Synology DSM DS Photo 中討厭的 thumbnails 與 rsync

新年放假，又係時間 backup 下啲相。我啲相分別抄一份去 NAS 入邊一個 HDD，仲會抄多個 copy 去一個 offline HDD。

一直都相安無事。但話說今早行 rsync 嗰時，發覺佢不斷抄緊啲 '@eaDir'，其實佢應該係 DS Photo 入邊啲 thumbnails。由於有勁多相片，thumbnails 數量亦不少，容量事少，耗時事大。所以我就諗方法 rsync 嗰時同時 exclude 嗰啲無用o既資料唔抄過去。

首先，我地可以用呢句去找出所有 '@eaDir' move 去另一個地方，確定無用就可以 delete：

find /volumeUSB1/usbshare/photo/ -type d -name "@eaDir" -exec mv {} /mnt/cache/destination

or

find /volumeUSB2/usbshare/photo/ -type d -name "@eaDir" -print0 | xargs -0 rm -rf

然後做 rsync 嗰時，我地就可以行：

rsync -avr --progress --stats --exclude '*@SynoResource' --exclude '@eaDir'
 --exclude '*.vsmeta' --exclude '.DS_Store' /volume1/photo/ /volumeUSB2/usbshare/photo/

又學到嘢了。 

發噏瘋 - 我看陳同佳案

話說早排有個香梘人涉嫌喺寶島將佢當時o既女朋友變成非自然死亡，案件就當然轟動社會。而就香江驚慌而言，因為案件涉及境外司法管轄權，所以未就非自然死亡一事搜集足夠証據提出檢控，只能就洗黑錢一事作出檢控。

涉事人服刑及刑滿出獄，又再次引起社會熱議。

我無意在此作道德或良心批判應否去台自首。但就事件想提出兩三個思考點：
一、佢係'去'寶島自首，唔係'回'台自首。我覺得有必要搞清楚個 home base 係喺香梘，唔係寶島。此其一。
二、自願去寶島自首，個人覺得非常唔合符人性，好簡單，你明知一去就會被人關禁，而你係有選擇地唔離開香梘，我完全睇唔出有咩誘因要出國去寶島。我無讀心理學或者犯罪學，唔知涉事人心理狀況如何。我只知唔去係好正常，更何況係合法地有得揀。所以你話佢自願去寶島自首，我 唔 信 ！
三、合法性。成日都話法治社會，人地有權合法唔離開香梘o架大佬。你香梘未能提出檢控係你問題，你無輸打贏要o架喎。你可以話呢個係漏洞，係，但係係無辦法的。你無可能押佢去寶島o架喎，呢個係邏輯問題。如果你硬要以道德/良心o既批判要覺得涉事人一定要去寶島的話。其實同批鬥無咩分別。

呢個係我睇法，當然我知好多人會唔認同。我都歡迎討論一下。

貳零壹玖年送逃犯引渡條例修定之風波有感之種子

內地官方媒體以及通訊 filter 訊息及新聞，習以為常，但並不認同。
內地同胞惡意攻，失實評論，說三道四，盲目支持不義，我感可悲。

如要先要評論香港現況，我諗可以先了解一下香港呢個歷史遺留下來o既特殊地方，官人再各自思考思考。

簡單而言，本屬廣東新安縣的香港(Hong Kong)，
因南京條約，香港島(Hong Kong Island)被永久割讓給英國政府
因北京條約，九龍半島(Kowloon)，即界限街以南被永久割讓給英國政府
因拓展香港界址專條，新界(New Territories)及離島(Islands)租借給英國政府，即所界限街以北，深圳河以南以及附近近二百個島嶼都租借給英國政府九十九年。

