八字

話說小弟久唔久就睇下自己八字同強行研究一翻。

自己本身屬木就一早都知，以為水生木，戴眼鏡戴翻啲水屬性顏色就包無走雞喇。點知近來一查先發現自己原來最缺係火，所以戴紅色o既嘢補補啲火都不足為過。唔駛死捉住黑色眼鏡唔放。。。

同埋特此記地十天干同十二地支去提醒自己，成鬼日都背唔到。。。

十天干：甲乙丙丁戊己庚辛壬癸
十二地支：子丑寅卯辰巳午未申酉戌亥

讀音：壬(吟)癸(季)寅(人)卯(牡)巳(嗣)戌(蟀)亥(害)

甲	乙	丙	丁	戊	己	庚	辛	壬	癸
木	木	火	火	土	土	金	金	水	水
陽	陰	陽	陰	陽	陰	陽	陰	陽	陰

木生火	火生土	土生金	金生水	水生木
木克土	土克水	水克火	火克金	金克木

生我者為印(正印,偏印),我生者食傷(傷官,食神),剋我者官殺(正官,七殺),我剋者為財(正財,偏財),比和者比劫(劫財,比肩)

發噏瘋 - 流行曲

近年廣東話流行曲有每況越下o既情況，原因有啲似雞同雞蛋問題。

小弟其實一般都聽歌唔揀人聽，即係聽個音同旋律，覺得啱聽就會聽，未必有深究歌詞意思。不過好多時係聽舊歌比較多。但原來有啲朗朗上口o既歌，如果細心留意歌詞，即使係李克勤，亦有啲意識大膽或者過界o既歌。歌，有時候真係唔可以亂唱，真係要情願拘謹似君子。

發噏瘋 - 忽發奇想之 PPL

其實都唔係奇想嘅，只係花費嘅金額有啲多姐，又未致於遙不可及嘅。

其實係我突然海鮮痕想考私人飛機牌。你問我係唔係對飛行好大興趣呢？又未必係好大，但就係想試下，想做一啲常人唔多人做嘅事情，又想睇下考咗個 PPL 對我日後生活有無正面影響。

唔知最終會唔會做呢。

發噏瘋 - 追劇

奇幻嘅故事總教人想一直追看落去，所以追劇一開始咗就一直想追到睇完為止，但如果追完套劇又會有失落感，做人真係好矛盾。

我幾時先得閒睇埋 west world season 2 呢。。。

Python - Open a new Tab instead of new Window with Selenium with Firefox in Python

Pretty crazy to work with multi-tab in Firefox with Selenium and here is some tips...

1. locate webdriver_prefs.json under \\python_path\Lib\site-packages\selenium\
2. set "browser.link.open_newwindow" from 2 to 3
3. save before exit.

In program code, I did try using send_keys(Keys.CONTROL + 't') but it didn't succeed.

from selenium.webdriver.common.keys import Keys
driver.find_element_by_tag_name('body').send_keys(Keys.CONTROL + 't')

You have to use javascript to call a new 'window'(tab) and then switch the current 'window'(tab) to newly created 'window'(tab)

driver.execute_script("window.open()")
driver.switch_to.window(driver.window_handles[-1])

After all the operation, you can close the newly created 'windows'(tab)

driver.close()

Remember, once you close the current 'window'(tab), you have to switch the 'window'(tab) back to first one(or another one) to access 'driver' or you will get an error saying the content has been dropped.

driver.switch_to.window(driver.window_handles[0])

A note for myself and for whom it may be interested in

發噏瘋 - 牛一

老撚套，我唔明公司點解要將人o既 private information 公佈出嚟？

你話係十月之星咪算喇，點解要公開 exactly 個日期先？有無問過我想唔想公開我私人資料？

Python - 學會了 data scraping

Data Scraping 意思指從網路上獲取數據，而我o既玩法差唔多係等如 WYSIWYG。

本來要用 browser 逐條 link click 入去先睇到，家陣原來啲 programming 好很方便，有齊晒 module 俾你 remote control 一個 browser 去瀏覽網站，繼而透過獲取返嚟o既 HTML 再做分析，只抽取有用的部分為己用。而當中有一個叫 Selenium o既 package，佢可以好有效咁抽取 HTML 中的某啲 element(s)，咁喺個 program 入邊做咩都得喇。

最過癮o既地方係，佢可以模擬返你瀏覽o既動作去 click，入 username 或者 password，針對動態改變o既內容網站就得心應手。如果只針對靜態網站，我估用 beautifulsoup 可能會仲快手啲。

