rsync backup 補完

因為 cp 或者 mv 無進度顯示，所以都唔知佢究竟抄咗咩 file 同抄到咩樣，所以又用翻 rsync，但一般 rsync 都係 show 下抄緊咩 file，原來佢仲有 argument 可以 show 埋個進度。

rsync -av --progress --stats /volume2/video /volume4/

--progress 就會 show 個進度，仲有速度睇。
--stats 最後會有個 statistics show 翻俾你睇。

起初以為 rsync 會慢過 cp，但睇翻個速度其實有 8xMB/s to 9xMB/s 都算對版。

用翻 rsync o既原因係 cp有時真係會有嘢抄漏咗，係唔知咩原因導致電腦佢 skip 一啲 folders 或者 files。

慚愧

原來，呢個 blog 一直紀錄自己工作唔開心o既嘢，呢次都唔例外。
終於都到咗頂唔浦o既時候。

學 Obama 話，CHANGE!

共勉之 - Religion

Religion is an insult to human dignity. With or without it you would have good people doing good things and evil people doing evil things. But for good people to do evil things, that takes religion.

第一句我唔係好識理解，但之後o既就講得幾啱，it can be a kind of belief or religion...

Google Translation

突然有所啓發 - 報應

話說，呀網台之光北總( Talkonly 網友間對台長之暱稱)有一集大台提到報應之説，佢有另一番見解或想法。就係，有時候，好人有好報呢家嘢，主觀願望係好可能有，但唔知等唔等到。咁如果有能力o既人，係唔係可以做一啲嘢，令好人感到有好報呢？

的確，令我有小小頓悟。報應呢家嘢，唔一定要向壞方面去諗。有能力的話，自己係唔係可以做多一啲，開下小店，做啲小生意，令一啲人可以感到有好報。唔知呀，我都唔知有咩可以可做，希望自己有一日能做到多一點。

好奇怪，離開咗香港，反而成日都問自己一個問題，我可以做啲咩去回饋社會？當然，大前題係我都要搵到飯食，唔係點 sustainable?

網台 Talkonly

Podcast 呢家嘢，都真係就嚟俾人話 out。雖然好早就接觸，但其實都唔係好堅持到成日聽一個網台。原因為係以前細嗰好小坐定定聽嘢，又或者屋企地方細，開聲太大會影響到屋企人。電話又唔係 iOS 系，無得好方便咁 download 嚟聽。加上以前返放工都只要不足半小時車程，所以其實唔係好慣塞住耳仔。從來都唔係聽開收音機o既人，加上又唔好/迷偶像，903 其實對我嚟都無咩聽。

好多年後，又突然重聽翻網台，可能時間真係多了，開車路途又遠，加上思鄉病發作，唯有聽下香港o既網台嚟解鄉愁。而且，仲參與其中。返香港時就厚住面皮走去人地個 studio 度玩 live。喺美國就玩玩 group chat 同埋錄埋音，submit 下節目俾人地播下，其實都過癮。從來未想過自己錄音會面向公眾。

希望能改善自己o既表達能力喇。

請大家支持 講台 Talkonly 呢個網台，反正免費收聽。
http://www.talkonly.net

香港越來越小人可以佢地咁無私咁供獻時間、精神同金錢去維持一星期有幾個節目。好過睇啲每況越下o既傳統廣播媒體。

突有所感 - 自信

漸漸，以前睇開o既 blogs，走o既走，唔寫o既唔寫，走樣o既走樣。漸漸，成堆 feed 都剩翻啲財經 related blog。咩中環 gossip、OL gossip、空姐 gossip 通通灰飛煙滅。

而我，依然係不定期 、不定時、不著邊際的亂噏廿四，無嗰句講嗰句(即係 9 噏)。

離港後，我經常刻意 online blog searching 搵人交朋友想講下心事。離鄉別井，心裡確實不易過。誰不知，人地覺得我白痴兼無聊，叫我好好想想呢個地方適唔適合自己，或者問下自己有無放下同融入呢度o既生活。當然，第一次得到呢啲 feedback，心裡當然唔好受，其實我當時可能只想得到別人o既認同或者一啲安慰o既說話。點知換來一啲簡單直接回應，有如當頭捧喝。諗深一層，大家背景不同、際遇不同而餘又三唔識七，你想人地點答你？當然 ，性別不同，興趣不同，性格不同，地點不同，要交到朋友，實在要付出及緣份。

今日，我雖然依然唔知自己做緊咩嘢。但起碼，生活上有翻啲自信，不再需要別人的安慰，有啲搵翻以前o既自己o既嗰種感覺：我，就是我。


我想，係呢度，講下我知道的、學到的、從'香梘仔' engineer 的心態去睇香港美國中國的不同，同時透過呢個平台，去偷師到別人的理財。

呢個世界，總會有人唔鍾意你，有人對你沒甚喜惡或者有人會鍾意同你交朋友。但千祈唔好主觀願望人地一定會用友善態度去對待自己。

 廢噏完畢。

二手車 Part 1

我成日都睇到啲合口味o既二手車，但... 又話咩 American dream， dream 你個頭，只要係 manual 都無得買，因為想老婆都可以一齊揸部車。 

其實呢篇嘢o既開頭早喺大半年前就已經開咗個頭，但又好似無咩嘢寫，所以就草稿咗同埋放埋一邊。點知，世事o既真係你估都估唔到。我喺美國正正式式買入我第一架我自己名義o既車。

