係驚賺少咗。點解咁講？

0006.HK 業積公佈，無咩特別，我唔多識分析，只知佢賺緊錢又無話咩倒退。未致於要立刻清掉手上股票。但係突然間諗起一樣嘢，而呢樣嘢係成日揮之不去，就係私有化或同長江基建合併。之前只揸正股，私有化同合併我基本上無仼歡迎，斷估都會對股價有幫助。但家陣我 short call 緊佢，即係唔睇好佢會升。

萬一，萬一小超人佢真係突然玩嘢(佢又話唔會再提私有化)，又重提私有化或者合併，股價實會衝上去，咁我啲 short call 實會被人行駛喇，咁我呢次o既 time cost 就大囉，等咗咁耐但係賺唔到上升o既成果。

尋日公佈派息 0.77 每股，8/23 除淨。如果無事無幹，即係又多咗 0.77 做 buffer。

媽。。。我好亂呀。

期權開倉小記錄 - 貳零壹捌年柒月

經過上個月啲電能 short call 大步檻過之後，好似失咗方向咁，原因係巿場避險情緒上升而導致我啲 noble stock (即係 noble gas 啲 friend, noble gas 即化學中的隋性氣體，即比較穩定唔多有化學反應而又自然存在o既氣體) 都有些微o既上升。即係由本來計埋幾個月來啲 short call 期權金都仲要蝕緊價，突然變成開始唔駛蝕價但要蝕時間同 opportunity cost。

睇住佢升，又唔敢 short call，short call 價遠啲又無肉食；調轉頭 short put 又唔想中伏扣住啲錢；long 嘢一直都唔係我鍾意做o既嘢。所以七月嚟講我係咩都無做過。恰埋眼連股票戶口都懶得 login 入去睇。

快到月尾，有感時間飛逝，又手痕 login 入去睇下。見個巿好似發佝瞀(音：牛豆)咁。加上吹緊加息，啲人又吹話利淡公用股喎，咁我就鼓起勇氣，做番啲八月份o既 short call。

2018/07/24 開倉時o既正價格：

0006.HK $57.25
0939.HK $ 7.19

Contracts	T Date	B/S	Price	O/C	Status
合約	交易日	買沽	價格	開或平	現況
HEH57.50H8 電能八月57.50認購	24-Jul	沽	0.88	OPO	OPN
XCC7.25I8 建銀九月7.25認購	24-Jul	沽	0.22	OPO	OPN

即係如果隻電能八月底升唔穿  $58.38 (57.5+0.88)，應該都唔駛俾貨人，又睇下今次過唔過到，short call 近價先多啲肉食。
而隻建設銀行呢，九月底升唔穿 7.41 就唔駛派貨俾人。0939.HK 真係唔多識玩，銀行股都可以咁大起大落，真係估佢唔到。話口未完，大陸又話放水救巿，睇啲銀行股股價又未致於持續向下，應該會稍稍回彈。又睇下你呢次點樣先。0939.HK 啲期權好惡搞，無咩肉食，所以先 short 到去九月咁鬼遠。。。

自己要繼續留意新創建、合和、太古、長建，自己唔買都可能推老婆買。好過攤係度曬太陽。

期權月結 - 貳零壹捌年陸月

Contracts	T Date	B/S	Price	Close	Status
合約	交易日	買沽	開倉價	收巿價	現況
HEH55.00F8 電能六月55.00認購	25-May	沽	0.860	0	EXP

既驚且險，六月廿八日終於結算，早前 short call 0006.HK@55 結於 expired，收報 54.9。

而今日為七月九日，收報 57.65。回顧翻我o既真成本價為 57.55，即係要恭喜我自己，終於唔駛蝕了。睇機會要做翻個 short call $57.5 或者 $60。

另外早排手痕 margin 抽小米，當時都覺得有古怪，有咩理由啲 margin 額仲未俾人用晒，原來抽飛十分嚴重，固寧願蝕小小錢，都唔想瞓唔著，我都學大戶抽飛，一通要抽飛好易，online click 兩下就搞點，只係已付o既 margin 利息及手認購新股o既手續費無得退還。買個教訓。