我o既用途除咗想 scrap 吓 craigslist 之外，仲想 download 翻報紙啲文章留為己用。

真係比我整到個小 program 喎，好過癮。

轉台不似預期之陰魂不散

話說小弟兩個月前，即八月，由 Google Fi 轉台去 Walmart o既 FamilyMobile。以為大功告成，點知，佢原來八月轉台嗰時收咗我兩次錢。

第一次 charge 係由我 online 做 activation+transfer number 所引起的，但由於當時久久不能成功轉台，故我打去 CS 問佢搞咩兼再做一次轉台，咁佢就再 charge 多我一次月費，原來以為佢會自動取消第一次o既收費，或者順延一個月才 renew 個 prepiad plan，好顯然係我諗多咗喇。咁我咪又再一次打去 service hotline 去追討多 charge 的費用。由於我啲英文好水皮，第一時間就想同 CS 玩 chatbox 去搞 refund，可惜，逢係關於帳單，錢銀嘅都要你打去 CS hotline 度處理。好喇我硬住頭皮打去 CS。除咗我英文屎，仲有就係我肯定佢啲 CS 係印度人接聽，因為 FamilyMobile 啲 CS service 已經外判咗俾 Tracfone，出名地差。。。

好喇，第一次打去，佢話 check 唔到有 double charge 喎，叫我去 bank/credit card 度處理。。。唉，我 system 都睇到俾咗兩次錢，點會無 double charged 呢？但係佢死都唔同我處理，淨係識得叫我 contact bank…無功而還。

食完晚飯，心有不甘，再打去 CS 度問。咦，呢次呢個 CS 好好喎，佢都話見到同一個 number 同一金額 charge 咗兩次，佢都同意係收多咗錢，可以 refund。個心即時鬆一口氣，等佢個 system load 啲資料出嚟等到天荒地老。。。最後對埋個 credit card 最尾 4 個數字，就話 ok，等 3 至 5 business days 就會過數，咁我滿心歡喜咁等喇。

點知，等下一日，等下又一日，等咗成個幾禮拜都唔見到 refund 嘅？

如是者我又硬住頭皮咁又打多次去 CS hotline，又重覆一之成個 case 俾佢聽，呢2佢又一樣好順利喎，又係話見到同一 service number 同一金額 charge 咗兩次，同意 refund。又係同 credit card 尾 4 位 number，加一陣佢 load system 嘅時間，3就話 ok 啦，又係 3 到 5 business day 先會過數，呢次仲俾埋 transcation number 我添，我亦問佢有個 case number 等我有喵問題可以 reference 或者 follow，佢就話無開 case number，因為都做咗 refund, problem solved，所以無 case number。佢話有問題就再打去 hotline，有 record 喎。好啦，無奈地停多佢一次喇。

今日，我終於係 myfamilymobile.com 見到個 refund record，同時間，credit card 都終於出現咗個 $56.xx 嘅 credit。

睇嚟，我又可以準備搵 plan 轉了。

發噏瘋 - 孤獨的 python 新手 - Metra alert message + Python + Telegram bot

以前睇過啲疑似成功人士o既分享。佢地話，要成為成功人士o既首要條件，係要克服孤獨感。而我理解為習慣孤獨感。

又有個小故事同大家分享。

話說小弟家陣要日日坐火車。oh, wait a minute, to be precise，係差不多日日搭火車先啱，因為有時我係會揸車返工，正所謂：有得揀，先至係老闆。但我選擇揸車而唔坐火車有三個可能性，一、有需要，可能要早走或者放工後要去別處，無車返唔到屋企；二、火車 delay，因為未上前已知道火車 delay 的話，我會選擇直接開車返工而費事同佢癲，呢度塞火車唔係人咁品。早兩日就因為突然 severe thunderstorm 吹冧咗棵樹，downed tree on track。咁我就坐咗喺架火車度三粒鍾。。。五點十分上車，八點半先返到屋企。痴線。。。三、心情唔好，係呀，心情唔就要開車去舒緩一下情緒。

