誰知哪時哪地哪蝴蝶拍動了那雙翼

網路遇知音。

初戀無限次個廣播劇小說。打好咗好多年，亦放咗上網好多年。真係由o靚仔擺到變o靚佬，擺咗十幾年，連 netvigator 都收埋檔。一向，我o既口味取向都較偏門或者有時間差。而且，在對的時間找到對的人本來就不易。以前，秉承互網網 share o既精神，只希望有緣人或有心人搵到想要o既嘢，所以先放咗上網。機緣巧合，最近有意無意的曲線透露咗自己個 blog。

同一時間，亦無意間 search 到網路上有其他人抄了我的手打版本。點解我知係抄咗我o既？因為，標點符號喇、隔行喇、錯字喇。每次我翻睇，都搵到有錯字。就係呢啲錯字，就成為了我的筆跡。

原來蝴蝶效應可以係十幾年前的一隻蝴蝶不為意的拍了一下翼，是因是果，我們無從得知。