自此，香港o既發展就同中國內地分道揚鑣。

在此，我有三點想提出嚟，比大家思考下，亦都係好多時連香港人自己都唔清楚或者唔知道o既背景。
一、九龍城寨/九龍寨城。寨城o既出現，就係基於拓展香港界址專條中，涉及部分係租借，並非割讓，即擁有權仍然屬於當時o既清朝政府。所以清政就係當時o既邊界，亦即九龍寨城、啟德附近設立海關以及駐防，以示管轄及主權範圍。英國人又尊重合約精神，未敢直接管治九龍城一帶，故出現三不管的九龍寨城這特殊地方。此乃香港近代史的重要一環，有興趣者實應該多加研究以及查証。
二、南京條約，北京條約與及拓展香港界址專條三者都在中華民國國立故宮博物院。如果說是要回歸，那，應該是回歸去哪一個政權？
三、亦因九十九年大限，界限街以北、新界以為離島o既土地擁有權將接近九七大限，故商界，銀行，地產商同當時港英政府反映憂慮，故有所謂香港前途談判出現。而結果係不單將新界及離島交回中國，同時亦無條件的將已割讓的港島及九龍半島送交中國。原因係英國覺得無險可守，如中國硬出兵武力收復整個香港的話，英軍於港島與及九龍半島的死守最終都會失敗，加上日不落帝國風光不再，決定將最後一個英國殖民地結束。

點解當年香港從殖民地走出來但又無獨立呢？有前因的，英美同中國有 deal，令到香港同澳門喺聯國中剔除於殖民地之列，導致日後無獨立出現。

而香港回歸中國而非中華民國亦係英美同有分參與的 deal。

某程度上，香港就係名不正言不順的回歸中國。我不會不承認回歸這回事，畢竟這是改變不了的事實，亦係英美中國合謀出來的事實，我提出，只係想大家認清史實同背景。

至於香港回歸後的狀況，有目共睹，不贅。

我會認為香港人不滿中國內地，此乃種子。

有趣分享，我都係再次查找香港近代史先明白新界(N.T.)何解叫新界，其實就係源自拓展香港界址專條。新界原來係一個形容詞，並唔係一個地名或區域o既名，身為一個生於香港o既香港仔都係今日先明白，實在失禮。

港股倉近況 - 貮零壹玖年柒月叁拾壹日

好很耐都無寫過股票相關，因為我實在無咩時間處理，港倉無咩變，只係政府債券己陸逐被贖回圖現了。

哈，關於香港o既股票，我做咗啲有趣o既統計：

0002    63.88    4.7%
0003    9.25      3.2%+10%
0005    48.16    5.4%
0006    67.43    4.1%
0939    5.75      5.2%

個價係我o既成本價連手續費，2015 開始陸逐持有。個 percentage 係個 yield，匯豐我係以股代息，煤氣嗰 10% 係十送一紅股而成本係因為十送一而降低了，似乎我要放棄 0006 買入 0003。

Moto X4 XT1900-1 rooted and wifi hotspot provisioning disabled

首先要講，你要 root 就要有心理準備部電話要 reset 一次，即係咩都無 L 晒。係無晒。。。第二，係有機會 flash 錯咗就會變磚。我部嘢途中就變咗部半磚差啲以為要買過部電話。

其實你去 youtube search 一下都有晒教學，不過你就要習慣一下啲印度口音。

大約個流程係咁：
1. Unlock boot loader
2. 裝 TWRP recovery for Payton( Payton 係 XT1900 嘅代號, version 3.3.1.0) Link
3. 裝 latest version 嘅 Magisk (我呢刻 version 係 v19.3) Link
4. 裝 latest version 嘅 Magisk Manager (我呢刻 version 係 v7.3.2) Link

開頭我 fastboot flash boot TWRP 係無開題， reboot 後係入到去 recovery，可惜我太懶，無睇清楚就 flash 咗個舊版嘅 magisk v15.3, 跟住咪 infinity boot loop 囉。真係老貓燒鬚。起初以為部機死埋要買過部新，點知佢又俾我入到去 fastboot ，咁即係仲有一線生機喇，咁我就拿拿林去搵個 android one version 嘅 rom flash 翻入去，點知個 rom 仲係 android 8, modem 一升咗終就九成九落唔翻，即係 once 你 upgrade 去 android 9, 你夾硬 flash 個 android 8 入去，就算俾你開到機入去，所有 wireless 都用唔到。所以我又死死地氣去搵翻個  android 9 嘅 rom，好彩又俾我搵到。咁我玩咗成晚就終於 unlock 到部機加回復原狀。