由於火車會因種不同原因 delay，咁你係要周不時去火車公司個網頁去留意佢有咩資訊發佈，了解下發生咩事。其實你上咗火車之後，了解嚟都無咩叉用，就好似肉隨砧板上咁，無埋站你係落唔到車。你啲資訊好多時都話你聽 delay duration 係 unknown。同埋即使話過你聽 delay 10min.，過咗廿分鐘後佢可以出個 update 話要 delay 15min.。但明明過左廿分鐘，你先話會 delay 15min. 咁即係講嚟都多餘喇都唔準。同時又即係好似隧道啲廣播一樣，話你知隧道內交通暢通或者交通擠塞一樣：我開緊車，唔通我唔知道佢係擠塞定暢通咩？你話咗知擠塞對事情都無咩幫助o架啦，唔通你話咗我知會即刻暢通翻？唔會吖嘛！嗱，講翻正題，為咗係上火車前了解下火車有無已經 delay，你可以選擇去 metrarail.com 去睇下有無咩 alert message。但我成日都好討厭喺電話度睇網頁，加上佢個網又多 script，load 起上嚟好L慢，所以萌生起一個想法，我可唔可以寫個小 program 去淨係 capture 佢 alert message 啲訊息然後再 send 個 notification 俾自己呢？咁就開始咗我呢個 programming 小 project。

呢次我就係用 python。貪佢簡單易學多 api 同埋古天樂名曲—今期流行。整整下，就變由原本諗住每隔十五分鐘 check 一下，如果有新嘢就通知我，變成我要去 trigger 一下先去睇下有無更新。因為個做法好似會容易啲同埋實際啲，你諗下，好多時都係你去緊坐火車嗰時，即返工放工嗰下，同埋，坐緊嗰下想睇下有無 alert，其餘時間話之你停駛都唔關我事，無謂不斷 polling 即係垃圾訊息。所以方式就改變咗，跟手就再 twist 到利 telegram 去做呢個 solution。

玩咗三個禮拜，終於叫做搞掂用得。

做完之後就好似好失落唔知做咩好。分享俾人聽都好似無人想聽、聽得明或者覺得有興趣咁。就連寫 program 遇到困難想問下有咩 approach 去解決好都好似同樹洞講嘢咁，無人想/識/有經驗去答你。唉，感覺好孤單，好似呢個世界都無呢個需要，只係自己多多事幹，嫌三嫌四o既廢中(頹廢中年)咁。。。

今次都有啲得著。
一、就係需求主導，當你有嘢覺得唔方便，而你又有心想解決，就會有動力想去整啲嘢，就算唔識都會學到識。漫無目的無 mission 去學一樣但又無用的好飄渺，好難學得好。
二、不斷修正，起初諗o既 idea 其實同成品係有啲偏差，係成個 methodology 唔同咗，因為現成有啲簡單啲o既 solution 而同時間做到差唔多o既效果，何樂而不為？
三、認清需求，諗真啲你想要啲咩，無論你所以的資訊、次數。
四、平台，我今次用咗 telegram，係因為我有，加上網路上啲人又話好易整個 telegram o既 bot，所以就揀咗佢。但後來發現，原來 telegram 無我想像中流行，周圍問人十個先得一兩個有用 telegram，好彩唔係用嚟搵錢，唔係就中伏了。

成個小 project 完成後，發個成個過程終都係自己搞掂，做完又係自己用，感覺好很宅。。。即刻有莫名o既孤獨感。為咗要成為成功人士，就等我慢慢習慣佢啦。(白痴，咁呢個世界上大把成功人士啦)

下次有機會介紹下用 python 加 telegram bot 去做到我想要O既 message alert。

廢噏完畢。

發噏瘋 - 講普通話啲人聰明啲？

真實故事，非道聽途說。

話說小弟的一位姨甥升上芝加哥一間 L 字頭的私立大學，今學期選修了一科中文科。老美o既中文科好顯然會多數由一些以國內普通話拼音名字的人授課。根據姨甥所述，那授課的人出言道，懂中文，講廣東話但唔識講普通話是比較蠢的。

我聽到就即是無名火起，尤其我呢啲近年突然香港意識強烈o既中年人。

我即係同我老婆講，屌，咁撚巴閉，走嚟美國教書替死呀，返去建設祖國喇。

早兩日再去搵去佢個貴寶號，睇下佢有咩優質論文或文章發表，點知咩都搵唔到。連 ext. no. 都無個，實在有點令人奧惱。

我一般都唔鍾意主動挑起事端，正所謂，對人以寬，律己以嚴。我呢次我實在抵唔住頸。各方各地文化各有差異，有長有短，多點欣賞或理解差異o既因由，而唔係純粹把現像作出非黑即白分類。唔通你呢個授課人員仆街我就話成間大學啲人都係仆街咩？唔係吖嘛！講嘢都唔撚科學。

