自動錶

個人嚟講，我係比較有時間觀念，可能係細細個嗰時阿媽已叫我戴錶同灌輸守時o既觀念。話雖如此，我都非聖人，我亦有遲到的時候。不過，係能力控制底下，我都會準時/早啲啲到。

錶，我就戴咗廿幾年，小弟一隻 G-Shock 都未擁有過，亦沒有 Baby-G。咁我係戴咩錶大呢？答案係一隻由日本買翻嚟o既 ALBA。係阿媽o既朋友去日本旅行搭單翻嚟，我梗係無咁富貴有得去旅行喇。

呢隻嘢由 1997 年到家陣都叫做仲行緊。

之後，讀完書出嚟做嘢， 就自己第一次買咗隻錶俾自己。(我無咁富貴，買勞。。。)係買咗隻 Seiko 5。自動錶一隻。2005 買的，一戴就十年囉。

 嗰時買佢係貪佢夠型，黑鋼，同埋未試過自動錶，都係 700 蚊，咪試下囉。戴咗咁多年，好似 so far 都未見過有人同我戴過同款o既錶。 Seiko 石英錶就固之然大把人有喇，自動錶都唔小人有，但呢款唔知點解無咩人戴喎。真奇怪。呢隻嘢，只能靠手部擺上鍊，並唔可以好似啲勞咁扭個 dial 去上鍊。呢隻入門嘢，機芯唔會好複雜，所以無得手動上鍊。

隻錶，佢唔係特別準，相反，佢每兩個禮拜就會快起碼 5 分鐘，你放底佢三日唔戴就會無晒動力。但係只要你拎起佢 fing 幾下，佢又會再次重生，默默的走過每一分每一秒。唔準，己成為戴佢的其中一個理由。每次調翻佢個吓，都好似同佢溝通咁。 要準o既，我戴隻 Casio 石英錶夠曬準喇。

我睇人的確會留意人地戴咩錶，但又我未至於話睇高或睇底人戴咩錶。只係，如果你係戴自動錶的話，我會覺得你對生活至小有小小追求的一個人，哪怕是一隻平價的自動錶。

我對錶款都有小小要求：
- 盡量唔買純指針o既石英錶
- 真係要買石英或電子錶，就要跳字式
- 唔鍾意枝大秒針唔郁o既錶，用咗嚟計時個隻，即係 Seiko 最常見三圈式嗰款。

我個人就係咁，懶係型。我，就是我，就是跟別人有點不同。

下一次 ，分享一下關於呢隻 Seiko 5 的個人小故事。

我的 Macbook Air

十幾年後o既我，終於擁有了平生第一部蘋果手提電腦。

佢係一部 Macbook Air，碰巧 Best Buy 做緊特價，13吋稅前特價 USD$750。好過去買部二手電腦。反正，同老婆一人一部電腦唔駛爭。

其實幾年前都買過部二手 Mac Mini，但用落好似唔多順手，希望呢次 Macbook Air 可以同佢有幾好的溝通喇。

人一世物一世，咁就開始了蘋果電腦生活。十幾年喇，終於一償心願。

誰知哪時哪地哪蝴蝶拍動了那雙翼

網路遇知音。

初戀無限次個廣播劇小說。打好咗好多年，亦放咗上網好多年。真係由o靚仔擺到變o靚佬，擺咗十幾年，連 netvigator 都收埋檔。一向，我o既口味取向都較偏門或者有時間差。而且，在對的時間找到對的人本來就不易。以前，秉承互網網 share o既精神，只希望有緣人或有心人搵到想要o既嘢，所以先放咗上網。機緣巧合，最近有意無意的曲線透露咗自己個 blog。

同一時間，亦無意間 search 到網路上有其他人抄了我的手打版本。點解我知係抄咗我o既？因為，標點符號喇、隔行喇、錯字喇。每次我翻睇，都搵到有錯字。就係呢啲錯字，就成為了我的筆跡。

原來蝴蝶效應可以係十幾年前的一隻蝴蝶不為意的拍了一下翼，是因是果，我們無從得知。

爆吠日記(下)

用咗士啤呔碌咗幾日，都係時候處理下問題，唔係連士啤都收埋皮就真係喊都無謂。

- 首先，去超巿買 pack 補呔用牛根。詳情自己去 youtube search 嚟睇，人地啲示範好詳盡。
- 然後，就準備一個吱吱壺，裝啲番梘水。
- 再 bump 漲翻條呔，噴啲番梘水落條呔度，你就好快會搵到漏氣位，因為漏氣個位個好似啲蟹咁不斷噴泡泡。
- 搵到出事位置，你就想盡辦法夾翻支釘出嚟。而我o既 case 係，支釘插入太深，係夾唔到o既，所以唯有索性推支釘入去無眼屎乾淨瞎。
- 跟住就用牛根補呔
- 再打翻氣，等佢一陣，確認無漏氣，就同相同步驟咁換翻條呔。

