美股號外之三之後續

唉，講得後續，就梗係有啲嘢更新。

不幸o既係，我於 Tesla 蝕了錢，買入買出價相差了 18%。唯一興幸係注碼細，只佔總投入資金的 10%，即係為整個 portfolio 帶來了大約 1.8% 減值。

買入價為 $375，賣出價為 $308.38。

其實，跌超過 5% 就應該斬鑦，以此為鑑。

買入喺因為私有化o既憧憬，既然私有化唔成，就無謂 keep。TSLA 以現價計我不太睇好，唔係話我唔信 EV，而係佢成日都好似搵朝唔得晚咁。前(錢)景唔太清晰。所以都係忍痛收佢檔。

終於由接刀仔變接軍刀。。。

美國銀行開戶親身經歷

首先，我要講o既係，我嚴重違反咗個人中指╭∩╮（￣▽￣）╭∩╮，呀唔係，係宗旨先啱。以前講過，被人 reject 過信用卡就永不錄用，但我的確係食咗言，我係悔疚過好一陣子！但面對一張聽講係全城都話好o既信用卡我居然脆底咗。不過呢樣唔係今次要講o既重點，下次先講翻信用卡。

今次係想講講去銀行開個戶口，開一個 saving account。你就可能會問，唓，開個 saving 有咩特喇呀師傅。兄台且慢，此 saving 不同彼 saving。喺香港，你要開個 saving，雖然家陣都麻煩，左填右 check，但都好平常o既一件事，尤其你原來已係現有客戶，但美國好唔同。

喺美國，default 一般你話去銀行開 account 意思係開個 checking account，亦即香港o既 current account。無論你係用嚟做出糧戶口、開 check(cheque)、交費咩都好，一般都係用  checking account 搞掂。而 saving 一般係預你有入無出，個別銀行對 saving account 提款次數係有次數o既限制。以 魔跟大窿 銀行嚟計，一年限提六次咁大把，當然 saving 係有利息支付，但 checking 好多時都係無或者小到你唔會恨，仲好多時可能要你係咩 priority account 或者咩 premium account 先會有 checking account 利息。

今次我想去開 saving o既原因又係貪心囉，其實兩年前都食過呢款優惠一次，食完就取銷咗，兩年後佢又嚟優惠，咁我咪又食多次囉。原本係開戶 saving account，十日內存款萬五蚊美金，維持三個月， 就會有 $200 rebate，六個月內 account 要仲係 active，唔係佢會扣翻錢o架。但近來做個小更新，就係將金額從萬五提升到兩萬五蚊，rebate 就升到 $300，維持月數一樣。

見佢話  online 申請到，咪諗住 online apply 入 code 開戶啦，點知開嚟開去都去到最尾一個 step 搞唔掂。咁我咪又 online message CS 問發生咩事，諗住我都係現有客戶，開多個戶口應該簡單啲呱。佢話 confirm 唔到我o既 information，要落去 branch 開戶。心諗，你老味，都用緊你 service，又點 confirm 唔到我個人資料呀。

好喇，咁我星期六就去你 大窿銀行行個圈。個 banker 都好好態度，我表明來意，佢就好快同我坐底開戶。俾完 ID 同 credit card 做身分證明後(佢要兩個文件證明你個名，其中一個要有相，而 credit card 喺美國都可以用嚟證明你個名)，佢就同我開戶。誰不知，佢問下係唔係 citizen，我梗係唔係喇，佢就問我攞 green card，要 scan 做 record。佢話每逢開戶都要做一次，無辦法喎。如果佢講o既嘢係真，我就就明白點解我 online 開唔到。以小弟無根據o既估計，係由於我並非 citizen，每次開戶都會 check 你個 identity 一次；如果你係 citizen，check 過一次後就唔會再 check(我估)。顯然我又開戶唔成喇。

我上網睇翻，原來 花旗參銀行都有開戶優惠，普通戶口，唔駛 direct deposit，只要維持 $15K 喺戶口，就可以有 $400 rebate。反正都係 check 個人 information，睇嚟，呢個仲著數，反正都想喺唔同銀行開多個戶口，無必要將所有數字俾晒同一間銀行知道晒。仲有，之前學前輩講o既，按揭嗰間銀行同出糧間銀行最好分開，無必要俾佢知道你財務狀態。得閒就要做好準備。