認識語言係認識一地方文化的重要元素，如果你硬要吹噓自己因為講普通而自覺比別人優勝或聰明的話，我會為你同要上你課的莘莘學子感到好可悲。

高錕教授

高錕教授，一位值得人專敬的學人以及科學家。

關於高錕教授的成就或佚事，相信近日有看報紙的人都會看到如繁星多而又美麗的報導。相信都無用小弟多說，亦不敢班門弄斧。

只係想在自己的地方，公開o既平台，發表一下自己的感受。

雖然我專稱高錕先生為高教授，但我不是他的學生，亦不是畢業於中大，但我覺得高教授作為一個學人，專稱一聲高教授實不為過，亦叫做表達我對高教授的教育成就專敬。

而跟高教授於生命中有著一刹那的交匯o既故事係咁o既：

話說小弟有幸曾經於香港一家晶片設計公司工作，於某一年的周年晚飯場合中遇見了高錕教授。當年，高教授為那家晶片設計公司的非執行董事之一，故有緣於周年晚飯遇見。

心想，嘩，名人呀，公司有呢位學人/科學家做公司董事，好犀利吖。當年只知高教授就係那位發明利用光纖作通訊用途的人，但都已經覺得佢勁到爆炸。唔知點解，突然間有個衝動想同呢位好犀利o既學人合照一張。

雖知道，我本人並不追星，亦對跟明星拍照威威呢鋪癮沒有興趣，甚致乎對所謂支持你的偶像去什麼演唱會吖買什麼什麼照片呀視為白痴行為。但唯獨高教授，我覺得好想好想跟高教授來一個合照。

就食到半路中途，見到高教授在阡陌席間出現，看似要離開晚宴。小弟立馬捉住個同事：喂，你係唔係有部相機喺身？幫我同高錕影張相吖。佢反應係呆一呆，覺得人地肯唔肯同你影呀？當刻我本著小弟很薄的面皮，鼓起勇氣，走上席間向高教授問道：高教授，我可唔可以同你一齊影張相呀？高教授很和善咁回答可以。咁我就叫同事快啲幫我影相。影完相之後，佢仲問我係公司做咩？係唔係讀中大？讀咩學科？咁我都一一回答。高教授雖然反應不算得快，但語氣和善，半點架子也沒有。跟住就同高教授握手言謝。面紅耳熱，個心仍然跳得好快。

此事乃小弟懂性至今，唯一一張與名人的一張合照。

後來返到公司發現，同事相機居然用了一個超低o既解像模式去同我拍照，佢o既解釋係：唓，公司用機，平時影 FA 嘢，求其唔駛咁靚o架嘛，無為意咪無轉番高像素囉。我即時差啲激到暈咗。如果我即係返睇過張相，我一定會再影過，張相像數低，白平衡又錯晒，真係 no good.

世事往往就係咁，總係有啲遺憾。

之後喺港台一個電視節目，先叫做比較多一點認識高錕教授，先知道原來佢o既成就係咁犀利，慢慢再知道原來高教受o既為人同情操都好好添。但好不幸，高教授患上了腦退化症，亦即謂老人痴呆。個心即時呆咗一呆，同埋個心酸咗一下。

因為高教授，我曾經想過去中大讀個 master，但最後都無成事。

高教授太太亦成立咗一個基金，一方面支持為研究腦退化症，一方面支援腦退化症病人及家屬，久不久就見到一架由貨車改裝為宣傳車經過中大或科學園附近，有大大個高教授o既肖像。每次見到個心都酸一酸，嘆天意弄人。

於上星期日早上的 Twitter 看到高教授離開人世的消息，實心情沉重，對高教授退休後選擇香港作為他渡過晚年到離世，為的只是想為香港作出多小貢獻，實令人感動。

願這位偉大的學人和發明家安息。

發噏瘋 - 佛系找數

話說早排(係好很早一排)，應承咗網友交出節目錄音，但一拖再拖，實屬無地自容，直頭係 chat room 都唔敢多加發言，因為自知走數理虧。
好喇，星期六早上突然全屋無人，實為錄音大好時機，快快的錄有個音出個 session 當係 warn up 好找數好，咩都好，總之就，做咗件事，交住數先。

notes 打好，自以為自己會臨場發揮， elaborate 一下，令內容豐富啲完整啲，點知講嘢時會腦塞，被來電打亂，加上家人抵家，故草草了結。

睇嚟下一次都要 plan 好啲先。

話樓巿 - 按揭

相信按揭呢家嘢好多人都唔會陌生，尤其你曾經買過樓。按揭o既意思係，當你想買一層樓(香港嚟講其實係指買一個單位o既意思)，而你又無足夠o既金錢 full pay 去買入呢個單位，咁你就需要銀行或者財務機構去借錢買入呢個物業。同時間，銀行亦唔會無端白事咁借錢俾你，而佢係會做幾件事去平衡借錢俾你呢個風險：