是次得著如下：
- flat tyre 好小事，係處理到的
- spare tyre 都要得閒 check 下有無氣，唔係俾仔換到都無用

爆呔日記（上）

話說一個雨後天晴的一個星期四的早上，懷著半睡半醒的狀況下咁碌上車開車返工。當我倒車出行嗰時，聽到啲怪聲，點解咁響個轆咁響嘅？咁咪落車睇下囉。

嘩，頂你呀，成條呔偏晒嘅？情況如下。

我當刻心情係：點算呀？好似人在異鄉，特別淒涼。。。救助無門。我仲居然傻到諗住就咁碌到去油站 bump 翻漲條呔，我當時一定係痴 L 咗線。。。跟住，我就打電話俾半睡中嘅老婆。佢即刻成個醒晒。

然後，就定一定神，換。士。啤。呔！

其實過程就唔多複雜嘅，只係要付出小小體力同時間就會攪掂。
1. 首先要揭起車尾箱，攞救急工具同 spare tyre

2. 鬆開鎖緊輪胎嗰五口縲絲，記得，係鬆開，唔係拆甩晒。逆時針方向就係鬆開，你基本上可以成個人踩上去，因為縲絲估計都鎖得好很緊吓。
3. 然後攞個 jack，放啱位置，記緊放啱係施力位，唔係就撑爛架車，詳程就睇翻自己架車本 owners' manual。

4. 然後就慢慢 jack 起架車，直到個車轆離地大概半吋。
5. 咁你就可以好輕鬆咁扭甩啲縲絲，然後就甩個轆出嚟。

6. 然後你就放個士啤呔入去，對好五個縲絲窿位。
7. 用手上番嗰五粒縲絲，只需用手上緊，不用工具，等落翻個 jack 先再用個板手上緊。
8. 落翻個 jack。

9. 再用板手上翻緊啲縲絲，順時針方向就係鎖緊；同樣，你基本上要成個人踩上去才上得緊。
10. 外觀檢查，同埋 check 埋個 spare tyre 個呔氣，架架車唔同，我架 Accord 正常呔打 30 PSI， spare tyre 打 60 PSI；一 check 佢都係唔足呔氣，就去公司附近有免費 air 嘅地方去打足氣。

成個過程大概用咗半個鍾，咁就完成咗人生第一次自己換呔。

當年小逸事：話說小弟都唔係第一次玩換呔嘅，只係今次係第一次自己獨力完成。話說當年讀完書出嚟做嘢無幾耐，有個 friend 買咗架車，同就約埋一行四人玩遊車河，行到康山太古城附近，由於友人開車行得太近行人路，車轆磨膞，爆呔。嗰時四條人換呔雞手鴨腳咁。而踩上去板手去鬆縲絲就係我當時悟出嚟嘅方法，肥仔之名就自此而來，因為四條友得我一個踩上去而又踩得鬆嗰幾粒縲絲。

LEGO 40220 London Bus

小弟其實都算係半個 LEGO fan，唔知同細個無得玩有無關係呢。其實我都買咗好幾副 LEGO o架喇，為咗佢，我就破下例咁放下相喇。(其實係平時自己懶，唔放相喺 blog 度...)

呀，我有個習慣，就係唔鍾意貼 LEGO 啲貼紙，因為好鬼易甩。

NAS 死 HDD

話說小弟 n 星期前的一個星期四返到屋企，覺得個廳有啲怪聲。明查暗訪下，發現啲怪聲由部 NAS 傳出嚟，仲有一啲似係不規律但又有小小規律o既聲，個心即時涼咗一下，仲即係由心叫咗一聲：仆街喇。

跟住就拿拿淋撻著部電腦，再 login 入去 NAS。咦，個 DSM 仲話三隻 HDD 都 healthy 喎。但當我 click 入去個 storage manager 度睇。屌咗一聲，真係有 reallocated sectors，咁咪即係有 bad sector。唉，點解連個天都唔鍾意個 HDD？(我當然唔會話個天唔鍾意我喇，佢只係唔鍾意個 HDD ！) 當刻心情，實筆墨非所能形容，係灰到爆炸。

即刻個部處：
1. 搵個仲未開箱個 WD RED 3TB 抄啲 data 出嚟
2. 上網買個 HGST NAS 3TB HDD (成惠 $119.9)
3. 上網買個 Orico 2 bay copier (目的係新 HDD 可以方便  1:1 copy)
4. 上網做  RMA