美國火車泊車分享

唔知點解硬係唔鍾意用通勤二字。

話說小弟自從轉工之後，被迫愛上搭火車。而由住處去火車站當然要自己開十鬆分鐘車。而美國o既火車站就好好o既，有一個好大個 park lot 任你泊。雖然係任你泊，但，係要俾錢o既。正價為 USD$1.5 per day，泊到晚上十一點五十九分為止。

講到俾錢，佢都有幾個方法俾你揀。Pay per park 同 prepaid

Pay per park 佢有兩種玩法。

一、就係即場喺 ticketing machine 俾錢或者俾卡。每個 park lot 都有個 parking number。落車時要記得 parking number，然後喺 ticketing machine 輸入號碼，再入錢/碌卡，跟住就會出張飛俾你，而你就要留住張飛做俾咗錢o既證明。萬一有條矒柄無神神抄咗你牌，都可以攞住想 receipt 做上訴證據。不過部 machine 就唔食 penny，最細都要入 quarter。。。即係清唔到啲碎銀。(其實去超巿啲自助 machine 咪可以清晒啲碎銀囉！)

二、就係用 app，家陣廿一世紀，用 app 俾錢好平常，用 app 俾 parking 亦屬方便，只要記得你泊車個 zone 係咩號碼，每個站都有個 zone number，除咗要入 zone number，當然要入翻你個 parking number 喇，再喺 app 度襟幾下，就俾到錢，你話方便唔方便呢，你直頭可以衝到上火車先慢慢襟。講完好處就講下不足之處，我估呢個 pay by app service 係外判的，政府要收足錢，而 service provider 又要舐油水o既原故，佢喺 $1.5 o既 parking fee 上仲要俾多 $0.32 o既所謂 convenient fee。三毫二子看來唔係好貴，但如果你將佢以百分比來衡量的話，嗰 convenient fee 就等如 parking fee on top 加 21.3%。咁你話合唔合理或者抵唔抵俾？我只會話我唔會用囉。我直拉去 ticketing machine 俾卡仲可以三陪積分添呀。

Prepaid 又係咩玩法呢？
City 為咗方便要每日坐火車o既人士，推出半年期o既 Pre-Paid Pass。為惠$1.25 per day，即係 $150 半年，以一個月泊廿日嚟計。可以去 City o既辦事處去辦理，佢地好君真，比如我尋日去辦理，佢係 pro-rated price 賣俾你。當你有一日唔需要o既時候，你退翻個 parking pass 俾 City，佢又會 pro-rated 退翻錢俾你。1.25/1.5 即係八三折，或者如果你一個月泊多過 16 日，當月之後o既泊車錢就當係賺咗。

仲有一樣嘢想分享，就係火車站o既 parking lot 原來都有分係 METRA o既 property 定係 City o既 property。喺泊車o既價錢上應該無咩分別。但係喺屬於 City o既 parking o既 Ticket Machine 就用唔到 Transit Benefit Fare Program 張 debit card，即係用唔到 pre-tax debit 卡個度扣錢。不過唔緊要，反正入o既錢唔唔夠 cover 一個月o既火車錢，即係火車月票已經打爆咗每月 pre-tax 額度。

下次有機會再分一下其他火車趣事。

期權月中小更新 - 貳零壹捌年捌月

Contracts	T Date	B/S	Price	Close	N Close
合約	開倉日	買沽	開倉價	收巿價	夜巿價
HEH57.50H8 電能八月57.50認購	07/24	沽	0.880	0.610	0.610
XCC7.25I8 建銀九月7.25認購	07/24	沽	0.220	0.060	0.060

話都無咁快就行咗 2/3 個月，隻 0006.HK 呢期好似食咗 spring 藥咁，本來早排仲做緊 65 蚊，突然呢期啲人情緒恐慌，全世界一致吹奏咩公用股穩陣呀，咩收息好抵呀，又話咩抗跌力強呀。你老味，唔好搞到我呀唔該，早排以為派息除淨大把 buffer 會掂過碌蔗。點知佢前日居然升到 $57.7。咦，咁咪即係穿咗？係，的確係穿咗，個心當堂劣一劣。即係如果對家係條傻佬，係都要行駛o既話，咁我就俾佢 call 走我啲電能實業。本我身諗住佢派息會多啲 buffer 俾我捱下價，點知隻嘢要升一兩蚊係咁容易o架噃。。。