之後就再裝多次 magisk，v19.3 的。然後 magisk manager。一切順利。

重中之重，我係搵到 tethering enabler (link)去 stop 仆街 ATT wifi hotspot provisioning。即係啲電訊商可以利用 android system 一個內置 function 去 check 下 service provider 俾唔俾你用 hotspot，如果唔俾，就會開唔到 hotspot function。我搞咁 L 多嘢就係要 disable 佢個呢個  provisioning。好彩俾我整到。

完。

2012 Honda Accord 2.4L LX 換油記連精彩相片。

我都知成日都係得啲文字好鬼悶o架喇。呢次就加啲相喇。

由於我個人唔多鍾意 jack 起架車。所以就用個 ramp，包唔會札親自己。但又由於個 ramp 太斜/架車個 bumper 太低，要自制搭條木開上個 ramp 度先唔會刮底。。。

跟住就捐車底囉。原本有粒 nut 係 17mm，但我改裝咗加咗個 nipple 俾佢，方便我換油，佢叫 EZ-Valve，有興趣可以試下。

呢個就係我買佢o既原因，為可只要駁一條3/8" I.D.(即內直徑)o既膠管，你就會發現佢方便無比。。。

直落個舊筒度，唔駛滴到周圍喺呀師傅！
不過呢，換油隔都係避免唔到污糟。。。 

跟住就係入翻啲偈油入去，都係跟翻偈油蓋有寫 0W-20，我一般都買 Mobil1，實無走雞。成惠USD$23 5 qt.，油隔就用 M1-110/M1-110A。成惠好似 USD$8。我一般換油就順便換埋油隔，又唔係咩錢，無謂咁慳，油同油隔唔怕換得勤力啲。

另外我發現 transmission 底有滲油情況如下：

 再上網睇下，估計應該 transmission 出 intermediate axle 個油封滲漏，估計都應該自己換到，但似乎工程有啲大，所以等我再上網再入研究下先再算。

多謝收看。

HP Microserver Gen8 + jun's loader 1.03b + DSM6.2.2

我寫呢篇文係因為我唔見有寫中文o既人做過實戰，固此我特此一文，以此為記。就算俾你去大陸啲黑群 forum 都多數係左抄右貼， 或者係重覆人地行 ESXi virtual machine 去行 DSM 6.2.2。

行 virtual machine 其實係一個幾好o既做法。因為你扮一張 intel network 係 virtual environment 但你個肉身都仲係 Gen8 onboard 張 boardcom NIC。但我仲未諗掂啲 HDD 要點分同埋怕炒咗嗰時唔知點救所以就無玩到 ESXi。或者香港o架 dead machine 可能會試下呱。。。

而我呢次真金白銀再賭上我自己o既 data 去做實驗。

我部機係 HP Microserver Gen 8, Xeon E3-1220L, 12GB ram。我之前試過升去 6.2.1 或者 6.2.2 都係會上唔到 network，估計原因係之後唔再 support  boardcom 個 onboard NIC。又見網上有人寫話係 support Intet o既 NIC，咁我就 ebay 咗張 Intel o既 E1G42ETG1P20，成惠USD$11。

我試咗兩件事。一、 fresh install DSM6.2.2。二、upgrade from DSM6.2 update 2。兩樣都係成功o既，但先決條件係你要有張 intel o既 network card。

雖然我成功 upgrade 咗去 DSM6.2.2。但個 internet radio 自己加嗰啲 link 都係唔識得出聲。。。

iLO4 latest firmware

https://pingtool.org/latest-hp-ilo-firmwares/

原來仲有更新，由 2.54 升到 2.7。無問題。要解壓兩次攞到個 ilo4_270.bin upload 入去。

HP N40L Microserver 狀況

唉，寫得呢遍都都係瀨嘢o架喇。話說個放喺香港個 server offline 咗好一陣子，到自己途經香港嗰時就親手會一會佢，點知俾我發現個 mac address 怪怪地，一堆唔知咩 FF EE 怪 number，上經隱約搵到話係個 onboard NIC 瓜咗，好喇，咁我之前有張 PICE lan 卡o架喇，咪用佢囉。點知落咗兩日機，佢突然無晒燈，成部嘢唔著，估計係佢個火牛都瓜埋，唉，仲等我突登買張 remote access card 嚟俾佢方便我 remote restart 添。無喇，家陣咩都無喇。