今日 1810.HK 收報 16.8 即比招股價 17 低 0.2。

期權快將結算之無咩更新 - 貳零壹捌年陸月

上個月買落o既 Short Call 0006.HK 無咩特別，只係呢期啲人開始有避險情緒，呢隻嘢居然有啲升翻轉頭o既感覺，唔好行駛呀大佬。。。

希望唔好升穿 $55.8x

期權月結 - 貳零壹捌年伍月

Contracts	T Date	B/S	Price	Close	Status
合約	交易日	買沽	開倉價	收巿價	現況
HEH60.00E8 電能五月60.00認購	18-Apr	沽	0.540	0	EXP
XCC8.25E8 建銀五月8.25認購	19-Apr	沽	0.215	0	EXP
HKB80.00E8 匯豐五月80.00認購	20-Apr	沽	0.650	0	EXP

0005.HK 收報 $74.95
0006.HK 收報 $54.1
0939.HK 收報 $7.82

由於全部都價外，對家無人會 execute，所以全部都變成廢紙，期權金袋袋平安。

另外，針對 0006.HK，喺 5月25日見五月啲 option 就夠期兼唔多會爆升 5 蚊。所以就 short call 六月 0006.HK@$55，本來想做翻 $60，但實在太無肉食，故進取啲做貼啲 short call @$55。當日 0006.HK 做緊 54.7，期權做緊 0.86。

記得正股息後成本價 58.95，五月食咗 0.54，六月又食 0.86，即係真。成本價為 58.95-0.5-0.86 = 57.55。

如果現在到六月結算時一直低於或等如 $55，無事發生，權金袋袋平安。
如果現在到六月結算時一直等如 $55.01 至 55.86，應該都無事發生，因為對家 execute +手續費都無著數，權金應該都係袋袋平安。
如果現在到六月結算前有任何一刻高於 55.86 而對方又選擇 execute，我將以 $55 俾貨對家，咁我 0006.HK o既投資就會蝕 57.55-55 = 2.55 每股，真係夠晒教訓。

買樓講座(一)

其實呢篇文欠咗一個遙距認識o既一位網友好耐，拖到佢連 blog 都無再寫我先'的'起心肝去開始寫呢個 topic。實在個心過意唔去。而我，想分享一下個人所得，希望別人唔駛行冤枉路/冤枉錢。

我想分享，有啲原因o既。
一、想為自己做個紀錄，自我警惕。
二、過來人，有緣人o既你仲有睇我個半死不死o既 blog 就俾希望幫到你或者見多樣嘢，教人就唔敢當。純粹分享下，俾個多 example 俾有緣人，只於點決定都係要睇自己造化。雖然我明白每人個情況都不一樣，即係情況類近，照跟或避開都未必會成功或者遠離失誤，但起碼想分享一下經驗，因為我自己成日都感到好孤單同迷網。

話說三四年前，即二零一四年，上過一個地產班，應該係有一個我追開佢個 blog o既口中嗰位'求C'隊長有份攪o既一個講座，我印象記都唔平，都成幾千蚊，大概接近一部高價手機o既價位。我嗰時o既心態係，如果真係學到嘢買到一個住宅，呢筆錢都唔係咩大數，所以一試。

我仲記得我仲坤咗個 friend 一齊上堂添。其實都唔係坤o既，佢自己都話有興趣。

一班我估都成四五十人，一個禮拜一堂，三四粒鐘一堂度喇。好似都有八堂 in total。地點係油麻地同尖沙咀之間，傳聞話好 L 猛鬼嗰橦重建過o既商廈。

你問我有無咩得著呢？咁實有o既。
你問我值唔值呢？em...我又唔多識去 valuate，但的確我知道一啲我之前無諗o既o野，同埋我相信喺我朋友圈中都應該無可能觸及到o既智識/經驗。

我知位我幾鍾意睇佢個 blog o既 blog 主都幾唔鍾意買樓收租呢個方法。而我喺香港的確最終係做唔到。但都有小小嘢可以分享下。

有樣o野值得留意，個講座同佢以前啲炒股講座一樣，都係有 sell 嘢，不過都唔係好 hard-sell。其實咁仲衰，中咗伏o既人可能會無咁唱衰佢呱，反正我無參與，無法得知結果。