正面啲咁睇，如果佢真係 call 貨，咁我又即係知道而我又用番 57.7 買番，唔計手續費，我都偷咗佢雞 0.88-(57.7-57.5) = 0.68 每股。

但我有一樣嘢搞唔清，就係究竟幾時截數？我知幾時除淨，亦知幾時截止過戶，但係截止過戶係以 T+2 計定係我被人 call 走嗰一刻計呢？等我得閒搵翻啲 rule 嚟睇睇先。因為怕最差 scenario 係，被人 call 走，又以 57.7 買番貨，但係原來係 entitle 收派息，即係收唔到 0.77 股息每股但又要被除淨，變相倒蝕 0.68-0.77 = -0.09 每股，咁就偷雞唔到蝕渣米了。

美股月中戰報 - 貳零壹捌年捌月

真係一日都嫌多，嗰日先話 Twitter 累全家，今日就會發現 Tesla 先係累街坊嗰位，佢由我入貨價最多已路超過廿個巴先，今日稍稍回順，現報 318，都即係跌咗 15.5%。FB 就浮浮沉沉，無咩升跌。反而 Twitter 家陣就升翻到 34 蚊。只係比入貨價跌咗 3.3%。

唯一興幸係前入多一股 Amazon，為成個組合帶來疑似穩固o既基礎。下個買入目標係 AAPL。

Tesla，原來條友都係隨口噏當秘笈，啲資金走出嚟表示未同 Musk 達成過任合協議。而呀 Musk 都係以發 tweet 當時股價 on top 加20% 當係收購價。What a good tweet！跟住証監緊係開始調查喇，Musk 上訪問又話自己開始壓力爆煲，跟手又話有機會要請人返嚟做 CEO。股價就梗係跌到仆街喇。

	Cost	Comb.	Price	P/L	W. P/L
AMZN	1665.475	34%	1895.789	13.8%	4.76%
GOOG	1122.95	12%	1214.757	8.2%	0.95%
TWTR	35.165	11%	33.89	-3.6%	-0.40%
NVDA	240.21	12%	251.25	4.6%	0.57%
BRKB	190.99	10%	209.04	9.5%	0.93%
FB	175.99	9%	173.21	-1.6%	-0.14%
TSLA	376.65	12%	320.3	-15.0%	-1.75%
					4.93%

美股號外之三 - 美股繼續炒之 TESLA

相逄恨晚，今早終於喺 Pre-Market 時段入咗小小 TSLA，入貨價為 $375。祝我好運。買入原因為炒私有化概念，Elon Musk 喺 Twitter 話，要私有化 TSLA@420，仲話 fund secured。叫你地 only sell @420 or wait till privatization 喎。仲記得 Solar City 嘛？前車可鑒呀。

早排先話無錢要 suppliers rebate，呢頭就有錢做私有化，真係好鬼神怪。

都啱o既，private company 就可以點怪o既做法或玩法都得，但 public 咗，咩數都要正路，喺難搞啲，聽講好似搵到啲酋長資金喎。

我就兩個想法，佢咁放消息會唔會証監告。二，如果佢縮沙唔私有化，會唔會又被人告話佢發放假消息刺激股價又一樣係拉得，所以博佢 >65% 真係會私有化。

想學習用 Python 分析/選股

話難好似唔難，話易又好似唔易，我o既目標係想要用一啲 technical analysis 的 tools，做 back test 去揀股。

一個人去學去試又無人問又好似搵唔到啲教學提示真係好痛苦，好孤獨。

轉台不似預期之最終回

上回講到喺公司打去 CS 去做 port in，基本上係重覆一次同我攞 information，同我自己 online 填 form 無分別，是旦喇，又睇下你得唔得先。我打去之前仲同 Google Fi CS 查詢，佢話如果要打9個 digit，就喺原來 5-digit o既 account number 加翻 4 個 0 喺後邊喎。咁我同 FamilyMobile 個 CS 講，叫佢試下打 5-digit 得唔得，佢話唔得喎，咪叫佢加翻 4 個 0 喺後邊。

等咗一個下晝,都係唔成功。返到屋企，CS 居然有打嚟，只係我 missed call，佢有留 voice message，咁我就 call back 睇下咩料。

又俾多次 sim number 俾佢之後就 check 到我想 port in 個 number，佢就話係 Google Fi 嗰邊 reject 話 account 唔啱。咁又再次同佢 confirm 一次 account number 同 pin，佢話個 system 出 unexpected error。來來往往試過三次，又地址又 SSN，講講下突然間斷咗線，個心屌咗一聲之後，定個神，就聯想到：咦，唔通成功 port out？再睇下 notification，Google Fi 就話 service canceled，即係成功 port out！咁我就開開心心食晚飯。