雖然我已經買咗部 DS418Play replace 咗部 N40L，但我仲認緊好唔好買翻隻牛去救翻佢。。。

Synology DSM 救 data (xpenology/黑群)

話說自己衰多手走去 upgrade 去 DSM 6.2.2。jun's loader 1.03b 原本係無問題，理論上係上到 DSM6.2.2，起碼有人係用 ESXi 係行到o既。但如果你諗住喺 HP Gen8 Microserver baremetal 咁裝呢，唔好意思，as of today，實測佢只係 support 到 DSM6.2，最多俾你裝埋update 2 都無事。

如果你多手 upgrade 去 DSM6.2.1 or DSM6.2.2。咁你成功 upgrade 完之後，恭喜你，你部 xpenlogy DSM 係會喺你個 network 度消失。估計原因係佢 upgrade 咗之後，會改埋個 loader 入邊一啲 setting，導致到認唔會 native onboard 嗰兩個 NIC，即係上唔到網。。。聽聞話自己裝張 Intel o既 network card 就可以避開呢個 bug，小弟未有實測，但可能會試，睇下 ebay 搵唔搵到張平卡。

呢個 5/27 o既 long weekend  就只喺在救 server。。。呢次都唔算好大鑊，只係好煩。因為自己又進而衰多手 wipe 咗個 system partition，就算俾你插翻入去 NAS 都唔可能即刻認到 data partition。但起碼我知係無炒到o既，只係要花時間。真係遇難題又令自己進步。

https://michaelheap.com/mount-synology-hdd-linux

嗱，以防個網址有日瓜咗，小弟再 repeat 一次同加少少自己o既解釋。情況係咁o既，你 DSM 個 data partition，就算俾你用 ubuntu boot 起求其一部機然後諗住用嗰 USB dock 去撈 data，係唔得的。因為佢係 set 咗做 RAID，而佢即係行緊 ext4 都唔可以直 read。你係要用 mdadm 去 mount 起個 RAID volume 先，然後先可以用 mount 嚟 mount 成 ext4 先抄得翻啲 data 出嚟。

$ sudo mount /dev/sdb2 /volume1/test
mount: /media/test: unknown filesystem type 'linux_raid_member'. 

你會見到佢鬧咩'linux raid member'，即係我先前講唔可以直 mount。

$ sudo mdadm --assemble --run /dev/md0 /dev/sdb2
mdadm: /dev/sdb2 is busy - skipping

嗱，呢個就係話你聽其實已經 mdadm 咗。

ls /dev/md

呢個就係睇下 md 咗咩鬼嘢。

$ sudo mdadm --stop /dev/md127
$ sudo mdadm --assemble --run /dev/md0 /dev/sdb2
 

$ sudo mount -t ext4 /dev/md0 /volume1/test

搞完呢一大輪嘢你就可以 copy 翻啲  data 出嚟。起碼無 data loss，只係人生無咗啲時間。如果個 HDD 唔係行  ext4 而係行 btrfs，咁我都唔知可以點救，因為我暫時未親身實證 linux 可以 mount 得起。

發噏瘋 - 尚在人間

很久不見了，差不多都五個月無 update。其實呢半年好多嘢可以 share，但弊在小弟好懶，連打個字都懶。所以就無更新。

港股期權呢幾個月做咗好少嘢，但勝在都叫做正數，其實應該堅持繼續做下。同埋呢，一通期權呢，唔好以為裸 short 期結要行駛嗰時夠錢就大安指意。原來佢係要收手繼費o架！真係親歷其境先深刻，下次就知要醒水，寧願平咗佢都無咁多駛費。

美股方便，

TLSA 跌完起翻又再跌翻，反正我無再持有，幾個一明朗因素：

• 身邊有人入去 Tesla 做咗一陣就走翻出嚟，睇嚟入邊工作環境都幾 tough。
• 上海有 Telsa 會自爆
• 運量未及早前吹大咗o既數量
• 身邊有好多 Model 3 準買家話等咗兩年都無佢想要嗰個 trim，焗買高配準嗰款。