其實當年啲 notes 同錄音都仲o係度，你話放上網咩？其實我唔介意，只費事因版權問題被人告就無謂。我最多盡我能力去 share 翻啲要點。

我首先 share 一下佢當年想 sell 咩呢。都係離唔開一個老掉牙o既一個主題：有錢齊齊搵。唉，邊有咁大隻蛤乸隨街跳吖。條橋 work o既，你慌會無人做？幾時論到我呢啲魚毛呀。當年，佢地就 sell 夾錢買工廈同埋夾錢買商住樓。

夾錢買工廈呢，原因當年樓巿已經炒到好很勁，啲人覺得好貴，買嚟收租已經開始無咩肉食，所以轉炒工廈，加上早排話博佢玩活化計劃，一個唔埋，申請到活化改變用途，可塑性都大o架。例如買大再拆細，即係要拆埋契。裝修到靚靚仔仔放租或者再放售。但有啲做法就某程度上，玩緊法律空隙，做到好似成間屋咁有晒淋沐間，用電爐扮 pantry，好似住得人咁，但其實係唔可以做住宅用途。不過租用人就唔知/唔干涉佢想點用喇。到現在睇翻，成個計劃都叫做 work，起碼到呢一刻，嗰時有 join 佢地個搵錢大計o既人應該唔死得人，斷估都有錢賺o既。

我的確覺得工廈都有啲潛力，只不過係唔熟行情，又無時間，實在不宜沾手。不過就起碼知道即使工廈都要睇地契所定明建築物o既用途。例如，係倉定工場，當時未有迷你倉大火，佢地個 plan 就遊說買工廈放租俾人做 wargame 場、文青工作室呀、私房菜呀、band 房、co-office 呀、迷仔倉。的確，嗰一刻係 work o既。但要留意倉嚟做 office 係走法律空隙，工場但又無生產線又真係講唔過去，同埋，理應唔可以有現金交易。因為唔係商用樓宇。其實政府咁做原意係不同用途建築物有不同的設施配套，例如消防、承重、電力等等，當然仲有地稅喇。幾年前啲所謂樓上鋪呀開倉呀其實都係博大霧，違反地契，係會被釘契的。唔好以為業主話唔知租客會咁做就無事。業主係要了解租客o既用途。當然，你亦可以喺租約上定明，兼要租客 declare 唔會攞o黎做呢樣嗰樣。仲要留意，工廈未必係廿四小時自由進出，要自己同管理工司了解翻。仲有樣有趣嘢，就係工廈地鋪啲食肆其實好多都係食堂牌，即係理論上唔可以做街客，只可以供應膳食俾工廈內工作o既人。原意想平地價 -> 平租 -> 飯餐可以平啲 -> 減低工人o既生活壓力。

今次講住咁多先。

期權開倉小紀錄 Short Call 下月 700@$430 後續 - 貳零壹捌年伍月

上個禮拜四就平咗了，因為星期五出業積，費時對對糊無得估。所以都係食咗先算。
4.750 平倉

6.55-4.75 = 1.8

平咗唔駛煩，可以大覺瞓。

真。香港地

我一般真係唔會貼歌詞，因為我覺得真係有啲小學雞。不過呢首歌我堅有感覺。

原曲：《香港地》，陳冠希
主唱：真‧ 河國榮 (feat. MC 仁)