1. 首期，即係買入價o既兩成(視乎準業主買入單住o既價錢、財務狀況等等。。。)。目的係顯示買家係有充分意圖或者意願去買呢個單位，俗啲講就係想同你攬炒或者洗濕你個頭。假如貸款人唔駛俾首期就借到錢，即係無本(某程度上 credit record 都係你o既成本嚟o既)就借到錢，萬一有朝債仔搞唔掂，供唔到款，佢就同銀行講，我無錢還，你收咗層樓喇，銀行都真係吹佢唔漲。如果你有俾首期，而你又供唔掂層樓，銀行收翻你層物業，你除咗無咗層樓之外，你付出o既首期都會付諸流水，一去不復返。咁你估相對講，你俾咗首期係唔係會落力啲撲水供樓呢？
   
   你可能即刻會問，喂，銀行收翻層樓有抵押品喺手，怕咩喎。說話就唔係咁講，因為銀行目的只係想將錢借出然後有穩定而又預期到o既利息作為收入，而唔係想收翻你層樓。銀行其實好多時都好保守，佢唔想承擔風險，佢寧願穏定咁收小啲錢，唔係係收翻你層樓轉售套利。雖知道一買一賣涉及風險，同埋，銀行收翻你層樓其實仲有一大堆 procedures 要做，法律上喇、估值喇、跟住要搵賣家喇(即銀主盤)，再唔得就要拎去拍賣，但拍賣好多時個價都係低於巿價，一來買入o既人都怕麻煩，二來銀主盤好多時都要你 full pay，因為銀行都想盡快收翻啲錢，唔係唔想揸住個物業。咁 full pay 得，個價自然會有所折讓。銀行唔想經歷一次下一個準業主要去做按揭冗長o既步驟及時間，萬一下一個準業主大吉利是上唔到會，交易告吹，即係成個過程又要再嚟過，真係好煩o架。仲有喎，拍賣行又會收銀行拍賣費用，所以銀行要做銀主盤的話分分鐘係會蝕錢的(雖然呢個可能性好低，銀行點會做蝕本生意。)
2. 利息，即如果銀行如果認為借錢俾你個風險高啲，佢就會收你高啲息，用高啲利息回報去消除佢心中o既不安，或者叫做快啲收回佢o既成本。打個擘如，假設兩個相似o既單位，成交價相近，但點解你個 rate 同佢個 rate 唔同？因為銀行覺得你風險高啲，而個成本上升，咁佢咪要加你利息去 cover 個成本囉，無錯，風險都係成本之一。總之收多啲錢咪接受到高啲o既風險囉，正所謂高風險高回報嘛。
3. 抵押，即係銀行作為你o既債權人，喺你有咩依郁o既時候，佢可以變賣你層樓(即你個單位)去支付你欠佢o既錢。雖然你係名議上o既業主，但某程度上只係建基於銀行賦予你物業o既某部分使用權同掛名叫做業主。好多時，按揭合約寫明你係唔可以私自再去做二按(即再抵押樓宇去借錢)或者改變用途，例如由自主變出租。呢啲動作你係要得到銀行o既同意先可以咁做。仲有喎，你張屋契係喺你手定銀行手呢？睇到呢度，你覺你係業主定銀行先係真正o既業主呢？

好喇，講咗一大論，我其實想講啲咩呢？就係想講下我呢個無錢買樓o既人對家陣發展商十成按揭或者二按去做埋銀行八成或六成或五成之後剩餘貸款金額o既做法。我集中講下當中o既風險。如果你計掂數，供到，就以為無問題？咁你就要小心喇。好多時，發展商為吸引買家，好多時會自己做埋財仔，食埋你最後一浸水。當銀行都預視風險增高或者樓價又開始回落，好多時就會出現所謂估價不足o既情況而導致貸款人借唔夠錢去買入單位。

即係例如個單位發展商賣俾你係 $100，但銀行預期樓巿下行，加上評估風險後，覺得你如果供唔掂要收翻層樓變賣時，個價可能只係值 $60 而批出 $60 呢個貸款額度俾你。而你如果有 $40 喺手，咁成個成交都無問題，你都係籌到 $100 去買樓。