NVDA 亦止蝕咗，cryptocurrency bubble 爆破。

完成兩項止蝕後，年頭 -18%。跟住喺 $17x加注 AAPL，尋日睇翻，成個 account 居然+2%。多謝 AMZN 呢隻好股。繼續持有 AAPL，AMZN，BRK.B，GOOG。

期間亦去咗昆山出trip，一去都去咗三個幾禮拜。

想考個電工牌。

Python 個小 project 叫做完成咗七成，當中又有嘢學到。

錢呀，好想搵多啲錢呀。

八字

話說小弟久唔久就睇下自己八字同強行研究一翻。

自己本身屬木就一早都知，以為水生木，戴眼鏡戴翻啲水屬性顏色就包無走雞喇。點知近來一查先發現自己原來最缺係火，所以戴紅色o既嘢補補啲火都不足為過。唔駛死捉住黑色眼鏡唔放。。。

同埋特此記地十天干同十二地支去提醒自己，成鬼日都背唔到。。。

十天干：甲乙丙丁戊己庚辛壬癸
十二地支：子丑寅卯辰巳午未申酉戌亥

讀音：壬(吟)癸(季)寅(人)卯(牡)巳(嗣)戌(蟀)亥(害)

甲	乙	丙	丁	戊	己	庚	辛	壬	癸
木	木	火	火	土	土	金	金	水	水
陽	陰	陽	陰	陽	陰	陽	陰	陽	陰

木生火	火生土	土生金	金生水	水生木
木克土	土克水	水克火	火克金	金克木

生我者為印(正印,偏印),我生者食傷(傷官,食神),剋我者官殺(正官,七殺),我剋者為財(正財,偏財),比和者比劫(劫財,比肩)

發噏瘋 - 流行曲

近年廣東話流行曲有每況越下o既情況，原因有啲似雞同雞蛋問題。

小弟其實一般都聽歌唔揀人聽，即係聽個音同旋律，覺得啱聽就會聽，未必有深究歌詞意思。不過好多時係聽舊歌比較多。但原來有啲朗朗上口o既歌，如果細心留意歌詞，即使係李克勤，亦有啲意識大膽或者過界o既歌。歌，有時候真係唔可以亂唱，真係要情願拘謹似君子。

發噏瘋 - 忽發奇想之 PPL

其實都唔係奇想嘅，只係花費嘅金額有啲多姐，又未致於遙不可及嘅。

其實係我突然海鮮痕想考私人飛機牌。你問我係唔係對飛行好大興趣呢？又未必係好大，但就係想試下，想做一啲常人唔多人做嘅事情，又想睇下考咗個 PPL 對我日後生活有無正面影響。

唔知最終會唔會做呢。

發噏瘋 - 追劇

奇幻嘅故事總教人想一直追看落去，所以追劇一開始咗就一直想追到睇完為止，但如果追完套劇又會有失落感，做人真係好矛盾。

我幾時先得閒睇埋 west world season 2 呢。。。

Python - Open a new Tab instead of new Window with Selenium with Firefox in Python

Pretty crazy to work with multi-tab in Firefox with Selenium and here is some tips...

1. locate webdriver_prefs.json under \\python_path\Lib\site-packages\selenium\
2. set "browser.link.open_newwindow" from 2 to 3
3. save before exit.

In program code, I did try using send_keys(Keys.CONTROL + 't') but it didn't succeed.

from selenium.webdriver.common.keys import Keys
driver.find_element_by_tag_name('body').send_keys(Keys.CONTROL + 't')

You have to use javascript to call a new 'window'(tab) and then switch the current 'window'(tab) to newly created 'window'(tab)

driver.execute_script("window.open()")
driver.switch_to.window(driver.window_handles[-1])

After all the operation, you can close the newly created 'windows'(tab)

driver.close()

Remember, once you close the current 'window'(tab), you have to switch the 'window'(tab) back to first one(or another one) to access 'driver' or you will get an error saying the content has been dropped.

driver.switch_to.window(driver.window_handles[0])