記得上次個 Toshiba 3T HDD 係喺 newegg 度買，第一時間睇翻幾時買同幾錢。嘩，頂你呀，一月尾買，七月頭就瓜，真係化學。我當然就即係去 Toshiba 個網頁查一下喇，三年保養，即係有得 RMA 喇。我就用番佢寄俾我個 packing，入箱，create account，申請 RMA，印張 RMA form， print 埋 shipping label (係要自費的，又用成 USD10)。

記得，佢要求個盒要寫個 RMA# ，咁我就寫夠四面，唔好同我講睇唔到喇。2 日後就寄到，再過多兩三日佢就寄出個新 HDD，歷時一個星期鬆啲就 HDD 到手。檢查個 label，貌似係全新，唔似係 refurbished。個心就舒啲咁。

至於個 Orico HDD copier，唔知點解大家都係 3TB，一隻係 WD RED 3TB，一隻係 HGST NAS 3TB，佢唔識 1:1 copy，原因不明，暫時未能做到我買入o既原意。。。

Anyway，死 HDD 叫做暫告一段落，俾咗個借口自己買多咗隻 HDD。記得，奉勸各位朋友，記得要 backup，唔係後悔莫及，唔好儲嗰小小錢呀，家陣 HDD 價錢好平，唔好慳呢啲錢呀。

Philadelphia 費城遊記第一天 (補遺來的)

費城，小弟都係第一次嚟。

由 O'hare 飛機去費城大概需時兩小時。一到步，機場場感覺不錯，光線充足，唯獨廁所就有小小污糟。

到步後，內子表姐來 pick up。然後坐 Train 入巿區。美國坐 Train 個 style 同香港好唔同：香港人坐火車習慣了先買好票，跟住用票入閘，跟手安然的坐上火車，到達便下車，用票出閘。但是在美國，他們的習慣就截然不同。當然你是可以先買票，或者你可上車先同查票員買票，不過，就有機會貴啲。

啲火車開到半路中途，佢就會嚟查飛，punch 埋張飛。用'香梘人'嘅角度嚟睇，簡直係傻兼浪費人力。你諗下，每卡車都要有條友去查飛，成件事真係柒到無朋友。花啲錢做個 ticket system 咪得囉。不過講返轉頭，香梘嘅鐵路算係唔錯 no matter 個 ticketing system,  operation,  服務，效率，指示及清潔都做得好好。仲有仲有，就係價錢其實真係算係平！如果要你撘一個站要收你廿蚊港幣，你接唔接受到？我唔夠膽話人身在褔中不知褔，不過，當你成日要屌香港有幾唔好的同時，你走去外國在地生活同體驗一下才再評論吧。

講翻正題，一下火車就到了當地的唐人街，到一家小店吃豆漿，粢飯。是，是久違了的豆漿跟粢飯。(突然想起當北京遇上西雅圖的對白：豆漿，油條)。味道還可以，只是店內的烏蠅多了點。唉，點解唐人鋪頭老是這樣？這亦是小弟不喜歡到西人地方食中餐的原因。

吃過後就動身到 Liberty bell 一走，傳說的 bell,  它的特點就係有條 crack。它比想象中有點細。我本來以為老蓮咁大的。我即時諗起曾幾何時沙田火車站都有個大鐘，大又大過人，佢又一樣咁有歷史意義，但可惜無咩香港人 care。

之後就走到 Liberty hall,  就係那三位重要人物草擬獨立宣言的地方。走走看看。我呢啲外國人當然未能好有感受當中的偉大同感動。不過，認識一下別國的歷史也無壞。

跟手，就跑到鑄幣局參觀參觀，這是小弟更為有興趣。美國就是挺不錯，很多地方就是免費入場，中國在這點不知何會何月才能學得到。在鑄幣局，你可以認識到整個鑄幣過程，有詳細的圖文解說，那當然是英文啦。嘩，人家的生產線有椅子坐的，比好多其他工廠都來得舒適。

之後，就坐火車到表姐家參觀參觀。坐火車到終站 Bryn Mawr。到埗後，發覺這裡很有歐洲小鎮的感覺。(但係我其實未去過歐洲，恕我亂噏當秘笈) 馬路又窄又多灣，樓房小鋪又多又密，感覺就有點似西貢。所以費城這地方給小弟挺不錯感覺，就環境而言。

表姐夫請客，跟另一家台灣人一起吃飯。這次，這間中餐館實令我刮目相看。名字，我忘了，但味道確實不錯，它不是超級好味，但比我在美國吃過的中餐館好不知幾多倍。是暫時唯一我可以建議思鄉的朋友去吃一頓以解思鄉之情。當然，它有味精，味道確有點重，但起碼似翻啲廣東口味。