但如果你只有兩成首期喺手，即 $20，咁即係你問銀行借埋都係得 $20 + $60 即 $80。咁剩底嗰廿蚊點算，發展商就發揮佢貪婪o既本色，嗱，小兄弟，見你咁有誠意買樓又一見如故，不如咁，我蝕底啲，借多 $20 俾你買樓，一圓你買o既夢想，一年免息期，之後先計利息，利率係 P+1，咁你咪有夠時間去籌期剩底嗰 $20 囉或者慢慢還。準業主睇到係唔係感激流涕呢？

但其實，你無諗過一年後會點呢？

假設你計好晒數，夠俾晒一按同二按o既供款，都不外乎三個 scenearios:

升巿：你供到銀行嗰份又供到發展商二按嗰份，你叻仔，無事。分分鐘過咗罰息期之後你可以 re-mortgage，套多小小現去清咗嗰二按。
平巿：你供到銀行嗰份又供到發展商二按嗰份，你叻仔，無事。只係還嗰廿蚊o既利息有啲貴咁囉。
跌巿：你供到銀行嗰份又供到發展商二按嗰份，你以為你叻仔，會無事？只係還嗰廿蚊o既利息有啲貴？唔止，分分鐘銀行突然發神經，覺得你個物業無當初估值時咁值錢，即係資不抵債，咁佢有機會 call loan，意思係收回貸款。或者好小小就同你追收資不抵債o既差額。當然，銀行一般唔會無故 call loan(但無人敢寫包單)，佢係多數聞到味然後就同債仔 call loan。因為我喺頭段都講過，銀行收回物業再賣出涉及成本以及呆壞帳，非到必要都唔想咁做。但如果，如果佢知你個出糧戶口突然間無出糧而樓巿跌得好勁，咁你就要小心，即使你唔知點解無糧出而又籌到旗供樓咁叻仔，佢都一樣會有理由相信你失去(或者快將失去)供款能力而觸發 call loan 危機。所以我成日都話，盡可能就出糧戶口同做按揭用唔同銀行，無需要俾銀行十分清楚你o既財務狀況。

上邊講o既係計好數夠供一按同二按o情況，但如果諗住走精面，博佢升，喺二按供款前就賣出o既話，咁唯有祝君好運。

突然係唔係覺得租樓好過買樓呢？咁就要睇你買樓o既目的係咩喇，要諗清自己做緊咩嘢，能力去度邊度同埋風險係啲咩，最壞打算係會點。當然租樓都一樣有風險，就係加租同埋唔續租，又要搵租盤囉。

發噏瘋 - 說明書

其實大家件新玩具返嚟，或者想做啲 DIY，有幾多人會第一時間睇說明書？其實說明書有晒一件產品o既介紹同使用說明。只要跟啱步驟，產品理應做到預期效果。

身為一個工程師，我梗係會睇說明書，仲要係好鍾意睇添。因為說明書o既嚴謹同細緻程度可以顯示到公司或者產品o既品質。

平身最怕遇到一啲頑固，唔識，但又唔跟說明/指引o既人。最終，產品或成果不如預期實屬正常，而事主多數都係賴件產品唔得。。。

NAS 升級 - HP Microserver Gen 8 CPU upgrade

其實呢篇係補完，CPU upgrade 喺上年己經搞掂，不過都想呃個 post 做個紀錄。

話說上年十月臨回鄉探親時，去淘寶買粒舊 U，佢就係 Xeon E3-1220L。用得 Xeon，就梗係放入我部親愛的 microserver。部 microserver 原本係一粒 Celeron。網上好多人有教學講點 upgrade 個 CPU。

升級o既選擇要點係
- FCLGA1155
- 低 TPW
- 唔駛換 heatsink / 唔駛加風扇
- 勁過 Celeron

其實網上好多人都介紹 Xeon E3-1265L v2 。但係佢實在有少少貴，所以最終買咗粒 E3-1220L。少咗o既係internal display。反正底板都有 display chip，所以就由得佢。粒 E3-1220L 話晒都 Xeon 系列，processing power 點都一定勁過 Celeron。雖然 clock rate 慢咗 0.1GHz，但 TDP 由 35W 跌到得 20W，Max Temp. 由 91 DegC 跌到得 77.5 DegC。2 HT 變做 4HT。

總體成個 upgrade 過程無咩難度，鬆 screws，拉出底板，拆甩個 heatsink，取出 CPU，放上新 CPU，加散熱膏，上翻 heatsink，推翻個底板入機，開機，確認 CPU，搞掂。