A note for myself and for whom it may be interested in

發噏瘋 - 牛一

老撚套，我唔明公司點解要將人o既 private information 公佈出嚟？

你話係十月之星咪算喇，點解要公開 exactly 個日期先？有無問過我想唔想公開我私人資料？

Python - 學會了 data scraping

Data Scraping 意思指從網路上獲取數據，而我o既玩法差唔多係等如 WYSIWYG。

本來要用 browser 逐條 link click 入去先睇到，家陣原來啲 programming 好很方便，有齊晒 module 俾你 remote control 一個 browser 去瀏覽網站，繼而透過獲取返嚟o既 HTML 再做分析，只抽取有用的部分為己用。而當中有一個叫 Selenium o既 package，佢可以好有效咁抽取 HTML 中的某啲 element(s)，咁喺個 program 入邊做咩都得喇。

最過癮o既地方係，佢可以模擬返你瀏覽o既動作去 click，入 username 或者 password，針對動態改變o既內容網站就得心應手。如果只針對靜態網站，我估用 beautifulsoup 可能會仲快手啲。

我o既用途除咗想 scrap 吓 craigslist 之外，仲想 download 翻報紙啲文章留為己用。

真係比我整到個小 program 喎，好過癮。

轉台不似預期之陰魂不散

話說小弟兩個月前，即八月，由 Google Fi 轉台去 Walmart o既 FamilyMobile。以為大功告成，點知，佢原來八月轉台嗰時收咗我兩次錢。

第一次 charge 係由我 online 做 activation+transfer number 所引起的，但由於當時久久不能成功轉台，故我打去 CS 問佢搞咩兼再做一次轉台，咁佢就再 charge 多我一次月費，原來以為佢會自動取消第一次o既收費，或者順延一個月才 renew 個 prepiad plan，好顯然係我諗多咗喇。咁我咪又再一次打去 service hotline 去追討多 charge 的費用。由於我啲英文好水皮，第一時間就想同 CS 玩 chatbox 去搞 refund，可惜，逢係關於帳單，錢銀嘅都要你打去 CS hotline 度處理。好喇我硬住頭皮打去 CS。除咗我英文屎，仲有就係我肯定佢啲 CS 係印度人接聽，因為 FamilyMobile 啲 CS service 已經外判咗俾 Tracfone，出名地差。。。

好喇，第一次打去，佢話 check 唔到有 double charge 喎，叫我去 bank/credit card 度處理。。。唉，我 system 都睇到俾咗兩次錢，點會無 double charged 呢？但係佢死都唔同我處理，淨係識得叫我 contact bank…無功而還。

食完晚飯，心有不甘，再打去 CS 度問。咦，呢次呢個 CS 好好喎，佢都話見到同一個 number 同一金額 charge 咗兩次，佢都同意係收多咗錢，可以 refund。個心即時鬆一口氣，等佢個 system load 啲資料出嚟等到天荒地老。。。最後對埋個 credit card 最尾 4 個數字，就話 ok，等 3 至 5 business days 就會過數，咁我滿心歡喜咁等喇。

點知，等下一日，等下又一日，等咗成個幾禮拜都唔見到 refund 嘅？

如是者我又硬住頭皮咁又打多次去 CS hotline，又重覆一之成個 case 俾佢聽，呢2佢又一樣好順利喎，又係話見到同一 service number 同一金額 charge 咗兩次，同意 refund。又係同 credit card 尾 4 位 number，加一陣佢 load system 嘅時間，3就話 ok 啦，又係 3 到 5 business day 先會過數，呢次仲俾埋 transcation number 我添，我亦問佢有個 case number 等我有喵問題可以 reference 或者 follow，佢就話無開 case number，因為都做咗 refund, problem solved，所以無 case number。佢話有問題就再打去 hotline，有 record 喎。好啦，無奈地停多佢一次喇。

今日，我終於係 myfamilymobile.com 見到個 refund record，同時間，credit card 都終於出現咗個 $56.xx 嘅 credit。

睇嚟，我又可以準備搵 plan 轉了。

發噏瘋 - 孤獨的 python 新手 - Metra alert message + Python + Telegram bot

以前睇過啲疑似成功人士o既分享。佢地話，要成為成功人士o既首要條件，係要克服孤獨感。而我理解為習慣孤獨感。

又有個小故事同大家分享。

話說小弟家陣要日日坐火車。oh, wait a minute, to be precise，係差不多日日搭火車先啱，因為有時我係會揸車返工，正所謂：有得揀，先至係老闆。但我選擇揸車而唔坐火車有三個可能性，一、有需要，可能要早走或者放工後要去別處，無車返唔到屋企；二、火車 delay，因為未上前已知道火車 delay 的話，我會選擇直接開車返工而費事同佢癲，呢度塞火車唔係人咁品。早兩日就因為突然 severe thunderstorm 吹冧咗棵樹，downed tree on track。咁我就坐咗喺架火車度三粒鍾。。。五點十分上車，八點半先返到屋企。痴線。。。三、心情唔好，係呀，心情唔就要開車去舒緩一下情緒。

