股票與股息

小弟買賣股票一啲都唔叻，仲要係 C 多過贏。

以下幾隻股票小弟持有咗兩年以上(除咗隻 6 號仔)，點解 keep 到咁耐？因為我懶，由鬼佢。點知，係近年o既升巿有不錯o既升幅。

我知好多人見到我個 list 一定好失望，唓，學黃子華話齋，鬼唔知阿媽係女人，山係石頭，海係水。
 
0002.HK  中電控股         2015/8/24  63.88
0003.HK  香港中華煤氣 2016/1/25  13.52
0005.HK  匯豐控股         2015/7/8    59.08
0006.HK  電能實業         2018/3/6    67.43
0939.HK  建設銀行         2015/8/20    5.90

上邊個成本價全部己計埋手續費。老實講，上邊啲嘢有幾隻都係 short put 接貨，其實本身都唔想買(當時)，誰不知錯有錯著，隻隻都喺升巿中有小小正價差。

不過，以上每一隻都有一個相同o既特徵，就係有派息。

我知，我上邊隻隻都係悶股，人地 0700.HK 同時段都不知升咗幾多個價位喇。我承認我真係唔識買股票，我都學習中，我都希望大家搵多啲，同小弟分享下或者醒我幾招。

賺取股價o既升幅並唔係我呢篇 blog 想講o既嘢。股息先係我想講o既嘢。股息，就係好似你打俾人本去做生意，賺到錢就分紅翻俾你。如果你打本俾人去做生意，賺到好很多錢但又唔分紅俾你，你有咩感覺？當然，你亦可以成檔生意賣俾人(即係放咗啲股票去現獲利)。反正係兩個唔同玩法，都無話邊個啱邊個唔啱，總之賺錢就係叻仔。

假如你想有得分紅，就要揀啲會派股息o既股票。上邊嗰幾隻未必係好高息，但我想講o既係，最小都有成 4.3% 股息，即係話，點都多過你放 cash o係你個 saving account。點解會寫呢篇文？係因為早幾日做翻個統計，睇下實際收到幾多股息。原來真係要儲翻一段時間，你先捉到個 pattern。我知上網係睇到佢幾時派息，但我發覺都係要真係有貨係手你先會著緊去留意。


0002.HK  中電控股
派息每逢 3月尾、6月中、9月中、12月中
以我成本價嚟計，呢兩年派息為 4.25% -  4.4%，但留意，佢派 4 次息即係收 4 次手續費。唯一唔好處利潤管制。平平穩穩咁囉，肯定就唔會大升嗰隻。


0003.HK  香港中華煤氣
派息每逢 6月尾 (10送1紅股) + 股息、10月頭
以我成本價嚟計，呢兩年派息為 2.68% - 2.94%。呢隻比較複雜，原因係佢會十送一紅股。如果股價不變，即係賺多 10%。呢隻嘢，五年嚟都係於  10.59 - 15.6 俳佪。我知我呢個假設係唔合理，因為十送一紅股之後，股票理應相會除淨，即係股價會變成之前的 10/11。你諗下，如果公司值 $10，本身係 10 股，每股咪 $1 囉，但佢十送一，係原有資產不變下，資產(股價)不變但增發了股票，咁即係原本 $10 不再以 10 股攤分而係要用 11 股攤分，咁每股價格就會由 $1 變成 $0.909。無錯，如果公司業務無增長，十送一紅股基本上係無特別著數咗，因為你o既股權係無變到，全世界o既人都一齊多咗十分一o既股份。不過，你睇翻呢隻嘢，由2008年到家陣個 trend 都係升緊，我就算當佢無升度(以股價計)，但你手上股票數目多咗，咁你o既總股票價值咪多咗囉。所以如果你單以股息計，佢唔係特別叻。但如果計埋紅股後o既 Capital Gain 就唔同講法。我一直都懷疑點解佢要刻意用十送一紅股方式去壓低股價。壞處係你要接受有碎股o既出現，我相信家陣都無咩問題，唔似得以前好打電話去放碎股。同埋，咁做即係迫你將啲'分紅'唔直接變現為股息，以曲線方法扣留咗啲資金，但同時希望股價上升再令你成個股票價值高咗。呢隻嘢比較適合長長長長期持有人士。其實香港業務只佔佢大概 45%，不過香港收一蚊就賺你五毫子，你都無話唔利害。佢仲有水務，天然氣，同燃氣項目喺大陸，大概收一蚊就賺三毫半子度喇。

0005.HK   匯豐控股
派息每逢 4月、7月、9月、12月。
有時候，9月同12月派息會有小小提早或延後。
我以成本價計過，佢派息大概 5.96%。都算係咁，我咁多年嚟都係以股代息。貪佢股生股咁滾存。但缼點係即係無套現啲利息，你將筆錢瞓翻身落去。今時今日，銀行股未必係最好o既選擇，一樣要睇位做人，唔對路都係要閃，或者係做 option 去對沖。話你聽，小弟係初出茅廬嗰時，都已經月供過匯豐銀行，嗰時都無網紅教都已經識得咁做。講你知，我嗰時月供匯豐每股股價係 $12x ，無錯係過百蚊一股，最後我喺 $136 放晒。你諗下，如果你堅持持有到家陣，即係家陣都係仲未返到家鄉。所以話，任何股票你都要睇路，唔係話大公司就無事。


0006.HK  電能實業
派息每逢 3月、7月。
呢隻嘢，我買嚟博李氏家族將幾間公司聯合開股東會嗰時睇下有無咩特別搞作，原本呢個代號係港燈，但被佢用商業信託模式分拆咗去 2638.HK。以持有 2638.HK 去控原本o既港燈，變相，令港燈分紅更加彈性，即係睇下拉唔拉到李生車邊，唔知邊日即使港燈無錢賺都話要派晒啲錢佢都仲得(當然我都係發白日夢姐)。息率都有 4%。

0939.HK  建設銀行
派息每逢 7月
派息計， 4.4% - 4.93%。以大陸銀行計佢都算係咁上下。啲財務分析我就唔多講，因為我都無咩研究，我只係之前睇過佢啲財務比率好似係比較好。好處係，佢一年派一次息，慳翻啲手續費。

我知有啲股票可以有 7%  以上股息，例如 0281.HK。蘿蔔青菜，各有所愛。總之，不宜 keep 太多 cash，但又唔等於唔 keep cash，隨時留番一手嘛。買股收息係有需要。我個人好反對買基金，不便宜o既手續費加上彈性相對較低，買基金不如買 ETF，或者自己買幾隻股票甚至乎 2800.HK 同 2828.HK。總之，投資基金前真係要三思再三思。