其實我都係手痕多過實際需要。。。

經濟循環 (內附影片解說中文版同英文版) 更新

經濟循環呢個學名我估絕大部分人都聽過，但你又有無諗過點解經濟係會循環呢？明明向上行緊，點解會有一日又會向翻下，而且啲人仲話有上就一定有落！呢個疑問其實都一直存在係我心中好 x 耐，點解有上就會有落先？

有一日突然心血來潮定唔知喺邊度俾我搵到一段 video，講關於經濟循環呢個理論。就清楚解釋點解會有循環o既出現。原來一切都源自於借貸。

段 video 雖然係普通話，但無咩北方嗆，好易聽，加上有動畫輔助，應該好易睇得明。好建議所有人都睇一次，明白多啲經濟活動係點運作，同埋你會發現點解銀行係萬惡之源百業之母(正確啲嚟講係借貸先啱)。

美股月結戰報 - 貳零壹捌年捌月

現金減值源於 Tesla 買賣之損失。Amazon 結於升穿 $2,000 美元。

	Cost	Comb.	Price	P/L	W. P/L
Cash	1455.2	15%	1249.1	-14%	-2%
AMZN	1665.475	33%	2008.605	21%	7%
GOOG	1122.95	11%	1215.59	8%	1%
TWTR	35.165	11%	34.795	-1%	0%
NVDA	240.21	12%	280.881	17%	2%
BRKB	190.99	10%	208.511	9%	1%
FB	175.99	9%	175.4	0%	0%
					8.5%

美股號外之三之後續

唉，講得後續，就梗係有啲嘢更新。

不幸o既係，我於 Tesla 蝕了錢，買入買出價相差了 18%。唯一興幸係注碼細，只佔總投入資金的 10%，即係為整個 portfolio 帶來了大約 1.8% 減值。

買入價為 $375，賣出價為 $308.38。

其實，跌超過 5% 就應該斬鑦，以此為鑑。

買入喺因為私有化o既憧憬，既然私有化唔成，就無謂 keep。TSLA 以現價計我不太睇好，唔係話我唔信 EV，而係佢成日都好似搵朝唔得晚咁。前(錢)景唔太清晰。所以都係忍痛收佢檔。

終於由接刀仔變接軍刀。。。

美國銀行開戶親身經歷

首先，我要講o既係，我嚴重違反咗個人中指╭∩╮（￣▽￣）╭∩╮，呀唔係，係宗旨先啱。以前講過，被人 reject 過信用卡就永不錄用，但我的確係食咗言，我係悔疚過好一陣子！但面對一張聽講係全城都話好o既信用卡我居然脆底咗。不過呢樣唔係今次要講o既重點，下次先講翻信用卡。

今次係想講講去銀行開個戶口，開一個 saving account。你就可能會問，唓，開個 saving 有咩特喇呀師傅。兄台且慢，此 saving 不同彼 saving。喺香港，你要開個 saving，雖然家陣都麻煩，左填右 check，但都好平常o既一件事，尤其你原來已係現有客戶，但美國好唔同。

喺美國，default 一般你話去銀行開 account 意思係開個 checking account，亦即香港o既 current account。無論你係用嚟做出糧戶口、開 check(cheque)、交費咩都好，一般都係用  checking account 搞掂。而 saving 一般係預你有入無出，個別銀行對 saving account 提款次數係有次數o既限制。以 魔跟大窿 銀行嚟計，一年限提六次咁大把，當然 saving 係有利息支付，但 checking 好多時都係無或者小到你唔會恨，仲好多時可能要你係咩 priority account 或者咩 premium account 先會有 checking account 利息。

今次我想去開 saving o既原因又係貪心囉，其實兩年前都食過呢款優惠一次，食完就取銷咗，兩年後佢又嚟優惠，咁我咪又食多次囉。原本係開戶 saving account，十日內存款萬五蚊美金，維持三個月， 就會有 $200 rebate，六個月內 account 要仲係 active，唔係佢會扣翻錢o架。但近來做個小更新，就係將金額從萬五提升到兩萬五蚊，rebate 就升到 $300，維持月數一樣。

見佢話  online 申請到，咪諗住 online apply 入 code 開戶啦，點知開嚟開去都去到最尾一個 step 搞唔掂。咁我咪又 online message CS 問發生咩事，諗住我都係現有客戶，開多個戶口應該簡單啲呱。佢話 confirm 唔到我o既 information，要落去 branch 開戶。心諗，你老味，都用緊你 service，又點 confirm 唔到我個人資料呀。

