期權操作二

SP HKB@70 3.61，當時 0005 做緊 73.6。 每張可收 3.61 * 400 = 1,440 (唔記手續費的話)。假如無俾人行使，千四蚊袋袋平安。否則，就要以 70 蚊每股去接 0005 呢之又睇下中唔中先。 另外，之前做的 SC XCC@8 係唔係對自己太無信心呢。還是自己 set 得太貼價呢？定還是唔應該做 0939 o既 option 呢？值得檢討。

捉鵝(仔)小分享

上個禮拜，終於俾我生擒鵝仔。其實呢次係第二之喇。 話說大本營的草地經常有唔同的動物經過或逗留，最近呢期就有鵝同鵝仔。咁我呢啲城巿人梗係想玩下佢地同佢地玩下。原來啲鵝可以係好惡，尤其你攪佢啲細(廢話，比著有人攪你啲仔女都博老命啦)。我明知大鵝識飛好難捉，咁我就唯有向啲唔識飛o既鵝仔下手。由於鵝仔唔識飛，大鵝會照顧鵝仔，唔會自己飛走。每當我走埋去度，細鵝會逃跑，大鵝就會裝凶作勢，伸開對翼，仲會呼呼咁叫，想嚇走敵人(我)。咁我當然就唔驚喇，你唔走信唔信連你都捉埋呀嗱！每當佢地走落水我就會無佢辦法(唔通我跳埋落水咩)。 之後我就諗計，趕佢地去陸地方向，唔俾佢地走去湖度，然後就將大鵝同細鵝分開，咁細鵝由於體力有限，跑多幾步就會趴低或者走去小草埋扮睇我唔到。咁我就好易就生擒鵝仔，哈哈。我一手捉起佢隻腳。點知趁我背向佢嗰時隻大鵝居然飛起襲擊我，我仲俾佢抓傷添，隻手流血。不過，我捉到鵝仔真係好開心。最後，我梗係放翻佢喇，我只係想證明一下我個方法 work 唔 work。 原來，鵝仔潛水都幾叻。但佢地係陸地就比較輸蝕。 另外，啲鵝唔係好敢再嚟後花園遊玩，好處係小咗好多鵝屎。

交易紀錄

SC XCC@8 最終都平咗 @.15 即係要倒鉵，目標只係唔想比人行使連息都無埋。 點知平完之後就插水，咁我駛鬼平咩...

六月睇瑩光蟲@Great Smoky Mountain

原來，六月在 Great Smoky Mountain 可以看到瑩光蟲。特此一記。

股票期權操作小分享

小弟又終於忍唔住手去買股票，你估，會唔會又係股票大跌巿之先兆呢？不過講開又講，呢次又嚟疑似疫症，咩中東呼吸系統綜合症，啲報道話係類似 SARS 喎。又令我諗起走咗無幾耐的勞永樂醫生。 講返正題，小弟買咗： 0939@7.77 2800@28 2828@141.9 跟住，我就做咗我人生第一張o既期權合約。 SC XCC@8.00 0.11 (當時 0939 好似做緊 7.5x) 其實我唔係好識，都係上網睇見人地做我又做。 Short Call 簡單啲嚟講就係： Short = 唔睇好 Call = 升 Short Call = 唔睇好升 呢次呢個操作其實好(粗口)保險，點解咁講呢？ 首先，我係有持貨 0939 在手。只要我 short call 張數 match 翻我實貨數量，就算俾人行駛，我都一定有貨俾人。 第二，0939 今個月派息，佢派大約 0.3 per share，即係除淨日會跌 0.3 做 buffer，被人行駛合約o既機會又細一啲。 第三，就算係真係會被人行駛，我 7.77 入，要以 8.0 去放貨俾人，我都仲係有錢賺，雖然係小，但都係賺。 好啦，咁我搞咗場大龍鳳，張 Short call 又咗啲咩呢？就係每張合約可以收到 $110 的期權金。即係有對家(買入我張合約o既人)用咗 $110 去買咗個保險，如果有需要時可以以每股 8.0 去同我買一手 0939。 如果 0939 無升穿 8.0，我呢每張 $110 o既期權金就袋袋平安囉。

我的(新) notebook Lenovo X230

話說小弟終於有部新 notebook，我是從 Craigslist 尋寶回來的。

小弟離鄉別井後，一直沒有自己擁有一部專屬電腦，只是常常流動的使用老婆的 HP 發燒 notebook(佢成日好鬼熱，個風扇成日都好似開 turbo 咁都散唔到熱。仲有就佢個入風位做到超差，你平放張枱度佢都會自動 overheat 到自動關機，你話我起唔起火，所以我成日都同人講千其唔好買 HP notebook，買 dell 好過)，或者係姐夫家的 chromebook 或 dell。當然，我老婆部 HP 係平機款，但我都係覺得唔應該會過熱，枉佢仲係 HP 產品。

講翻我部新 notebook，佢極度新淨，最終賣 USD$400。Config. 如下：
Intel i5 3320M 2.6GHz
4GB ram + 4GB ram (upgraded by seller)
Samsung SSD 840 EVO 250GB (upgraded by seller)
USB 3.0
Fingerprint reader
Bluetooth 4.0
Webcam
HD4000 display
12.5" 1366x768 monitor
Ultrabay Series 3 docking with DVD-RW
6 Cells battery
another 6 cells spare battery
Notebook bag