點知食完等咗成大半個鐘張新卡都仲未打得出電話，咁我又要再打多次電話 check 下咩料。睇嚟好似喺系統仲未 activate 張卡，CS 玩咗一輪，就叫我關機再開，叫我試下打電話。呢次真係打得出喎！咁我就知真係搞掂！佢仲要我逐樣試，打出打入text 呀上網呀。全部無問題，呢次轉台行動終於成功搞掂。

仲有，我覺得佢地 CS 啲服務又俾我想像中好喎，因為網上啲全部都話差到爆燈。或者係我無期望無失望呱。

唯一小小唔滿意o既係，$48.99 係未計稅同雜費，埋單要 $56.19。

轉台不似預期

話說早前 google fi 個 rebate 用得七七八八，又心郁郁想搵啲平啲o既 plan。因為家陣通勤時間太長，來回超過四個鐘。故此一個 unlimited data plan 好似更符合生活需要。呢期又俾我搵到 Walmart FamilyMobile 好似好抵。49.88 unlimited data，可 tehering，32GB 後會限速。咁咪一心想試下囉。

唔知點解，自己計錯數，白痴咗用 5蚊買張 sim 返嚟，其實 walmart 只要 0.99。總之就鬼掩眼喇。其實我懷疑 Walmart 個 plan + sim 貴咗幾蚊其實就係啲雜項收費，你買嗰時俾埋定係你 online 買 plan 嗰時俾，無分別，定陣反而白痴咗貴咗 4 去 ebay 買張 sim... 老貓燒鬚。。。

最精彩O既部份係：接近廿四小時了，我仲未轉到台，估計係我打錯咗 account no.，Google Fi default 個 account number 得 5 個 digits，但 myfamilymoible website 填 form 做 port in 時，佢死都要我打 9 個 digits，咁我咪打我手機號碼囉，點知。。。

Anyway, 今日返到公司又打去 CS 度做 port in，但等咗大半日都好似無咩起色，仲要 charge 咗我兩次錢。。。呢次睇嚟都幾惡搞。無喇喇有撻瘌。

美股月結 - 貳零壹捌年柒月

特此一記

	Cost		Price	P/L	Weighted P/L
AMZN	1665.475	39%	1777.44	7%	2.6%
GOOG	1122.95	13%	1217.26	8%	1.1%
TWTR	35.165	12%	31.87	-9%	-1.2%
NVDA	240.21	14%	244.86	2%	0.3%
BRKB	190.99	11%	197.87	4%	0.4%
FB	175.99	10%	172.58	-2%	-0.2%
				Total	3.0%

推特累全家！

美股之旅 下集

上一次提到我唔鍾意 E*TRADE，但又想買美股喎，咁咪開始搵另一証券開戶。以我成日格價o既性格，梗係搵個 budget broker 喇。比較大路都係呢兩間，一個叫 Interactive Broker 同 Charles Schwab。

IB 就玩變相月費，佢一個 trade 好平，好似小過一個仙，但係計法有小小複雜，base on 你o既交易股數同交易金額，月尾埋單計數，如果收費少過十蚊都會收你至少十蚊，即係變相十蚊月費，但如果嗰個月無 trade 就好似唔駛收錢。

Schwab 呢，就簡單啲，一個 trade 收你 USD4.95，劃一收費，唔理你金額同數量。

簡單啲嚟講，frequent trade o既，就 IB，簡簡單單呢就 Schwab。而我就揀咗 Schwab。

開戶都係 online 填啲嘢，跟住就會問你 security question 就會 verify 到你既資料(小弟估計係你個'專屬號碼' link 咗你啲地址呀、登計車輛呀啲資料)。填好晒又 verify 晒咁咪諗住入錢囉。第一次做 account transfer money 都預咗又要等一兩日俾佢 setup/verify。好喇，setup 好晒過晒錢入去準備 trade 喇，跟住又話要打電話去 confirm money transfer。心諗，屌你，一皮嘢美金都咁大陣象，駛唔駛呀？打咗個電話去 confirm money transfer，終於就攪掂，可以買賣。

仲有個小插曲，就係本身我係有申請埋 option trade，但唔知點解又唔批，可能怕我 short 嘢 short 過龍呱。。。唯有玩住正股先。

感覺 Schwab 係有小小煩，但起碼一個電話攪得掂，唔駛返頭又呢又路。

祝我自己投資(機)順風順水，長搵長有！