之後，表姐夫開車送我們回到酒店，完成了第一天的行程。

是次入住 Sheraton Philadelphia Downtown Hotel。感覺都幾好，大概 USD$120 一晚雙人房。(我咁大個仔都好以無住過咁貴o既酒店，小弟一向去旅行都係廉價為主，是次怕嚇細妹，就住好一點吧。)只是房間沒有免費 wifi，唯有到 lobby 上到夠先返上房。呀，有嘢投訴，廁所度門閂唔到。同埋，部冷氣機啲風聲超嘈，嘈到我寧願熄機。。。

今日都要加班返工！

今日係小弟鐵婚週年記念。當年落雨，今日亦落雨，好配合。

然而，我今我居然要加班，今日係星期日，因為係公司的 year end，公司為防止因為無 engineer 在場無人做 engineering approval 而導致無人處理 production on hold 而導致做唔到 quarter end + year end 條數，因此就要 engineer 返工。而公司亦好好人，補返假俾你喎。

當然，昨日同今日的加班是我自願的，目的就係想儲翻啲 compensation leave。但其實都係一日換一日，無特別著數，或者叫做著數咗 flexibility。

每次要加班，加上今日o既特喇日子，實在不得不令小弟再次思考，究竟我在做什麼？咩嘢o既 priority 高啲？

為咗 remind 自己今日o既心情，特此一記！

奶茶咖啡之我感

睇到有 blogger (本來想寫 blog 友，但問題係我留意佢個 blog 但人地未有睇我個 blog o既習慣，夾硬屈咗人地變成我o既朋友好似於理不合，所以都係寫翻 blogger) 話要戒咖啡因，特有所感。

小弟接觸咖啡因都不小，近呢半年都每日至少一個 coffee mug o既分量o既咖啡。相對咖啡，其實我更鐘意奶茶，n 年前個肥仔樣就係每日一杯奶茶，仲要有時係茶走，再加上星期五同朋友或同事去飲酒吹水，吸收大量熱量但無做運動，唔肥就有鬼了。

其實，我自己嚟講，奶茶、咖啡唔多可以提神，因為我飲咗咖啡都一樣會恰眼瞓。只有紅牛才能令我唔瞓覺。

仲有，我有個習慣，奶茶咖啡檸茶檸水全部走甜。目的就係減小吸收無益o既糖分與及扮型，同埋，無糖你才可以真正飲到奶茶加啡係咩味。其實奶茶咖啡對我嚟講係一種生活態度，唔知點解釋(離港後無得飲，只因呢度食肆整得太難飲，自己沖又沖得唔好飲，即沖嗰啲又甜到傻，寧缺莫濫，唯有唔飲，呢啲先係生活態度！)。但都唔知會唔會其實好似食煙啲人咁，上咗癮而不自知而矣。

當你覺得 Starbucks 其實唔好飲o既時候，你o既生活態度就從此而來。

回港後記一

人生往往是來去匆匆。然而我近十年的生活也是來去匆匆，感覺像是居無定所，是性格使然或者命運安排，木宰羊。如果是出差的那種跑來跑去的話，起碼，那是我小時的夢想。但事實是，我也不曉得我為什麼總是跑來跑去。有時候，在夢中驚醒時，我都不禁問自己，我究竟在哪？而實情，我也真的要定一定神才意會自己在哪。那種感覺，很奇怪，老是有不安及在戒備狀態。

匆匆的回港十五天，本想要見的朋友沒有見齊，本想要做的東西沒有做齊，本想要吃的東西沒有吃齊。看來，要把下次要做的事情好好的用 GOOGLE KEEP 記下，好讓下次有更好的計劃。雖然我知道沒什麼朋友會看我在這發噏瘋，但對不起，之前我在 Facebook、Whatsapp 等等渠道說過五月會回港並相約吃飯見面，我都失約了(或者朋友們都沒有當我有約過這會事)。但我對自己的說到但做不到心感歉意，希望朋友們多加包涵。只要小弟心中認定的朋友，每個都一樣重要，唯有下次我自己做更好的計劃。

今次回港第一感覺是，每當走到入店鋪或食肆，都感覺售貨員或侍應都很 green，就是比較後生。嚇然發現，可能是自己不再年輕了。

尖沙咀、旺角街頭，來自內地的旅客的確少了，反而多見了外國人。街道易走了。

不曉得是否習慣了老美的乾燥天氣，回港的那種潮濕悶熱天氣實令人很不舒服。

在美國習慣了自己開車的生活，一遇上等巴士等小巴等火車等地鐵的時候就想坐的士和坐 uber。

我發覺我有小小同香港脫節了。