先交代一下，其實小弟都唔算得上係咩車迷，只係有多小留意啲牌子同款式。至於深入到要記得架車個 engine 係咩型號咁，我就做唔到。不過，你問我鍾意咩品牌呢？咁我都有啲心水o既。作為一個土生土長o既香梘仔，梗係鍾意日系同歐系車，對韓國車無好感(雖然租車成日遇到同埋其實又唔係太差，韓國車仲不斷進步添)。美國車系就更加唔會考慮，因為香港接觸到o既美國車小之又小，加上耗油印象深入民心(其實美系車啲油耗表現都改善咗好多)。

 至於車牌就，讀大學三年級嗰時考，不過跟駕駛學院都肥咗一次先考到，使咗成萬幾蚊，真搵笨。當時係考1,2號牌，即輕型貨車同棍波。喺香港揸機會唔多，但都叫做有。唔係香港有揸過車，都唔可以喺美國一日咁快就攞到個車牌。喺香港都叫做揸過車同買過車o既。如果可以，喺美國攞咗車牌再返香港'及'翻個牌快靚正平好多囉。

Mazda 121
人生第一部我名義o既車，但其實只係掛我名買車同出保險，實則係我個朋友o既。原因係我年齡同牌齡夠，出保險平好多。所以幫朋友出，事後發覺如果有事其實會好麻煩。Touch wood 無事無幹。仲有個 funny point，就係嗰原車主係買新力啤抽蓋掩抽到o既 121 仲係終生保養，但要係每年都返原廠 check 一次。同埋呢o架嘢我試過喺紅隧口過咗收費亭之後死火，幾鬼淆底，好彩之後架車可以撻翻著。唔駛被拖車。

Subaru B4
問朋友借的一架車，開過一兩次，人生第一次揸 Turbo 車，呢架嘢，開 Turbo 嗰吓真係好鬼癲狂

Audi A4
前同事以極平價錢相讓，2.4L，好力，舒適，可以同的士鬥快，閘佢唔俾的士佬 cut 埋嚟。好實淨，隔音好。但維修貴，連買粒電都貴過日本車兩三佰。因為 2.4L engine，偈油又用多過人。呢架嘢係我人生真正o既第一架車，雖然只係玩咗幾個月，但感覺十分良好，有很好o既回憶，亦因此對 Audi 車極有好感。

Mazda 3
近年回港專用車，多得朋友無償借出，出入十分方便

以下中文譯名以香港慣用品牌譯名，唔好問我咩係雷克薩斯之類o既名。
日系呢最主要有:

Toyota, 豐田
印象：係啲車係永遠開唔爛o既品牌，耐用、實用、但唔會俾人一種嘩一聲o既感覺。
維修：相對歐洲車平 零件:又平又易搵又多 3rd parties，真係度門爛咗o既話，你要配翻舊咗o既顏色左邊度門都分分鐘配得翻，油都唔駛噴。
性能：普通
外型：普通
耐用：高
價錢：性價比高，易負担

Corolla、Yaris、Spacio、Echo、Echo Verso 之類
以前細過嗰時都有諗過。但係去到老美之後，車平兼且收入上升，唔駛刻意太慳去買部細車。所以都會諗 Camry level 以上o既車。

Camry/Avalon
實用，夠晒空間感，但無咩驚喜，Avalon 就再高級啲，試過喺台灣租過 Avalon，都算一部唔錯o既車。

RAV4
就十年如一，無咩變，但都叫做 SUV 同好似有四驅 option。特徵係佢個 Spare 呔係掛係車尾。人地 Honda CRV 都取消咗 lu。

Estima、Previa
以前細個喺香港就好鬼鍾意佢，貪佢抵食夾大件。

Alphard/Vellfire
就係老細車，或者家陣叫 Vellfire。

Prius/Prius C
我唔係唔鍾意 Hybrid 車，而係佢個款太前衛，我唔夠 in 囉好唔好？我唔識欣賞喇。不過有人送俾我都會毫不考慮會要o既。

4runner、FJ Cruiser
美國地大車自然都大，喺呢邊都幾鍾意呢啲款

Sienna、Highlander
就普通啲囉，七人/八人車咁囉

Land Cruiser

呢款越野車都算叫做型仔o既(曾經)。

Celica
聽講呢部都有好多人鍾意，but not my cup of tea

MR2一代、二代、三代
一代經典，細個無錢買唔到，大個之後佢就停咗產囉。我超鍾意，尤其一代同三代。我個人認為第二代就比較醜但個入風口位其實都幾特別。 MR 車，即所謂中置引擎，後輪驅動。有緣o既話都真係想試一下。認識佢都係因為古惑仔套戲。

Supera
係九十年代仲興玩街跑嗰時o既名車。都幾型，不過家陣好難見到囉。

86
我對拓海架舊 86 無興趣，但新嗰部就唔同講法，聽講係一架 fun car，但用 Subaru engine。又無咩壞o既。Subaru 水平對向 engine 可變得低重心，聞說架車好 balance 咁喎，FR 車，前置引擎，後輪驅動。仲有，美國本身叫呢架嘢做 Scion FR-S 用 Toyota 副線去 sell 呢架車，後尾豐田取消副線品牌，直接掛翻自己咩嚟做就叫 Toyota 86，另外，Subaru 都有出同一款o既車，叫 Subaru BRZ

LEGO 40223 Snowglobe Limited Edition

呢個係另一款o既 Mini set，係 2016 年 Christmas o既限量版，其實買滿唔知幾錢就有得送。見佢呢次幾耐，就拆開佢同大家分享下，的確係幾靚。