由於火車會因種不同原因 delay，咁你係要周不時去火車公司個網頁去留意佢有咩資訊發佈，了解下發生咩事。其實你上咗火車之後，了解嚟都無咩叉用，就好似肉隨砧板上咁，無埋站你係落唔到車。你啲資訊好多時都話你聽 delay duration 係 unknown。同埋即使話過你聽 delay 10min.，過咗廿分鐘後佢可以出個 update 話要 delay 15min.。但明明過左廿分鐘，你先話會 delay 15min. 咁即係講嚟都多餘喇都唔準。同時又即係好似隧道啲廣播一樣，話你知隧道內交通暢通或者交通擠塞一樣：我開緊車，唔通我唔知道佢係擠塞定暢通咩？你話咗知擠塞對事情都無咩幫助o架啦，唔通你話咗我知會即刻暢通翻？唔會吖嘛！嗱，講翻正題，為咗係上火車前了解下火車有無已經 delay，你可以選擇去 metrarail.com 去睇下有無咩 alert message。但我成日都好討厭喺電話度睇網頁，加上佢個網又多 script，load 起上嚟好L慢，所以萌生起一個想法，我可唔可以寫個小 program 去淨係 capture 佢 alert message 啲訊息然後再 send 個 notification 俾自己呢？咁就開始咗我呢個 programming 小 project。

呢次我就係用 python。貪佢簡單易學多 api 同埋古天樂名曲—今期流行。整整下，就變由原本諗住每隔十五分鐘 check 一下，如果有新嘢就通知我，變成我要去 trigger 一下先去睇下有無更新。因為個做法好似會容易啲同埋實際啲，你諗下，好多時都係你去緊坐火車嗰時，即返工放工嗰下，同埋，坐緊嗰下想睇下有無 alert，其餘時間話之你停駛都唔關我事，無謂不斷 polling 即係垃圾訊息。所以方式就改變咗，跟手就再 twist 到利 telegram 去做呢個 solution。

玩咗三個禮拜，終於叫做搞掂用得。

做完之後就好似好失落唔知做咩好。分享俾人聽都好似無人想聽、聽得明或者覺得有興趣咁。就連寫 program 遇到困難想問下有咩 approach 去解決好都好似同樹洞講嘢咁，無人想/識/有經驗去答你。唉，感覺好孤單，好似呢個世界都無呢個需要，只係自己多多事幹，嫌三嫌四o既廢中(頹廢中年)咁。。。

今次都有啲得著。
一、就係需求主導，當你有嘢覺得唔方便，而你又有心想解決，就會有動力想去整啲嘢，就算唔識都會學到識。漫無目的無 mission 去學一樣但又無用的好飄渺，好難學得好。
二、不斷修正，起初諗o既 idea 其實同成品係有啲偏差，係成個 methodology 唔同咗，因為現成有啲簡單啲o既 solution 而同時間做到差唔多o既效果，何樂而不為？
三、認清需求，諗真啲你想要啲咩，無論你所以的資訊、次數。
四、平台，我今次用咗 telegram，係因為我有，加上網路上啲人又話好易整個 telegram o既 bot，所以就揀咗佢。但後來發現，原來 telegram 無我想像中流行，周圍問人十個先得一兩個有用 telegram，好彩唔係用嚟搵錢，唔係就中伏了。

成個小 project 完成後，發個成個過程終都係自己搞掂，做完又係自己用，感覺好很宅。。。即刻有莫名o既孤獨感。為咗要成為成功人士，就等我慢慢習慣佢啦。(白痴，咁呢個世界上大把成功人士啦)

下次有機會介紹下用 python 加 telegram bot 去做到我想要O既 message alert。

廢噏完畢。