部機仲有 3 個月保養！我知道呢部機唔係新機，佢仲係兩年前o既機款。但係呢個 config 對我嚟我好似真係夠用，同埋，佢已經係 SSD，真係開關機真係爽爆炸，同埋，個指模開機真係好過癮，辨認率十分高，直頭一揭起個 mon. 就可以 scan fingerprint 開機，入到 windows 仲可以自動 login 埋添。我用咗兩個多星期，真係無咩投訴。速度一流，又唔熱，又暢順，又無咩嘈音，又輕，仲有我好 like o既小紅點。唯一投訴就係佢個 keyboard 係無 backlight 的。又可以重拾 IBM Lenovo X series 啲情懷，真係好開心。

唔知，呢部機我會用到幾多年呢？

發噏瘋之論盡某網誌的LED bulb 燈膽點評

話說好多日都無寫 blog，決定一連出幾個 post 先。

今次講o既係有個 IT blog 的對 LED 燈膽的介紹。那位筆者是位香港挺有名氣的 IT 記者，佢曾經為 chinese engadget 打工的，家陣為自由人。我自己本身有有經常看他的 IT 產品介紹文章。但就比較小看 video，因為覺得 video 好多時覺得節奏好慢。(其實係我個人比較心急，睇文章可以自己控制快慢，仲有，係 snake yellow 嗰時睇 video 會太張揚了吧！！！)

話說有一集佢係話 LED 燈膽喎，嘩嘩嘩，開正我嗰瓣，唔睇唔得喇，小弟話晒都從事 LED 燈這行業。點可以唔支持下同埋睇下有咩好介紹呢。
當中佢當然有介紹 LED 燈胆，就係阿超人都有份投資嗰款。不過老實講，兩三年前我第一次睇就得覺得好前衞，但今時今日就實在好核突。因為佢個燈板同 LED components 外露：

• 無好的防塵和阿水保護。
• 外觀。
• User experience，LED 燈經常俾人感覺係好刺眼，無錯，LED components 本身佢光源係由一點發出，有別於白熾燈(incandescent light)或者慳電膽(fluorescent light)咁個光源唔會集中在一點。所以大廠或對燈光有要求的製造商都會加 diffuser 去令棧燈望落去柔和啲、睇唔到入邊一粒粒 LED components 咁醜樣同埋令用家睇唔出入邊同LED components。

佢介紹嗰個 LED 燈泡真係中晒我上面三個o既缺點。唯一o既解釋係，慳成本同埋易啲散熱。個燈泡原本以當時設計係幾前衞，因為佢可以做到差唔多叫做 omni-direction。即係好以一般烏絲燈胆同慳電膽咁360度都會有光出嚟。早兩二年前啲LED燈胆好多時都技術/組裝突破唔到，LED 光源有方向性，令一般用家係實際使用上有唔能夠完美取代烏絲燈胆同慳電膽。但家陣，好多牌子都做到，taobao 你都 search 到，才十幾廿蚊人仔一個，好心就咪再搵嗰個所謂'高科技'LED 燈膽出嚟介紹。我呢個半桶水o既工程師睇到都忍唔住要講粗口。

 好喇，就當你係想話俾觀眾聽，對比一下傳統白熾燈、慳電膽同LED 燈膽o既比較，咁比較都不在乎幾方面：熱量、用電量、使用感受同價錢。但係要比較，都要基於同一標準或者Spec.o架。例如，起碼大家都要同一光度/亮度，同一色溫(2500K/3500K)，即一般所謂的黃光 warm white/白光 cool white)先有得比較。你用個 2700K o既烏絲燈膽同個 3500K/5000K o既其他燈膽去比就梗係會黃啲o架喇，定等如你用灰色同黑色比較顏色，然後話：咦！？灰色嗰件嘢唔夠黑色嗰件咁黑色喎！你話呢個比較仲算唔算係比較呢？

1. 熱量方面，無錯，熱量越高反映佢由電轉換為熱越高，即係效能就越低。因為電 ---> 光 + 熱。咁 suppose 烏絲燈膽應該熱過慳電膽，而慳電膽又應該熱過LED 燈膽。佢用支探熱槍去度溫度我無咩異議，都係幾易話比觀看者聽有幾熱。我先唔理佢 IR Thermal detector 有幾準同個別測試點也可以有很大的溫度差異。但最起碼，比較發熱量都要係大家相同光度/亮度的燈膽去比較！你用個 10W o既燈膽同 100W o既燈膽比就梗係 100W o既發熱量熱o的喇。佢比較前無說明樣本個 spec.，我覺得唔夠公平比較同埋或有誤導之嫌。
2. 用電量，你用個 wattmetter 去度下咪知係唔係慳咗電囉，坊間大把啲直插 socket o既度功率錶喇，同上一點一樣，唔該你搵翻個相同光度/亮度o既燈膽去比較先知大家係相的 lumen/lux 輸出下，邊個用電小啲咪慳電啲囉。
3. 使用感受，你話 LED 膽刺眼啲，我無可厚非，因為佢介紹個 sample 確有呢個缺點。但唔該，你係要基於同一 conditions 去比較，即係相同色溫同大約相同的光/亮度先去比較。
4. 價錢，無謂多講，唔同 conditions 跟本就無得比較，1500cc 同 2500cc o既車會唔一樣價錢呀？

 其實，我唔係想抺黑佢。我只係想大家做網誌公開咁介紹產品前，多做一點搜集和功課，比較時基於一個要求，咁可以令其他唔熟識o既讀者更易明白同清楚各產品/ technology 有咩好處壞處，咪誤導人，俾其他業內人士睇到都真係 O 晒嘴。