話說小弟情人節早上跟車尾去睇牙，反正公司保險有 cover，見個有人甩底無去睇，咁醫生又有時間肯睇我呢個新 case，咪檢查下啦，順便洗埋牙。照埋 x-ray，佢話牙縫位可能有駐牙，話：一係就定期 check 住睇下有無嚴重到，一係就越快處理越好。咁我咪睇下有咩 time slot available。
嘩，星期四有位喎。但。。。邊有人大年初一去整牙o架。雖然我呢啲好現代化，但都係覺得唔夠大吉利是，所以改做星期六，是旦喇。
之後就去咗一間叫做富麗華o既酒樓食晏，英文叫 Furiwa。地方尚算整潔，侍應反應都叫幾好。裝橫就。。。好有八十年代 feel，其實都值得一看。但食物就真係好一般，點心味道方面我可以俾合格，但賣相就一般，佢雖然係推車仔，但好肯定係為咗慳成本，無開蒸氣，啲點心係唔熱！！！仲有，啲推車仔o既後生仔囡係講英文，你都無話唔好笑。叫咗三碟炒嘢，賣相奇差，味道十分一般，仲有一碟乾炒牛河變咗叉燒炒河，咁都嚟得錯！？定以為我係西人唔識得分咩係牛肉咩係叉燒？
總括嚟講，我唔會話我永世都唔會再試，不過可以的話，真係可以唔去的話都真係唔好去，又貴又唔好食，味精重就預咗，但我會話另一邊唐人街嗰兩間我會覺得好食啲囉。
仲有，去咗一間叫新華o既食肆買燒肉同燒鴨。燒肉可以，但半邊燒鴨點解可以無咗隻鴨翼？你唔係偷咗我雞仲可以係啲咩？其實我最唔鍾意中國人有時候做生意真係太唔老實，唉，身在外國，自己人都要呃自己人，怪不得有能力都唔想住係 Chinatown 附近，實為中國人之悲哀。。。
No comments:
Post a Comment