HP Gen8 Microserver NAS 前傳 + 德國網購經驗

小弟一向都有玩開 NAS，第一次入手o既係部 QNAP TS-209II，但自從試過一次錯手將 reset system 以為係 reboot system 之後，就決心放棄呢個牌子。當然，因為覺得佢啲 package apps 太廢，又 mod 唔到，所以收佢檔。

之後就試過用人地唔要o既 notebook 去做 NAS + BT machine，試過 FreeNAS 同 OpenMediaVault，最後都係覺得 OMV 就手啲。將 OS 裝係 USB driver，boot 起部 notebook，再拆個 cd-rw 出嚟，裝個 HDD-tray 去加 storage，效果唔錯，用電量唔高，只係佢o既擴充性太低。HDD tray 只能容納 2.5" HDD。唔想加個外置 HDD 咁肉酸。

最後都係頂唔順，就買入一部 HP server 去玩 NAS solution。當然，唔係咩勁 server，佢只係部 microserver，HP N40L。咪睇佢係 server 就以為佢好貴，佢只不過成惠港幣貳千大圓正，同埋買咗啲 RAM 作為 upgrade。仲平過一部 QNAP/Synology o既 2 Bay NAS。不過，當然有代價喇，就係要自己搞掂個 OS。唔同人地啲 NAS 咁，插隻 HDD 入去即刻用得。身為半 IT 人o既我，最鍾意就係攪屎棍，試 OS 我就最鍾意o架喇。試過 WHS2011，OMV，DSM 後，發覺 DSM 都係最 user friendly，又兼且 stable，咁就一直用 N40L + nanoboot + DSM 5.0 呢個 solution，個 server 開咗都應該有 3 年，無事無幹。安裝詳情好多地方都有介紹，我喺呢篇 blog 就唔講住，留翻 Gen 8 部新機度講。簡單啲去理解就係用 nanoboot (linux core) boot 起部機去扮一部 Synology NAS o既 environment，然後就裝個 DSM 上去，我只係做實驗，唔好問我關於版權問題。

我部 N40L 無玩 RAID，因為我覺得唔需要：RAID 0 係加速，但死一隻 HDD 就 data 全死；RAID 1 係 mirror，用嚟減低 downtime；RAID 5 玩 parity bit，去減低因為壞一隻 HDD 而做成的 data loss。以上三種都並非 backup，我再重申，RAID  並唔係一種 backup，唔好再拗，你唔鍾意聽就算數。明o既就明，唔明就聽我講，實實際際咁買多隻 HDD copy 啲 data 出嚟。家陣啲 HDD 平到傻，咪再慳啲無謂錢，記得，相片係無價，唔好 take risk。自從 data loss 過之後我就有 3 個 copies。其實你如果有個信得過o既朋友，直頭同佢 rsync 就最 perfect。off-site backup 其實都好緊。

好喇，點解我要買部 Gen8 Microserver？因為身在外地，想同老婆家姐一家做個 NAS solution，人多 data 多 device 多，現今世代有個 NAS 中央處理 data 同 backup 實在係好事。加上，我又可以玩下嘢，remote site backup 我香港 server 啲相，實在係一石幾鳥。同埋最緊要夠平，你諗下，一部 HP server grade o既主機呢次只要 EUR193，兩仟港幣唔駛，你仲想點？呢次我都一樣買條 8GB RAM 去做一個小 upgrade。記得要買 ECC non-buffered RAM，唔係用唔到o既話唔關我事。

呢次我就喺一個德國網站網購，http://www.computeruniverse.net，有興趣自己去睇下，佢 gen 8 microserver 賣得好很平，同埋有啲 LEGO 都係好平。所以我有順手買埋 :P。留意翻，LEGO 唔係所有series 都平，只係 technics 同火車比較平啲，自己格下價喇，終之如果連運費平過 shop.logo.com 或者 hk.auctions.yahoo.com 就係叫做平喇。

long story short，呢個網雖然好似流流地，但我係收到貨的，所以可以放心購買。記得，我買咗兩盒大 LEGO，一個 server，一個 Dyson 配件，夾埋先 EUR29 運費，寄香港或美國都一樣價，另外，credit card 付款俾多 EUR 1.x，Paypal 就EUR 2.x。想小啲煩惱我就建議俾 Paypal，直接 charge EUR，咪用 Paypal 轉 HKD/USD，佢地個 Forex rate 差到爆炸，咪中伏！我就係中咗招。。。仲有 credit card 見你大 amount o係外國網站買嘢，佢會以為被人盜用，唔 approval 個 transaction，個網站係人手去 card center 攞 approval，如果唔順利佢會 send email 叫你 update 或者對一下 credit 資料或者轉 Paypal，但因時差問題，來來往往 email 可以玩你幾日，我就因為咁而玩咗四五日，真係吹到 B 一聲。

講咗咁耐，我呢次最大筆金額o既網上境外購物終於寄到家姐屋企。等我返去再做開箱文。