同熱愛這片土地 大家刻骨銘記
愁或喜 生與死 也是香港地

對於呢個地方 我同你同一個同感
同一個諗法 我同你同一種人
雖然你有你忙 我有我忙 佢有佢忙
各有各行業 但係聽過同一首王傑

廣東道旁北京旁 啲喼塞爆同一個海港
大把小店接埋就係 我地呢一個香港

右邊有好多金行 左邊有好多藥房
面目全變 仲係唔係我哋嗰一個香港

經過幾多風暴啲樓價仍然屹立不倒
慈雲山下馬鞍山下依舊死做爛做
新機場唔再新 但係話想整多條跑道
舊車廂唔再用 但係新車廂有故障訊號

新路總 新報紙 新 TV 新主持
邊個話事我唔懂事 基本上唔再係白紙黑字
經過幾多清洗 真港仔仍然係真港仔
經過幾多瘋狼真港人仍然係真港人

＊同熱愛這片土地 大家刻骨銘記
愁或喜 生與死 也是香港地
同熱愛這片土地 大家一句到尾
由自己 生與死 也在香港地＊

(MC 仁)係得呢個地方出世 就預咗喺呢個地方道死
有人會痾到黃金遍地 搞到有陣黃金味
有人會睇到唔一樣 樣樣嘢怪塊土地
有人會屈人宿娼嫖妓 有人會選擇離地
有人會認為呢個係六八同九嘅問題
呢度嘅官員一齊吹水 點會居安思危
7 百萬隻螞蟻 唔容易走晒出嚟
向住同一個電視睇 一定會鍾意梁烈唯

係真香港人 當然會識英雄輝
係真香港人 可以睇埋同一篇潮文
你一崇拜馬雲 就表示你係第二種人
I rap the police I rap the government

跌得起輸得起 搵首歌笑下自己
真港人至叻 唔使靠人個個靠自己
唔怕攬住飛唔起 使乜要同人地比
要有定企 首先要企硬自己

Repeat＊

期權開倉小紀錄 Short Call 下月 700@$430 - 貳零壹捌年伍月

海鮮痕之裸 short
嗱，高風險，唔好學我，棧學壞手勢。

事緣尋日，真係手多 short call 六月 0700@$430。當時正股為 $403，波幅好似 27.x。收權金 $6.55。但此乃賭大細之動作。唔好跟。

收市時,option 己升到 $8.02 波幅升到 28.x, 正股價為 $406.2。又睇下點！

期權月初小更新 - 貳零壹捌年伍月

Contracts O Date B/SO  Price Close
合約 開倉日 買沽 開倉價 收市價
HEH60.00E8 電能五月60.00認購 04/18 沽 0.540 0.02
XCC8.25E8 建銀五月8.25認購 04/19 沽 0.215 0.081
HKB80.00E8 匯豐五月80.00認購 04/20 沽 0.650 0.07

呢堆嘢係上個月月尾做落o既，睇到 short call 有錢賺真係未必笑得出o架，因為即係正股或者個巿向下跌緊囉，係唔係好矛盾呢？

5/7 恆指收 29994。即係唔到 30000 點。
0005  $75.1
0006  $58.2
0939  $7.98

頂你，收埋啲權金都唔夠隻 0006 蝕咗去。隻嘢足足蝕咗 5%呀。咁辛苦做下期權都係為追數，真係辛苦命。

可能，平晒佢。收割，再開倉仲好。唔駛夜長夢多。我毫無 data support主觀感覺喺大巿想向下。

期權狀況小更新

Contracts O Date B/SO Price Close
合約 開倉日 買沽 開倉價 收市價
HEH60.00E8 電能五月60.00認購 04/18 沽 0.540 0.350
XCC8.25E8 建銀五月8.25認購 04/19 沽 0.215 0.162
HKB80.00E8 匯豐五月80.00認購 04/20 沽 0.650 0.480

其實呢，見到啲 option 個收巿價低過開倉價，即係有錢賺喇。咪咁開心住。呢個情況都有兩個解讀：

一、個正股價會咩點變，但由於越來越接近結算日，喺波幅不變底下， option 價格理應會向下，原因係觸及行駛價o既機會越來越低，越來越小時間去俾巿場去實現行駛價。呢個解讀喺比較理想o既情況

二、正股價向下，咁好直接就係越來越唔接近個行駛價，即正股價比你開隻 short call 嗰時仲低咗喇。即係準備正股蝕錢喇。Short call 收o既期權金只係叫做將個蝕本價推落啲啲。係唔太好o既一個情況。

點解做 Short call？因為有貨喺手，咁做 short call 咪唔駛再另外做保險，因為有實貨可以俾人，唔會祼 short。爆大單邊會輸到 hihi。