爆呔日記（上）

話說一個雨後天晴的一個星期四的早上，懷著半睡半醒的狀況下咁碌上車開車返工。當我倒車出行嗰時，聽到啲怪聲，點解咁響個轆咁響嘅？咁咪落車睇下囉。

嘩，頂你呀，成條呔偏晒嘅？情況如下。

我當刻心情係：點算呀？好似人在異鄉，特別淒涼。。。救助無門。我仲居然傻到諗住就咁碌到去油站 bump 翻漲條呔，我當時一定係痴 L 咗線。。。跟住，我就打電話俾半睡中嘅老婆。佢即刻成個醒晒。

然後，就定一定神，換。士。啤。呔！

其實過程就唔多複雜嘅，只係要付出小小體力同時間就會攪掂。
1. 首先要揭起車尾箱，攞救急工具同 spare tyre

2. 鬆開鎖緊輪胎嗰五口縲絲，記得，係鬆開，唔係拆甩晒。逆時針方向就係鬆開，你基本上可以成個人踩上去，因為縲絲估計都鎖得好很緊吓。
3. 然後攞個 jack，放啱位置，記緊放啱係施力位，唔係就撑爛架車，詳程就睇翻自己架車本 owners' manual。

4. 然後就慢慢 jack 起架車，直到個車轆離地大概半吋。
5. 咁你就可以好輕鬆咁扭甩啲縲絲，然後就甩個轆出嚟。

6. 然後你就放個士啤呔入去，對好五個縲絲窿位。
7. 用手上番嗰五粒縲絲，只需用手上緊，不用工具，等落翻個 jack 先再用個板手上緊。
8. 落翻個 jack。

9. 再用板手上翻緊啲縲絲，順時針方向就係鎖緊；同樣，你基本上要成個人踩上去才上得緊。
10. 外觀檢查，同埋 check 埋個 spare tyre 個呔氣，架架車唔同，我架 Accord 正常呔打 30 PSI， spare tyre 打 60 PSI；一 check 佢都係唔足呔氣，就去公司附近有免費 air 嘅地方去打足氣。

成個過程大概用咗半個鍾，咁就完成咗人生第一次自己換呔。

當年小逸事：話說小弟都唔係第一次玩換呔嘅，只係今次係第一次自己獨力完成。話說當年讀完書出嚟做嘢無幾耐，有個 friend 買咗架車，同就約埋一行四人玩遊車河，行到康山太古城附近，由於友人開車行得太近行人路，車轆磨膞，爆呔。嗰時四條人換呔雞手鴨腳咁。而踩上去板手去鬆縲絲就係我當時悟出嚟嘅方法，肥仔之名就自此而來，因為四條友得我一個踩上去而又踩得鬆嗰幾粒縲絲。