好喇，咁我星期六就去你 大窿銀行行個圈。個 banker 都好好態度，我表明來意，佢就好快同我坐底開戶。俾完 ID 同 credit card 做身分證明後(佢要兩個文件證明你個名，其中一個要有相，而 credit card 喺美國都可以用嚟證明你個名)，佢就同我開戶。誰不知，佢問下係唔係 citizen，我梗係唔係喇，佢就問我攞 green card，要 scan 做 record。佢話每逢開戶都要做一次，無辦法喎。如果佢講o既嘢係真，我就就明白點解我 online 開唔到。以小弟無根據o既估計，係由於我並非 citizen，每次開戶都會 check 你個 identity 一次；如果你係 citizen，check 過一次後就唔會再 check(我估)。顯然我又開戶唔成喇。

我上網睇翻，原來 花旗參銀行都有開戶優惠，普通戶口，唔駛 direct deposit，只要維持 $15K 喺戶口，就可以有 $400 rebate。反正都係 check 個人 information，睇嚟，呢個仲著數，反正都想喺唔同銀行開多個戶口，無必要將所有數字俾晒同一間銀行知道晒。仲有，之前學前輩講o既，按揭嗰間銀行同出糧間銀行最好分開，無必要俾佢知道你財務狀態。得閒就要做好準備。

美國火車泊車分享

唔知點解硬係唔鍾意用通勤二字。

話說小弟自從轉工之後，被迫愛上搭火車。而由住處去火車站當然要自己開十鬆分鐘車。而美國o既火車站就好好o既，有一個好大個 park lot 任你泊。雖然係任你泊，但，係要俾錢o既。正價為 USD$1.5 per day，泊到晚上十一點五十九分為止。

講到俾錢，佢都有幾個方法俾你揀。Pay per park 同 prepaid

Pay per park 佢有兩種玩法。

一、就係即場喺 ticketing machine 俾錢或者俾卡。每個 park lot 都有個 parking number。落車時要記得 parking number，然後喺 ticketing machine 輸入號碼，再入錢/碌卡，跟住就會出張飛俾你，而你就要留住張飛做俾咗錢o既證明。萬一有條矒柄無神神抄咗你牌，都可以攞住想 receipt 做上訴證據。不過部 machine 就唔食 penny，最細都要入 quarter。。。即係清唔到啲碎銀。(其實去超巿啲自助 machine 咪可以清晒啲碎銀囉！)

二、就係用 app，家陣廿一世紀，用 app 俾錢好平常，用 app 俾 parking 亦屬方便，只要記得你泊車個 zone 係咩號碼，每個站都有個 zone number，除咗要入 zone number，當然要入翻你個 parking number 喇，再喺 app 度襟幾下，就俾到錢，你話方便唔方便呢，你直頭可以衝到上火車先慢慢襟。講完好處就講下不足之處，我估呢個 pay by app service 係外判的，政府要收足錢，而 service provider 又要舐油水o既原故，佢喺 $1.5 o既 parking fee 上仲要俾多 $0.32 o既所謂 convenient fee。三毫二子看來唔係好貴，但如果你將佢以百分比來衡量的話，嗰 convenient fee 就等如 parking fee on top 加 21.3%。咁你話合唔合理或者抵唔抵俾？我只會話我唔會用囉。我直拉去 ticketing machine 俾卡仲可以三陪積分添呀。

Prepaid 又係咩玩法呢？
City 為咗方便要每日坐火車o既人士，推出半年期o既 Pre-Paid Pass。為惠$1.25 per day，即係 $150 半年，以一個月泊廿日嚟計。可以去 City o既辦事處去辦理，佢地好君真，比如我尋日去辦理，佢係 pro-rated price 賣俾你。當你有一日唔需要o既時候，你退翻個 parking pass 俾 City，佢又會 pro-rated 退翻錢俾你。1.25/1.5 即係八三折，或者如果你一個月泊多過 16 日，當月之後o既泊車錢就當係賺咗。

仲有一樣嘢想分享，就係火車站o既 parking lot 原來都有分係 METRA o既 property 定係 City o既 property。喺泊車o既價錢上應該無咩分別。但係喺屬於 City o既 parking o既 Ticket Machine 就用唔到 Transit Benefit Fare Program 張 debit card，即係用唔到 pre-tax debit 卡個度扣錢。不過唔緊要，反正入o既錢唔唔夠 cover 一個月o既火車錢，即係火車月票已經打爆咗每月 pre-tax 額度。

下次有機會再分一下其他火車趣事。